NGËRO 19 - KARÚK-PËRIM KAWALU Nouveau Testament

Pol di Efeesu

¹ Aci uwal wi Apolos ci wi di Korintu, wi Pol par-ni wun bametsu pëboos abaandi Efeesu. Na tsënk rul balon ba uwak biki,

² a na ja bukul: “Nda yank Uwejats-ujënts bi nda wak bi-a?” Maa, ba jaul: “Wund teets koon këte u jaka Uwejats-ujënts aci.”

³ A Pol ja bukul: “Bëom bëmijan bi nda mijana bun?” A ba yankësul aja: “Bi Joŋ.”

⁴ Pol ja bukul: “Bëmijan Joŋ, aro ci bëmijan kayaar-ibats; aja bañaan, ba uwak tsi ni kan bii tsi ufetsul, un ci wi Yeesu.”

⁵ A bi ba te wi ko wan, ba mijana tsi katim Yeesu, Ajug.

⁶ A Pol paf bukul iñan, Uwejats-ujënts welee tsi bukul, a bu kë ñakan mmëlents, bu kë leentsand ngi kan bi ngi.

⁷ Bu ro ci ko pi bañaan untaaja ni batëb.

⁸ A Pol ro këlí këwaants, nuu niaj kato-kajuki koo ñakan ni bëyeentsal, bu kë totëlar irim; a nuu këmand pëtsu bukul ba niiran uleka Pësien Nasien-batsi.

⁹ Maa, bi balon tsi bukul ci bi tsi katamb-iyeen, bë wakats, a bu kë ja ngëko nga waraatsa ngi uleka Bëga Ajug tsi pëncuaf bañaan bacumal mak. A Pol pën tsi bukul, a na tsëpand ba uwak bukunk, a na ja kara unu nuu totëlar irim ni bukul di ikol Tiraanu.

¹⁰ A ko wan do ngëwaanu ngëtëb, a u tsu ban ciina biki Aasia bëlieng pëte përim Ajug, Bajudeu ni Bagërek.

Babuk Eskeewa

¹¹ A Nasien-batsi tsu Pol a nuu ro ngëko bawitsa ngan par ngi pëjaa;

¹² a uja ngëlec oo ifalar iseenda in kërara yi uliaf Pol pafa tsi bamoj, din bu ka yësana mmaak bukul, ngëcaay ngëjuatsal kë pëni tsi bukul.

¹³ A balon Bajudeu, ba nja biki ba roon bu kë yandaar koo ruak ngëcaay ngëjuatsal nga pëni tsi bañaan, kë teenaman përu buts katim Yeesu, Ajug, tsi biki ngëcaay niaj biki; bu kë ja: “Man ja ind, tsi katim Yeesu ni Pol kë leents unk bañaan, nda pënan!”

¹⁴ Ban do biki ka ro ko wan bë ci bayënts paaj ni nalon, babuk nalon niints Najudeu ni ka n jakee Eskeewa, aci nalon tsi bawiak-bajakan.

¹⁵ Maa ulon unu, ucaay jankma bukul aja: “Yeesu, man meul; a me uleka Pol. Maa ind, nda ci yën?”

¹⁶ A ñaan ni ucaay niaj unk catar bukul, a na pe bukul bëlieng uyëlan, na pikaar bukul mak; ba túk bëruënt apën di kato, uliaf bukul jëk mlupi.

¹⁷ Ko wan meaa bañaan bëlieng, Bajudeu ŋni Bagërek ban ci biki di Efeesu. A bëlal jëk bukul bëlieng, a katim Yeesu, Ajug, kë rëmbanaa.

¹⁸ A balon bacumal tsi ba uwak biki, bi ee ka pets koo leents tsi bërun bañaan ngi ba ro ngi.

¹⁹ Balon bacumal buts tsi ban do biki ka ro uleemp bëpene, jukëlan ngëlíbëru bukul, a ba tër ngul tsi bërun bañaan. Bi ba jaak bi përes ngëlíbëru, pa ci ko pi ngëmiil ngëntaaja kañan (50.000) uncaam-utsak.

²⁰ Unk, a përim Ajug kë laar, a puu wiaka koo pekëpe përëmb.

