NGËRO 20 - KARÚK-PËRIM KAWALU Nouveau Testament

Pol di Masedoonia, ni di Akaaya

¹ Bi barúj par bi, a Pol rui bafets Yeesu na tseend bukul ibats, na patsësar ni bukul, na pën atsëp Masedoonia.

² A na yaana ucaak umënts wun, koo liinc-liincan bafets Yeesu ni irim icumal, na pën atsëp Gëreesia,

³ a na ro rul këlí këwaants. Uwal wi nu yecis wi pëgija pëlutar Siiria, a na me Bajudeu ro pëgungan pa nul, na baaraan pëwitsee bi Masedoonia.

⁴ Ba ñuatsan biki Pol aci Sopatros abuk Piiru kanpënë-ni Bereeya, Aristaarku ni Sekundu ban pënë-ni biki Tesalonika, ni Gaayu nan pënë-nii Deerbi, Tiikiku ni Trofiimu ban pënë-ni biki Aasia, ni Timoteu.

⁵ A bamënts biki yër wund bërun ee ka lip wund di Troas.

⁶ Upar unu kare-upom un tsijats wi bëko-bëlëntsëntsaani, wund gíjee di Filiipus. Bi u ro bi ngënu kañan, a wund bofëlar ni bukul di Troas aro rul ngënu paaj ni ulon.

Eutiiku ayëri di ujaneela ee cats, a na natsee di pëcäts

⁷ Tsi unu ucak tsi kanëm, bi wund júk bi pa pëtawësar upom, a Pol nan kai pëtsëp tsi unu ufaantsan, na ci tsi kawël përim; na mob tsi uñakan te myëŋ ucaak.

⁸ A pëfër përuets pi wund ciina pi tsij ngëlamp ngëcumal.

⁹ A ulon upaas wi ka n jaka wi Eutiiku ro tsoar tsi ujaneela a nuu ŋënd. Bi Pol mob bi tsi uñakan ajon, a bëŋooy peul, a na pëni di ruëts mtaal mwaajantsan ee yër; a bu kë jejul, na cäts ba.

¹⁰ Maa, Pol welee, ee yërandul, na jejul, a na ja: “Ind tsë juatsan! Awamand ubiira.”

¹¹ Pol kaka paya, a na tawës pëpom are, na mob tsi pëñakanaan bukul mak, te kafa-unu, na tsëp.

¹² A bañaan tsëpand upaas u wamand wunk ubiira, a ko wan lílan bañaan bëlieng ngëwaas.

Pol apën di Troas atsëp Mileetu

¹³ A wund yër bërun, ee gija bëntsian bëlon bi ka ya bi Asoos, dul di wund ka run pëjejëna Pol, par unk di na baaraan dun pëyaana bëga umbeera.

¹⁴ Bi na tsënk wund bi di Asoos, wund gíjee dul pa pëtsasan Mitileene.

¹⁵ Dul, wund gija bi bërëk unu ucints aband Kios; unu ucints wun, wund band Samos, a tsi unu ucints kak wund band Mileetu.

¹⁶ Pol ŋalats pëjon di Aasia, na baaraan përits caal Efeesu par acësara pëmaatir unu Pentëkost di Jerusalem, uci u yëla bëro.

Pol ka tíil bajëŋal Efeesu pëtsëp

¹⁷ Bi Pol band bi Mileetu, na yël di Efeesu, pii rui bajëŋal Ngëriisia.

¹⁸ A bi ba baandi bi, na ja bukul: “Nda me uwar bi ci bi tsi uleka ind, ki unu ucak bi pëni bi Aasia a baandi.

¹⁹ Man baar tsi pëleempar Ajug tsi kawelan-been nji, ni tsi mŋand, tsi pëncuaf mteenamana, ni tsi igúngan Bajudeu.

²⁰ Nji i kaats ko wi wët wi pëleents ind, un yëlan wi pëci uwar tsi ind; maa, man leents përim a ndu jukan ind tsi pëncuaf bañaan, ni di ito.

²¹ A n leents Bajudeu ni Bagërek përim, pa ba witsësa pa Nasien-batsi, bu ka wak tsi Ajug nja Yeesu.

²² Inkri, Uwejats tanin wink, a nji pën ink pëtsëp Jerusalem; i meets ko wi kan baandë-niin wi rul.

²³ Maa man me, tsi kara përaasa, Uwejats-ujënts acar aleentsin mkorente ni pëtsua tsi unoor-uwiak kë lipindul.

²⁴ Maa, nji n tsuuts ubiira nji ko un ka wi bëkat, uci pëjaa man túk pëtuk nji uwar, a n do uwar uleemp wi Yeesu, Ajug, wëlin wi përo, nji pëci naleents Upetsan-uwar, uleka bëtseend Nasien-batsi.

²⁵ Tsi inkri, man me ne ind biki yaana biki bëlieng, a n dë leents uleka pësien Nasien-batsi, nda katse ka win urostu nji.

²⁶ Wul ka wun n dë leents tsi pëncuaf ind ntsari, nji i tsopats pëñaak ñaan.

²⁷ Par, nji n wëtats pëleents ind ko wi Nasien-batsi tsaag wi.

²⁸ Nda tsuunkari iyeen ind bërier ind, ndë tsuunkar pëtan ngënkaanel pi Uwejats-ujënts tsu ind pi pëci bawaay, pa nda yafan Ngëriisia Nasien-batsi ngi na weelëna ngi pëñaakul bërierul.

²⁹ Ma me, u ba nji pëpën, din ngënjurtu ngëjuatsal ka niaji tsi pëncuaf ind, ngul ngan dits ngi ka yëkar pëtan ngënkaanel ipës.

³⁰ Bayënts balon ka natsee tsi pëncuaf ind bërier ind koo leents ngëko pëniam, ngi kan tsu ngi ba uwak biki pëfets bukul.

³¹ Nda waayan, ndë les wëtaants pëjukan kara ñaan tsi ind, ni mŋand, tsi ko undo wi ngëwaanu ngëwaants, bërëm ni pënak.

³² A inkri, man tanan ind Nasien-batsi, ni përimul pi bëtseend, pan ka pi pëyëlan pëliican ind ni pëwël ind bërukanda ban tsuura bi ban patsana biki bëlieng.

³³ Nji n díits nin uncaam ñaan, nin uwëruul, nin kaŋiul ki bëtiem.

³⁴ Ind bërier ind, nda me iñan yi leemp, pa ngi fier ngi, ni ngi ban ci biki ni nji.

³⁵ Tsi ko un ci wi-ba këci, man piban ind, ngë ka pëleemp uleemp uñatsal pa pëtsënk ban fier biki, nja kë les irim Yeesu, Ajug, i na ja yi nul bërierul: ‘Ni ka wëli ape ni ka yanki pëci nanaakal.’”

³⁶ Bi na ja bi ngëmënts ngan, na jintëla ni bukul bëlieng, na ñaan.

³⁷ Din, bañaan bëlieng ci tsi irug, bu kë yërand Pol tsi katsuts, bu kë wúnkëraul.

³⁸ Ko un tsu wi bukul a ba juatsan, aci përim pi na ja pi bukul, bë katse ka win urostuul. A ba ñuatsanul te di bëntsian.