NGËRO 14 - KARÚK-PËRIM KAWALU Nouveau Testament

Pol ni Barnabas di Ikooniu

¹ Di Ikooniu, Pol ni Barnabas niaj di kato-kajuki Bajudeu, a ba ñakan aa utsu bañaan bacumal mak wak, Bajudeu ni Bagërek.

² Maa, Bajudeu ba uwakats biki sualan ban cits biki Bajudeu a ba riabatsar bafets Yeesu.

³ Pol ni Barnabas ro rul ko un jon wi, bu kë ñakan ni bëyeentsal tsi uleka Ajug. Ajug baaraan pëpiban përim pi bu kë leents pi tsi uleka betseendul ci ucär; a na tsu bukul bu kë ro ni iñan bukul ngëpibanaani, ni ngëko ngan pikran ngi.

⁴ A bañaan përaasa tawësar; balon ci pa ujara Bajudeu, a balon ci pa ujara bapostolu.

⁵ Ban cits biki Bajudeu, ni Bajudeu baar pëloole ni bawiak bukul pa pënooran bapostolu, ni pëtap bukul ni ilaak.

⁶ A ba me ko wan, ba túk atsëp Liistra ni Deerbi, iraasa Likaonia ni ngëcaak ngan fay ngi Likaonia;

⁷ a ba leents Upetsan-uwar rul.

Nalab ayësana di Liistra

⁸ Di Liistra, aro ka nalon niints na bëkee nalab a na tsoari, ne te yandaar koon.

⁹ A na te Pol kë ñakan. Pol kaŋanul këkës, a na win na tsij uwak pa pëyësana;

¹⁰ na kat përim ajaul: “Natsaan nats ucol ni itsiimu!” A nalab cat, na yandaar.

¹¹ A indënd bañaan win ko wi Pol ro wi, a ba lie tsi pëleents bañaan Likaonia, aja: “Basien-batsi welee tsi pëncuaf nja tsi bënaam bañaan-bajin.”

¹² Bu kë ru Barnabas koo jaul Sës; a Pol, bu kë ruul koo jaul Ermes, par nul ci-un nabandan-përim.

¹³ Sës, wul un ka wi karum wul tsi pëlëman përaasa; natúl wul a tsiji ngëyët-ngëkas, ni ngëcape-pëtsiañ tsi ilëman përaasa. Par nul ni kandënd bañaan, bë ŋal përo ijakan pa Pol ni Barnabas.

¹⁴ Maa, bi Apostolu Barnabas ni Apostolu Pol te bi ko wan, a ba taw iŋi bukul, ba cat tsi pëncuaf kandënd bañaan, ba lië

¹⁵ aja: “Bayënts! We ka wun a ndu ro ko wi? Wund aci buts bañaan-bajin pi ind, wund kë wejats pi ind. A wund leents ind Upetsan-uwar, pa ind pëwëtan ngëko ngan kaats ngi bëkat, ndë witsësee pa Nasien-batsi nayësal na leempi batsi, ni utsia, ni bërëk, ni ngëko ngan ci ngi rul bëlieng.

¹⁶ Tsi ngëwal ngan par ngi, Nasien-batsi awët bañaan ban cits biki Bajudeu bëlieng ba fets iga bukul bërier bukul.

¹⁷ Bi u ci bank, Nasien-batsi wëtats pëpiban ko wi na ci wi bërierul, a nuu ro uwar, par aja na roon nuu wëtani ind usubal di batsi, ni mbuk mko tsi uwal mul, a na cuman ngëwaas ind bariala, ni ulílan.”

¹⁸ Ŋal bi ba ja bi irim yan, a u ci ni unoor wi ba laaŋëna wun indënd bañaan përo bëjakan pa bukul.

¹⁹ Maa, Bajudeu ban pëni biki Antiookia ni Ikooniu baandi ee sualan indënd bañaan, a ba tap Pol ni ilaak, ba puularul utsand përaasa, bë ja ne a cäts.

²⁰ Maa, bi bafets Yeesu fayul bi, na natsa aniaj përaasa. Tsi unu ucints, na pën ni Barnabas, atsëp Deerbi.

Pol ni Barnabas, bë witsa Antiookia Siiria

²¹ Bi ba ba bi pëleents Upetsan-uwar di përaasa pëmënts pun, ni pëtsu bacumal pëci bafets Yeesu, a ba witsa Liistra, Ikooniu, ni Antiookia Pisiidia,

²² ee liinc-liincan ngëwaas bafets Yeesu, ba tseend bukul ibats pa ba mob tsi uwak ba liincan; a ba piban bukul u ci tsi unoor uwiak winja kë niajëna wun pësien Nasien-batsi.

²³ Di kara Ngëriisia, ba ratar bukul bajëŋal, a uu ba, ba ñaan abër mlik, a ba tergaar bukul tsi iñan Ajug, ni ba uwaki.

²⁴ A bapostolu par-na tsi Pisiidia atsëp Panfiilia.

²⁵ Ba leents përim di Pergi a uu ba, ba tsëp Ataalia.

²⁶ Dul, a ba paat alutar Antiookia Siiria, di ba ro ri tanan tsi bëtseend Nasien-batsi pa uleemp wi ba ru ba përo.

²⁷ Bi ba band bi Antiookia, a ba jukëlan bañaan Ngëriisia, ba leents bukul ngëko ngi Nasien-batsi ro ngi ni bukul, ni bi na waants bi ban cits biki Bajudeu pëlëman uwak.

²⁸ A ba ruka rul aro uwal un jon wi, ni bafets Yeesu.