²¹ Bi ngëko ngan par bi, a Pol baaraan tsi uwejatsul pëpar-na Masedoonia ni Akaaya, pëtsëp Jerusalem. Na ja: “Uwal wi ci wi rul, man ka pëya Rooma buts.”

²² A na yël batëb tsi batsënkul ba tsëp Masedoonia; Timoteu ni Eraastu. Nul na ruka di Aasia ajon dul ko uties.

Demeetriu anatsani barúj bëwiak

²³ Tsi uwal umënts wun, a u ro ka barúj bëwiak tsi undo Bëga Ajug.

²⁴ A nalon natsak ni ka n jakee Demeetriu, ja na jej mtsak uncaam nuu tsakëna irum ucaay wi ka n jaka wi Arteemis, a batsak yul kë kaana tsul bariala mak.

²⁵ A na bofëlar ni biki ka leemp biki uleemp umënts wun, a na ja bukul: “Bayënts! Nda me uci tsi uleemp wi, wnja kë rialaan wun;

²⁶ nda win a nda teend ko wi Pol kë ro wi. Aja, basien-batsi biki iñan bañaan-bajin leemp biki, cits Nasien-batsi. A tsi irim yan, na gaañaar bañaan mak, cits tsi Efeesu tsi rin, maa, anats pi aci tsi Aasia bëlieng.

²⁷ Cits uleemp nja rin kee yëlan wun pëtienkëtsëna, maa buts ndërum ucaay ukaats uwiak, wi ka n jaka wink Arteemis di ka wëla urispiitu. Arteemis bërier wul, wi bañaan Aasia bëlieng kë bëndan wi ni bañaan umundu bëlieng, katse kee rëmbanaa.”

²⁸ Bi ba te bi ko wan, a ba cum ni uriab, bu kë lië koo ja: “Arteemis bañaan Efeesu aci uwiak!”

²⁹ A përaasa gëbëlër bëlieng, a ba baar pëloole koo túk pëtsëp tsëko-bëteen. Ba mob Gaayu ni Aristaarku, bacints Pol ban pënë-ni biki Masedoonia.

³⁰ Pol ŋal pëniaj di bëjúk bañaan, a bafets Yeesu niiraantsul.

³¹ A ilon ifetsarul buts ban ci biki bawiak pëboos Aasia, buaraul na wët pëya tsëko-bëteen.

³² A ja balon kë liëri wi, bëlon liëri bacints par bëjúk agëbëlar, a bacumal tsi bukul meets ko un ka wi ba júk.

³³ Din, a Bajudeu rat Aleksandër tsi kandënd bañaan, a ba piembarul bërun. Aleksandër riang kañan apiban na ŋal pëñakanaan bañaan tsi ulekaul.

³⁴ Maa, bi ba me bi na ci Najudeu, a ba lië bëlieng ni përim pëloole tsi ko un do wi ngëwal ngëtëb koo ja: “Arteemis bañaan Efeesu aci uwiak.”

³⁵ A napican tsi përaasa tsu bañaan ba yëŋandar, na ja: “Bayënts Efeesu, noom meetsi u ci përaasa Efeesu ka waay pun karum Arteemis wul uwiak, ni pëcap wul pan pëni di batsi ayëri?

³⁶ Bi ko wan yilaatsa bink pëpokaa, uroko ndë yëŋandar, ndë wët përo ni mcësa.

³⁷ Nda tsiji tsi bayënts biki, ban kiejats biki ngëko ucaay nja ukaats, ban karats biki wul.

³⁸ Uci Demeetriu ni baleemparul kaar ko ni ñaan, kawata-pëleents aci, a bawiak ucaak ci; ban tsijar biki, ba yaan kawata-pëleents.

³⁹ A uci nda kaka ka ko wi ndu yepar wi, umënts wan ka teenaa tsi bëjúk bi ulua tsu bi.

⁴⁰ Nja ngë ci tsi bëjuats pii tsua bamabats tsi bëjúk nja buntsari; par kaats ko ulon un ci wi, wi ngë yilaants wi pëpiban ko un ka wi bëjúk bi.”

⁴¹ Bi na ja wi ko wan, na gar bëjúk.