NGËRO 2 - KARÚK-PËRIM KAWALU Nouveau Testament

Uwejats-ujënts awelee

¹ Bi unu Pentëkost baandi bi, a ba júk bëlieng tsi tsëko tsëloole.

² Ucar umënts wun, pëuur pëni di batsi pi ukëk ee cum bëlieng kato ki ba tsoarëna ki.

³ Din ko cili pi indiamënt bërua a i gara pafar tsi kara ñaan tsi bukul.

⁴ A ba cum bëlieng Uwejats-ujënts, a ba ci tsi pëñakan mlon mleents, bi Uwejats tsu bi bukul pëyëlan pë ñakan.

⁵ A ka Bajudeu ban pëni biki Jerusalem, bañaan ba lënk biki Nasien-batsi pëni tsi ngëcaak bëlieng tsi utsia batsi.

⁶ Bi ba te bi pëuur, a kandënd bañaan bi ee júk a bë katse me ko wi bu kë ro wi, uja nan dooni në te bu kë ñakan tsi pëleentsul bërierul.

⁷ Bë katse me ko wi bu kë ro wi, ba pikra, a bu kë ja: “Nda teenan-e! Biki ka ñakan bikink bëlieng, bë cits iink bañaan Galileeya-a?

⁸ Um di uja run kara ñaan tsi nja në te bu kë ñakan tsi pëleentsul bërierul pi na bukëna pi?

⁹ Nja ban pënë-ni biki Partos, Medos, Elamit, ni ban tsoar biki di Mesopotaamia, ni Judeeya, ni Kapadoosia, ni Pontus, ni Aasia,

¹⁰ ni Friijia, ni Panfiilia, ni Ejipët, ni këboos Liibia ka wok ki Sireeni, ni ban pëni biki Rooma ee tsoar tsi,

¹¹ ni Bajudeu, ni bañaan ngëcaak ba niaj biki bëga Bajudeu, ni bañaan Këreeta ni Araabia; a ngë te bu kë ñakan tsi mleents nja uleka ngëko Nasien-batsi ngëpikranuël.”

¹² Bu pikra bëlieng, a bë katse me ko wi bu kë ro wi, a bu kë jaalar tsi ba ci tsi: “We ci wun umënts wi-o?”

¹³ Maa balon kë riat koo ja: “Bë kuj këkuj pëwat!”

Per añakanaan kandënd bañaan

¹⁴ Din, Per natsa ni untaaja bukun ni naloole, na kat përim, aja bukul: “Bayënts Bajudeu, ni bañaan Jerusalem bëlieng, nda mean ko wi, ndë cikëndën irim nji.

¹⁵ Bañaan biki kujats, bi nda ci bunk tsi pëwejats, par aru ci ngëler këwas ni ulon ngi bëfa.

¹⁶ Maa ko wi, aci wi Joel, nayëlia ro wi ja:

¹⁷ Nasien-batsi aja: ‘Tsi ngënu ngëtuami, mán koŋi Uwejats nji, tsi bañaan bëlieng. Babuk ind bayënts ni bakaats, bu kee ru leents ngi Nasien-batsi; ipaas ind kee ru ka bëwinal, ngëtsaf ind kee ru tsaafi.

¹⁸ Ucar, tsi ngënu ngëmënts ngan, mán koŋi Uwejats nji tsi baleemp nji bayënts ni bakaats; bu kee ru leents ngi Nasien-batsi.

¹⁹ Mán do ngëko ngan pikran ngi di ruëts batsi, ni ngëpibanaani tsi utsia tsi: Pëñaak, bërua, ni uwamël urú.

²⁰ Unu ka witsa u ci karëm, pëli ka witsa pëñaak, tsini uruka ka baandi unu uwiak Ajug, wi përëmb.

²¹ Din, uja nandui ba këru katim Ajug, në buer.’

²² Bayënts Israel, nda cikëndëni irim yi! Yeesu Kanpënë-ni-nasaret, niints ni Nasien-batsi niirani tsi bërun ind, tsi undo bawitsa, tsi ngëko ngan pikran ngi, ni ngëpibanaani ngi Nasien-batsi roona ngi tsi nul tsi pëncuaf ind, ind bërier nda me;

²³ nul agutsara ind, bi Nasien-batsi ro bi baaraan u rola, tsi utsaagul ni tsi kacar-umeul; a nda rieŋul di kruus afiŋënul iñan bamabats.

