NGËRO 16 - KARÚK-PËRIM KAWALU Nouveau Testament

Timoteu abofëlar ni Pol ni Silas

¹ A na band buts Deerbi ni Liistra. A u ka nalon nafets Yeesu nan ci rul; ka jaka Timoteu, aci abuk nalon ŋaats Najudeu na waki tsi Yeesu, maa asinul aci nagërek.

² Bafets Yeesu ban ci biki di Liistra ni di Ikooniu, ka ja ko u wara wi tsi uleka Timoteu.

³ A Pol ŋal pëtsëpand Timoteu, a na jejul awelan kambac, undo Bajudeu ban ci biki tsi ngëleka ngëmënts ngun, par bukul bëlieng bë me asinul ci nagërek.

⁴ A uja bu kë par tsi iraasa, bu kë wël batsaar ni nja ko wi bapostolu ni bajëŋal Jerusalem baaraan wi, pa ba mob tsi përo wul.

⁵ Unk, a iriisia kë pe këpe pëliincandër tsi uwak, a yuu watsësar ucumar, kara unu.

Bëwinal Pol di Troas

⁶ A Pol ni Silas yaana Friijia ni pëboos Galaasia, par Uwejats-ujënts apok bukul pëleents përim di Aasia.

⁷ Bi ba band bi untsañi Míisia, bu kë tsas pëniaj Bitíinia, maa Uwejats Yeesu niiraants bukul.

⁸ A ba par-na bi Míisia, a ba wela Troas.

⁹ Tsi bërëm, Pol win niints nan ciinee Masedoonia tsi bëwinal, na nats, a na buaraul aja: “Parari Masedoonia, kë tsënk wunk!”

¹⁰ Bi na win bi bëwinal bi, uyëk umënts wun wund kë tsas pëtsëp Masedoonia, par wund abaaraan pëme u ci Nasien-batsi rui wund un, pa pëleents rul Upetsan-uwar.

Liidia aniiran Yeesu di Filiipus

¹¹ Wund paatëni di Troas, amab pëtsëp Samotras. Tsi unu ucints, wund parar Neapolis.

¹² A wund pëndul atsëp Filiipus, përaasa Masedoonia pëwiak pi bañaan Rooma ro pi kaana. Wund ro ngëwal tsi përaasa pëmënts pun.

¹³ Tsi Unu-pënaakësa, wund pën di përaasa atsëp di kambaŋ kabëlaŋ, tsëko tsi wund wejats tsi pëja ne, tsëko bëñaan aci rul. Bi wund tsoar bi, a wund kë ñakanaan bakaats ban juk biki,

¹⁴ a u ka nalon ŋaats, ka jaka Liidia; aci najúla iseenda ijankal caw, apënë-ni përaasa Tiatiira; aci na lënki Nasien-batsi. Aci tsi pëcikëndën wund, a Ajug waantsul uwaas pa pëcikëndën uwar ngi Pol ci ngi tsi pëja.

¹⁵ Bi na mijana bi, nul ni bañaan katoul bëlieng, na buara wund aja: “Ba nda win ci na waki tsi Ajug; nda pëni ndii ci ri kato nji.” A na tambandar pëtsu wund niiran, a wund niiran.

Pol ni Silas di ukalabus

¹⁶ Ulon unu, bi wund kë tsëp bi tsëko bëñaan, a nalon napäts ŋaats, na niajee ucaay wi kan tsaag wi ngëko ngi ka bi ngi bi pii jëk ni wund; nul aro ka kaar bawiakul uncaam mak, bi nuu tsaag bi ngëko ngi kan bi ngi.

¹⁷ A nuu fets Pol ni wund, a nuu lië koo ja: “Bañaan biki, bë ci baleemp Nasien-batsi kanpe pëci di ruëts, a bu kë leents ind bëga pëbuër.”

¹⁸ Aro ko umënts wun ngënu ngëcumal. Pol riabats, na witsësa a na ja ucaay umënts wun: “Tsi katim Yeesu Këristu, pënan tsi nul!” A tsi uyëk umënts wun, u pën.

