NGËRO 18 - KARÚK-PËRIM KAWALU Nouveau Testament

Pol di përaasa Korintu

¹ Upar ngëko ngan, Pol pën di Ateenas a na tsëp Korintu.

² A na jëk rul ni nalon ni ka n jakee Akiilas, aciina Pontus, nan du pëni Itaalia ni aarul Priskila; par Klaudiu aro tsu Bajudeu bëlieng ba pën di Rooma. A Pol ya pëwin bukul.

³ Undo bi nuu ro bi uleemp uloole wun ni bukul, na tsëp ee ci ni bukul a nuu leemp, par uleemp bukul aci kaleemp ngëkundan.

⁴ A Pol ja kara Unu-pënaakësa në ci tsi bëcii ni bukul di kato-kajuki, a nuu totëlar irim ni Bajudeu ni Bagërek, nuu këmand pëtsu bukul pa ba baaraan pëniiran.

⁵ Bi Silas ni Timoteu pëni bi Masedoonia abaandi, Pol baar tsi kaleents-përim a nuu piban Bajudeu u ci Yeesu ci-un Këristu.

⁶ Maa, undo bi Bajudeu mob bi tsi pëpok, a bu kë karul, a Pol líc iŋiul yi bëtiem, na ja: “Pëñaak ind ka kak tsi iyeen ind. Man ci najënts tsi pul, a inkri, mán ya di ban cits biki Bajudeu.”

⁷ A na pën tsul ee niaj kato nalon na lënki Nasien-batsi, ni ka n jakee Tiitu Justus; katoul akabëlar ni kato-kajuki.

⁸ Maa Kërispu, nawiak kato-kajuki, awak tsi Ajug ni bañaan katoul bëlieng. A bañaan Korintu bacumal biki kan cikëndën biki Pol wak tsi Ajug, a ba mijana.

⁹ Bëlon bërëm, a Ajug ja Pol tsi bëwinal: “Cats lal; maa ñakani, cats yëŋandar.

¹⁰ Man ci ni wi, a ñaan di ka tsu kañan tsi wi pa pëpikaaru; par bañaan bacumal tsi përaasa pi, bë ci pa nji.”

¹¹ A Pol ci rul aro uwaanu ni këlí paaj, nuu jukan bukul përim Nasien-batsi.

¹² Maa bi Gaaliu ci bi na tsijëna-pëboos Akaaya, Bajudeu baar pëloole a ba natsara Pol, ba tsëpandul kato kawat-pëleents,

¹³ a ba ja: “Niintsi, ka tsu bañaan pëniiran pëjintëla Nasien-batsi tsi ko u mabats wi tsi ulua.”

¹⁴ A Pol kë ŋal pëñakan, Gaaliu ja bajudeu: “Ind Bajudeu, uci-undo ko ulon u waraatsa wi, oo kafiŋ-ñaan, man ka pëcikëndën ind;

¹⁵ maa, uci nduu totëlar tsi undo përim, oo katim, oo tsi ulua ind, ind me bukun. Nji, in ŋalats pëci nawat-pëleents tsi ngëko ngan.”

¹⁶ A na ruak bukul di kato kawat-pëleents.

¹⁷ Din, a Bajudeu bëlieng yërand Sostenes nawiak kato-kajuki, koo tucanul tsi bërun kato kawat-pëleents; maa Gaaliu teenats koon këteen ngëmënts ngan.

Pol awitsa Antiookia

¹⁸ Maa, Pol kaka ro di Korintu ngënu ngëcumal, a uu ba, na patsësar ni bafets Yeesu, na gija pëtsëp Siiria, na ci ni Priskila, ni Akiilas. A na manc beenul di Senkreeya, undo ko wi na ro wi tsup Nasien-batsi.

¹⁹ A ba band Efeesu, Pol patsësa bukul; nul bërierul na tsëp kato-kajuki ee ci tsi mantotëlër irim ni Bajudeu.

²⁰ A ba buaraul na jon ni bukul, maa a na pok.

²¹ A upënul na ja bukul përim pi: “Mee n witsee tsi ind bëlon bëyaas, uci u líl Nasien-batsi.” Na gija di Efeesu atsëp.

²² Bi na gíjësee bi di Seesareeya, na kata Jerusalem pëleena Ngëriisia; a u ba na tsëp Antiookia,

²³ ee ci rul ko u jon wi. A uu ba, na tsëp pëboos Galaasia ni Fríijia a nuu liinc-liican bafets Yeesu bëlieng ngëwaas.

Apolos di Efeesu

²⁴ A nalon Najudeu nan ciinee Aleksandëria, baandi Efeesu, ka jaka Apolos. Aci niints nan kai ume, na me Bëpican uwar.

²⁵ Aci nan juki mak tsi bëga Ajug, na baar ibatsul tsi pëleents përim a nuu jukan ko u mab wi tsi uleka Yeesu; bëmijan Joŋ baŋ bi na me bun.

²⁶ Apolos kur pëñakan ni bëyeentsal di kato-kajuki. Maa, Priskila ni Akiilas kë teul, ba tsëpandul kato bukul; a ba pe pëjëntsan pëleentsul bëga Nasien-batsi uwar.

²⁷ Bi na wejats bi pëband Akaaya, a batsaar tsi Këristu liinc-liincanul uwaas, ba picandar bafets Yeesu ban ci biki rul, pa ba welanul uwar. Bi na band bi rul, tsi bëtseend Nasien-batsi na ci bëtsënk pa ba uwak biki;

²⁸ Par, ni uyëlan irimul, na gaañaar Bajudeu tsi këkës bañaan, bi nuu piban bi tsi Bëpican u ci Yeesu ci-un Këristu.