NGËRO 15 - KARÚK-PËRIM KAWALU Nouveau Testament

Bëjuk di Jerusalem

¹ A balon bañaan ban pëni biki Judeeya júŋee Antiookia, a ba kur pëjukan bafets Yeesu koo ja: “Uci nda welaatsa kambac, bi ulua-Moises tsu bi, nda ri ka yëlana pëbuër.”

² A Pol ni Barnabas tsij mantotëlër irim ni bukul, ni pëŋom pëwiak; a Ngëriisia baaraan Pol ni Barnabas, ni balon tsi Ngëriisia, pëtsëp Jerusalem di bapostolu ni bajëŋal, pii ñakanaan undo ko wan.

³ A Ngëriisia ñuatsan bukul, a ba par-na pëboos Feniisia ni Samaaria, a bu kë leents bi ban cits biki Bajudeu niiran bi Yeesu. A ko wan tsiji ulílan uwiak tsi bafets Yeesu bëlieng.

⁴ Bi ba band bi Jerusalem, a bapostolu, ni bajëŋal, ni Ngëriisia welan bukul uwar, a ba leents ngëko bëlieng ngi Nasien-batsi ro ngi ni bukul.

⁵ Maa balon tsi Bafariseu ban niiran biki Yeesu natsa, ba ja, ban cits bukunk Bajudeu a ba niiran Yeesu, bu ka ba roon bu ka welana kambac, bu ka tsua pëmob tsi ulua-Moises.

⁶ A bapostolu júk ni bajëŋal pa pëñakanaan uleka ko wan.

⁷ Bi u tsiji bi mantotëlër irim mwiak, a Per natsa, na ja bukul: “Batsaar ni nji, nda me Nasien-batsi jon ki na ratin ki tsi pëncuaf ind, pa ban cits biki Bajudeu pëteena përim Upetsan-uwar tsi nji, bu ka wak.

⁸ A Nasien-batsi, na mei ngëwaas bañaan, na piban na lílandër bukul bi na wël bi bukul Uwejats-ujënts buts pinja;

⁹ patsëlanatsi njani bukul; a tsi uwak, na jëntsan ngëwaas bukul.

¹⁰ Inkri, we ka wun a nduu teen-teenan Nasien-batsi, a nduu tsu bafets Yeesu pëniiran pëkues pi nin basini njanin n ja, niiraants pi pëkuesa.

¹¹ Maa, ngë fiaar u ci tsi bëtseend Yeesu Ajug tsi ngë bëërëna tsun, pi bukul buts.”

¹² A kandënd bañaan yëŋandar bëlieng, a bu kë cínkëndan Barnabas ni Pol, ban ci biki tsi pëleents ngëko ngan pikra n ngi, ni ngëpibanaani ngi Nasien-batsi roona ngi tsi iñan bukul, tsi pëncuaf ban cits biki Bajudeu.

¹³ Bi ba ba bi, Jakob jankma aja: “Batsaar ni nji, nda cikëndënin!

¹⁴ Simeon aleents bi Nasien-batsi cakës bi arat uwar tsi ngëcaak ban cits biki Bajudeu, bañaan biki kanduunaa biki katimul.

¹⁵ A ko wan yërëlër ni irim bayëlia, in pica yi aja:

¹⁶ ‘Upar ngëko ngan, ka witsee, ka kakan unkundan Dawid, ka yër ki, ka n leemp; ka leemp ucokara wul, ka kakan wul ka natsan.

¹⁷ Din, bañaan ban duka biki, bu ka tsas Ajug, bukul bëlieng ban cits biki Bajudeu, biki kan duunaa biki katim nji. Unk di Ajug ja run, nul nan doi ngëko ngi bëlieng,

¹⁸ ngan mea ngi ki uwal ujon.’

¹⁹ Wul ka wun, tsi bëwin nji, bañaan ban cits biki Bajudeu a ba niiran Nasien-batsi, ngë kaats pënooran bukul;

²⁰ maa, ngë picar bukul, pa pëja bukul ba rand mtsopi icap, ni bukul përand ngëko katúk-ufuts, ni përand përe ngëyamats ngëcaam ngan bota ngi itsúts a nga cäts, ni përand përe pëñaak.