¹⁹ Bi bawiakul win bi bëkat bi ba watsaraan bi pën, a ba mob Pol ni Silas apuular bukul kënjëkënts tsi bërun bawat-pëleents.

²⁰ A ba tsëpand bukul di bawiak bawat-pëleents, Baromaanu, a ba ja: “Bañaan biki ka cok përaasa wund; bë ci Bajudeu,

²¹ a bu kë jukan undimaan wi wund niiranaatsa wi pëyank, nin përo ko wi u ja wi, par wund aci bañaan Rooma.”

²² A kandënd bañaan bofëlar, ba yërand bukul, a bawat-pëleents taw bukul iŋi, a ba tsu bañaan ba tucan bukul ni ilumbaj.

²³ Bi ba ba bi pëtucan bukul mak, ba guts bukul di ukalabus, a ba tsu nawaay ukalabus na waay bukul uwar.

²⁴ Bi na tsua bank përo ko wan, na guts bukul di ukalabus un pe wi pëci di bametsu, a na nigan bukul itsiim tsi pëmëts bëko.

²⁵ A uu wokan myëŋ ucaak, Pol ni Silas kë ñaan, a bu kë ya koo bëndan Nasien-batsi, a barica bacints bukun kë cikëndën bukul.

²⁶ Ucar umënts wun, utsia siintsar mak, a ujuundi kato lëga-lëga. A tsi uyëk umënts wun, ilëman bëlieng waantsar, a mkorente pacësar tsi barica bëlieng.

²⁷ Uteeni nawaay tsi bëŋooy, a na win ilëman ukalabus waantsar, na cuati ulaac pa pëfiŋar, par aja ne barica bëër.

²⁸ Maa, Pol kat përim aja: “Cats rolar uwutsëtsuël; wund aci tsi bëlieng.”

²⁹ Din a nawaay yep ulamp, na niaj ni pëcësa di bametsu, na yër tsi bërun Pol ni Silas, a nuu lënk.

³⁰ A na cil ani bukul utsand, na ja bukul: “Bawiak! Wee wi ka wun përo pa pëbuër?”

³¹ A ba jaul: “Wákan tsi Yeesu, Ajug, kë bëër, wi ni bañaan katou.”

³² A ba leentsul përim Ajug, nul ni ban ci biki bëlieng di katoul.

³³ A nawaay tsëpand bukul tsi uler umënts wun bërëm ee ñawës bukul mlupi; a uu ba, na mijana uyëk umënts wun, nul ni bayiicul bëlieng.

³⁴ Din, a na tsëpand bukul katoul, na tsoaran bukul bariala. Na ci ni ulílan mak undo awak tsi Nasien-batsi, nul ni bañaan katoul bëlieng.

³⁵ Bi unu jënts bi, a bawat-pëleents yëli bapulis pii ja nawaay ukalabus: “Wëtani bañaan biki.”

³⁶ Nawaay ukalabus leents Pol ko wan, ajaul: “Bawat-pëleents aja nda wëtanaa; inkri, nda yil pëpën ndë tsëp ni pëfac.”

³⁷ Maa, Pol ja bukul: “Bu watats wund pëleents, a ba tsu wund wund tucana tsi këkës bañaan, wund ban ci biki bañaan Rooma! Ba guts wund di ukalabus a uu ba, bu ka wëtan wund, wund tsëp tsi kambeku? Nin a, ba bili bërier bukul bee ba pënan wund!”

³⁸ A bapulis tsëp ee leents bawat-pëleents irim yan. A bi bawat-pëleents me bi Pol ni Silas ci bañaan Rooma, a ba lënk mak.

³⁹ Din, a ba bi ee ñaan bukul pa ba jampësa bukul. A ba pënani bukul di ukalabus, ba ja bukul ba pën tsi përaasa.

⁴⁰ Bi Pol ni Silas pëni bi di ukalabus, ba tsëp kato Liidia; a ba win batsaar tsi Këristu, ba liinc-liincan bukul ngëwaas, a ba tsëp.