NGËRO 17 - KARÚK-PËRIM KAWALU Nouveau Testament

Pol ni Silas di Tesalonika

¹ A ba par-na Anfipolis ni Apoloonia, ba band Tesalonika. Bajudeu aka rul kato-kajuki.

² A Pol niaj kom bi uci bi udimaanul, a na tsëp di bukul a ro rul ngënu pënaakësa ngëwaants, a nuu totëlar irim ni bukul tsi uleka Bëpican;

³ a nuu leents bukul koo piban bi Këristu ro bi ka pënoorana, a uu ba, në natsee di bacäts. A na ja bukul: “Aci Yeesu namëntsi, ni n du leents ind ink, ci-un Këristu.”

⁴ A balon tsi biki kan cikëndën biki wak, a ba bofëlar ni Pol ni Silas, ni balon Bagërek ba lënk biki Nasien-batsi, ni bakaats bacumal ban rëmbana biki.

⁵ Maa, Bajudeu cum ni mankocar, a ba jej bayënts balon bajuats-ngëwaas tsi batsuunk-uleemp; ba ro kandënd a gëbëlën përaasa. A ba bi ee yërand kato Jaason, bu kë tsas Pol ni Silas pa pëtsëpand bukul di bërun kandënd bañaan.

⁶ Bi ba winats bi bukul, a ba púul Jaason ni balon ba uwak biki atsëpand di bawiak përaasa; bu kë lië koo ja: “Bañaan biki ka cok bukun ucaak, bë baandi buts tsi;

⁷ A Jaason welan bukul di katoul. Bukul bëlieng, bë pok ngëtsua Seesar, a ba ja aka nalon nasien, ni ka n jakee Yeesu.”

⁸ A irim yan juatsan kandënd bañaan ngëwaas ni bawiak përaasa.

⁹ A ba tsu Jaason ni bacints bukun pëluk uncaam bu ka wëtan bukul.

Pol ni Silas di Bereeya

¹⁰ Ujëk bërëm, a bafets Yeesu tsu Pol ni Silas ba tsëp Bereeya. Bi ba band bi rul, ba tsëp kato-kajuki Bajudeu.

¹¹ Maa, bamënts biki ape bañaan Tesalonika pëwaants ngëwaas, par bë yank përim ni uŋal ngëwaas bukul; a ba ja kara unu, bu kë teen tsi Bëpican ne ngi ba leentsa ngi aci unk.

¹² A bacumal tsi bukul wak, ni bakaats Bagërek ban rispitaara biki, a bayënts cum ko uties.

¹³ Maa, bi Bajudeu Tesalonika te bi Pol kë leents përim Nasien-batsi di Bereeya buts, ba bi ee ka sualan indënd bañaan, bu kë sualëlën bukul.

¹⁴ Tsi uyëk umënts wun, a bafets Yeesu tsu Pol na tsëp kambaŋ bërëk, maa Silas ni Timoteu ruka di Bereeya.

¹⁵ Ba ñuatsan biki Pol tsëpandul te di Ateenas. A ba witsee pa pii leents Silas ni Timoteu, ne Pol ja ba tsënkul ucar umënts wun.

Pol di Ateenas

¹⁶ Bi Pol kë lip bi Silas ni Timoteu di Ateenas, a uwaasul kuliñ mak, undo bi na win bi përaasa cum ni kajintëla-icap.

¹⁷ A nuu totëlar irim di bametsu kato-kajuki ni Bajudeu ni Bagërek ba lënk biki Nasien-batsi, ni bañaan biki kan ci biki buts di kënjëkënts kara unu.

¹⁸ A balon bafets bëjukan nameko ni ka n jakee Epikureus, ni bëjukan nalon ni ka n jakee buts Estoikus, ci buts tsi pëtotëlar irim ni nul; a balon yeparul aja: “Natamb uñakan ni, wee na ŋal wun pëja?” Balon kë ja: “Anaam ne, aci naleents irim ngëcaay ngan meaatsa ngi.” Par, Pol aro ka leents Upetsan-uwar tsi uleka Yeesu, ni tsi uleka kanatsee-di-pëcäts.

¹⁹ A ba mob Pol atsëpand Areopagu, a ba jaul: “Wund yëlan pëme bëjukan bëwalu bi kë jukan bink-a?

²⁰ M tsu wund, wund te ngëko ngi wund meets ngi, a wund ŋal pëme uwar ko wi nga pac wi.”

²¹ Par, bañaan Ateenas bëlieng, ni batsooŋ ban ci biki ni bukul, ka baar uwal bukul tsi pëcikëndën, ni pëja ngëko ngëwalu.

²² A Pol nats tsi pëncuaf bawiak bawat-pëleents, na ja: “Bayënts Ateenas, ma win nda lënk Nasien-batsi mak.

²³ Par, bi du n yaana bi përaasa ind, a win ngi nduu rëmban ngi. A tsi bëgij ulon tsi ngul, ko wi picana wun tsi bël: ‘Aci pa nasien-batsi na meaatsee.’ A ni nda ro ink ka rëmban te nda meetsul, nul ci-un ni n dë leents ind ink.

²⁴ Nasien-batsi na leempi umundu ni ngëko ngan ci ngi tsi wul, ci-un Ajug batsi ni utsia; a nul ri ka ciina kato ki iñan ñaan-najin leemp ki,

²⁵ a iñan ñaan-najin di ka leemparul, pëjaka nul afier ko; nul wël un bañaan bëlieng ubiira, ni uyafënts, ni ngëko bëlieng.

²⁶ Tsi ñaan-najin naloole baŋ, a na leemp uraasa bañaan-bajin bëlieng pa ba jëk umundu. A nul car un ajaakar bañaan-bajin ngëwal ni ngëntsañi ngëcaak bukul.

²⁷ Unk di Nasien-batsi ro run, pa bukul pëtsasul; a u ci bukul tsi pëlaakats, ulon bë kee winul. Par tsi ucär, nul lawaants kara ñaan tsi nja.

²⁸ Par tsi Nasien-batsi tsi ngë kaana tsun ubiira, nja kë raŋar, a ngë ci. Iink di balon tsi bapican ind ja run: ‘Par ngë jabëni buts tsi nul.’

²⁹ A bi ngë jabëni bunk tsi Nasien-batsi, ngë kaats pëwejats pëja, bëci Nasien-batsi aci pi uwëru, oo uncaam-utsak, oo pëlaak; ngul ngi kañan ñaan-najin ni utsaagul leemp ngi.

³⁰ Tsi inkri, Nasien-batsi teenats ka meets ko ija maa inkri, a wël ulai ne bañaan bëlieng kara tsëko ka yaar ibats.

³¹ Par, atsu unu, wi nu wat wi umundu pëleents tsi bëmabal, tsi niints nalon ni na rati; a na wël bañaan bëlieng upibanaani u ciul, bi na tsuul bi na natsee di bacäts.”

³² A bi ba te bi Pol kë ñakan tsi uleka kanatsee bañaan di pëcäts, a balon ci tsi përiatul, maa balon kë ja: “Tsi uleka ko wan, wund kee cikëndënu ulon unu.”

³³ Unk di Pol pëni run tsi bukul.

³⁴ Maa, a u ka balon bayënts ban wak biki, bu kë ci ni Pol; tsi bukul aci Dioniisiu, nan bofënee tsi bawiak bawat-pëleents, ni nalon ŋaats ni ka n jakee Damaris, ni balon kak.