²¹ Par, ulua-Moises aleentsaa ki uwal ujon tsi kara përaasa, a uu juka ri ito-ijuki tsi kara Unu-pënaakësa.”

Uletar un picara wi iriisia

²² Din, a bapostolu ni bajëŋal, ni Ngëriisia bëlieng, baaraan përat bayënts tsi bukul, bu ka yël bukul ni Pol ni Barnabas di Antiookia. A ba rat Judas ni ka n jakee Barsabas, ni Silas, bayënts ban rispitaara biki tsi bafets Yeesu.

²³ A ba pican ni iñan bukul aja: “Wund bapostolu ni bajëŋal, ban tsaar biki ni ind, wund awëli ind mboos, ind ban cits biki Bajudeu a nda niiran Yeesu, a nda ciina Antiookia, ni Siiria, ni Siliisia.

²⁴ Wund ate balon tsi wund, biki wund yëlatsi biki; bë ro bi ee ka nooran ind, a bu kë cok ind ngëwejats, tsi bëwejats bukul.

²⁵ Wund abaar pëloole a wund win u wara wund përat balon bayënts, wund ka yëli bukul ni bayiicnjaba ŋala biki, Barnabas ni Pol, pa ba bi tsi ind.

²⁶ Bukul, bë ci ban tsu biki ngëbiira bukul tsi bëjuats, undo Yeesu Këristu.

²⁷ Wund ayëli Judas ni Silas, bu kee leents ind ngëko ngan bërier bukul.

²⁸ Uwejats-ujënts, ni wund bërier wund, wund abaar pëloole pa përits tsu ind pëlon pëyunts, ucits ba ngëko ngan ka ngi përolaa.

²⁹ Nda randan përe nga n jakana ngi icap, ndë rand përe pëñaak, ndë rand përe ngëyamats ngëcaam ngan bota ngi itsúts a nga cäts, ndë randand ngëko katúk-ufuts. Uci nda rand ngëko ngëmënts ngi, nda ro uwar. Nda ciin uwar!”

³⁰ Bi ba patsësar bi, ba yëla biki juŋa tsëp Antiookia ee jukëlan Ngëriisia, ba wël bukul uletar.

³¹ Bi u jukaa bi, a ba lílan undo bi ba liinc-liincana bi ngëwaas.

³² A Judas ni Silas, bukul ban ci biki bayëlia, liinc-liincan bukul ngëwaas ni irim icumal, a ba tsënk bukul.

³³ A uu ro ngëwal, a batsaar ni bukul wëtan bukul ni pëfac pa ba tsëp di ba yëli biki bukul.

³⁴ Maa, Silas win u ciul uwar nul përuka rul.

³⁵ Pol ni Barnabas ruka di Antiookia, a bu kë jukan, bu kë leents Upetsan-uwar përim Ajug, ni balon bacumal.

Pol ni Barnabas, bë patsësar

³⁶ A u par ngënu, Pol ja Barnabas: “Ngë witsa pëwin batsaar ninjadi kara përaasa pi ngë leents pi përim Ajug, pa n ja pëwin bi ba ci bi.”

³⁷ A Barnabas ŋal pëtsëpand Joŋ, ni ka n jakee buts Marku.

³⁸ Maa, Pol win u yukats pëtsëpand kak ñaan nandoi patsësa bukul di Panfiilia, a cits ni bukul tsi uleemp.

³⁹ A u ka manteelarats mwiak tsi bukul, a ba patsësar tsi ba ci tsi; Barnabas jej Marku, a ba gija pëlutar Cipëri;

⁴⁰ a Pol rat Silas. A bafets Yeesu tergaar bukul tsi bëtseend Ajug, a ba tsëp.

⁴¹ A Pol yaana Siiria ni Siliisia, a nuu liinc-liincan iriisia.