²⁴ Maa Nasien-batsi natsaniul, bi na pacul bi mkorente pëcäts, par yilaatsa bëjaa pëcäts amobul a tsijëna.

²⁵ Par Dawid aja tsi ulekaul: ‘Ma n ja n doon koo n win Ajug sandëndën, tsi bërun nji, par aci tsi kariir nji, pa nji përits siints-siintsana.

²⁶ Wul ka wun uwaas nji ci tsi ulílan, a pëndiamënt nji ci tsi mkita; ŋal uliaf nji buts ka naakësa tsi uwats.

²⁷ Par, m di kë bër uwaas nji di mcats, te m di kë wët najëntsu na nooy.

²⁸ M tsuin a me iga ubiira; kë cumanin ni ulílan tsi bërunu.’

²⁹ Batsaar ni nji! Nda wëtin man leents ind jëntsan, tsi uleka Dawid, asin nja; nul a cäts a na mooya, pëbukul awama ci tsi ucaak nja te unu untsari.

³⁰ Nul aci nayëlia, a na me Nasien-batsi ro baaja aja, tsi pëtsoari-pësienul, ka tsoaran nalon ni kan pënë-nii tsi kajërul.

³¹ Dawid aro car awin ko wi Nasien-batsi kii ro wi, wul ka wun na leents uleka unatsaree Këristu di pëcäts aja: ‘Nul wëtaatsa di mcats, nin uliaful nooyats di pëbuk.’

³² Yeesu namëntsi, Nasien-batsi anatsaniul di pëcäts, a wund bëlieng aci ba maatir biki umënts wi.

³³ Nasien-batsi ariangul tsi kariirul, a na yank Uwejats-ujënts di Asin, undo wi watsana; na koŋi wul, bi nda win bink a nda teend.

³⁴ Par Dawid payaatsa batsi, maa nul bërierul aja: ‘Ajug aja Ajug nji: Tsoaran tsi kariir nji,

³⁵ aa ka tsu babëru ba ci pëpafëni iyotsu.’

³⁶ Bañaan kato Israel bëlieng aka pëme, Yeesu ni nda rieŋ ink di kruus, Nasien-batsi atsuul na ci Ajug, na ciind Këristu.”

Bacäk ba witsësa biki aniiran Yeesu Këristu

³⁷ Bi bañaan te bi ko wan, a ngëwaas bukul juatsan mak, a ba ja Per ni bacintsul bapostolu: “Batsaar ni wund! We wi wund kë ro wun?”

³⁸ A Per yankës bukul aja: “Nda wëtani bëci ind, uja kara ñaan tsi ind në mijana tsi katim Yeesu Këristu, pa pëjampësaa ngëjubanul, ndë yank utseend Uwejats-ujënts.

³⁹ Par, ind biki Nasien-batsi watsan bukun wul, ni upäts ind, ni ba wama biki lawan bëlieng, ban ci biki, biki Nasien-batsi nja Ajug, kë rui biki.”

⁴⁰ A Per leents ngan par ngi ni ilon irim icumal, a na liinc-liincan bukul ngëwaas aja: “Nda buerani iyeen ind tsi bañaan ntsari, bukul ba waraatsa biki.”

⁴¹ A ba niiran biki përimul mijana; tsi unu umënts wun, bëruakan bañaan ngëmiil ngëwaants (3.000).

Ubíira bacak ba uwak biki tsi Yeesu Këristu

⁴² Bu mob tsi bëjukan bapostolu, ni tsi manteelar, ni tsi katawës upom, ni tsi bëñaan.

⁴³ Uja kara ñaan në lënk; a bapostolu kë ro ngëko ngëcumal ngan pikran ngi, ni ngëpibanaani.

⁴⁴ Ba wak biki bëlieng ci tsëloole, a ba bofara ngëko ngi ba ka ngi bëlieng.

⁴⁵ Ba ja ba waap bëka bukul, ni ngëko ngi ba tsij ngi, bu ka faar ko wi ba ka wi, kara ñaan bi na fier bi.

⁴⁶ A ba baar pëloole, uja kara unu bu ka mob tsi pëci di kato-kayëman, bu kë tawës upom di kara kato, bu kë re bariala bukul ni ulílan, ni kajuab-uwaas.

⁴⁷ Bu kë bëndan Nasien-batsi, a bañaan lílandër bukul bëlieng. Uja kara unu, Ajug kë watsës tsi bukul ban buëri biki.