NGËRO 13 - KARÚK-PËRIM KAWALU Nouveau Testament

Ngëriisia ayël Barnabas ni Sol

¹ Di Ngëriisia Antiookia, aka rul bayëlia, ni bajukan: aci Barnabas, ni Simeon ni ka n jakee buts Niger, ni Lusiu kanpënë-ni Sireeni, ni Manayen, nan kusee tsëloole ni Eroodis nasien kajara Galileeya, ni Sol.

² Bi ba ci bi tsi përëmban Ajug a ba bërand mlik, Uwejats-ujënts ja: “Nda patsandi Barnabas, ni Sol, pa uleemp wi duuri wi bukul.”

³ Bi ba ba bi kabër-mlik, ni bëñaan, a ba paf bukul iñan, ba wëtan bukul ba tsëp.

Barnabas ni Sol, bë band Cipëri

⁴ A Uwejats-ujënts yël bukul, a ba tsëp Seleusia. Dul, a ba paat alutar Cipëri.

⁵ Bi ba band bi Salamiina, a ba leents përim Nasien-batsi di ito-ijuki Bajudeu. A ba ro tsëpand buts Joŋ, pa pëci natsënk bukul.

⁶ A ba par-na unjiu bëlieng te di Pafus, ba win nalon napene, nan ci nayëlia natsup; aci Najudeu, a nuu jaka Bar-Yeesu.

⁷ Aciina kabëuru ki Serjius Pol sien ki, nul niints nalipal. Serjius rui Barnabas ni Sol, par aŋal pëte përim Nasien-batsi.

⁸ Maa Eliimas, napene, (par wul wi katimul pac wun), ŋalats ko wi bu kë ro wi; a nuu tsas pëwitsës uwak nasien.

⁹ Din, a Sol ni ka n jakee buts Pol, cum ni Uwejats-ujënts, a na kaŋanul këkës,

¹⁰ na ja: “Abuk Ujabël, nan cumi ni ngëko kafal, ni kawaraatsa bëlieng, nabër ko u mab wi; m di kë wëtan pëwítsës iga Ajug imabal-a?

¹¹ Inkri, kañan Ajug aci tsi ruëtsu, kë ci nakuël, m di kë win unu te ulon uwal.” Tsi uyëk umënts wun, katse win ko, a na ci tsi karëm. A nuu witsësar tsi na ci tsi, koo tsas ni ka mobëli kañan në tsëpand.

¹² A bi nasien win bi ko un par wi, na wak tsi Yeesu, a na pikra tsi bëjukan Ajug.

Barnabas ni Sol, bë band Antiookia Pisiidia

¹³ A Pol ni bacintsul pën di Pafus, a ba paat aband Pergi di pëboos Panfiilia. Maa, Joŋ patsësa bukul a na witsee Jerusalem.

¹⁴ Maa bukul buts, ba par-na Pergi aband Antiookia di pëboos Pisiidia. A tsi ulon Unu-pënaakësa, ba niaj ee tsoar di kato-kajuki.

¹⁵ Bi ba ba bi bëjuk ko un pica wi tsi Utsua, ni tsi ko wi bayëlia pic wi, a bawiak kato-kajuki ja bukul: “Batsaar ni wund, uci nda ka pëlon përim pa pëliinc-liincanaan ngëwaas bañaan, nda ñakani pul.”

¹⁶ A Pol natsa, na taar bukul kañan pa ba yëŋandar, na ja: “Bayënts Israel, ni ind ba lënk biki Nasien-batsi, nda cikëndëni-e!

¹⁷ Nasien-batsi bañaan Israel biki, arat basin nja a na riang bañaan bi ba ci bi batsooŋ di pëboos Ejipët; maa, na pënani bukul rul ni pëyëlanul.

¹⁸ A na miira bëci bukul bi kawaraatsa, tsi ko un duakan wi ngëwaanu ngëntaaja ngëbaakër di ulaalats.

¹⁹ Bi na ba bi ni ngëcaak paaj ngun ni ulon, ngi ban cits biki Bajudeu, di pëboos Kanaan, a na wël bukul pul pa ba rukanda.

²⁰ Ko wan bëlieng aro ngëwaanu ngan duakan ngi ngëseent ngëbaakër ni ngëwaanu ngëntaaja kañan. A uu ba, Nasien-batsi wël bukul bawat-pëleents te tsi uwal Samuel, nayëlia.

²¹ Din, a ba yep nasien, a Nasien-batsi wël bukul Sol, abuk Kis, nan pënë-nii pëbuka Be n jamin; na sien aro ngëwaanu ngëntaaja ngëbaakër.

²² Bi na pënan bi Sol, na natsandari bukul Dawid na ci nasien, nul ni Nasien-batsi ñakandari buts ulekaul aja: ‘Man win Dawid abuk Jese, niints nan ci pi uwaas nji, ni kan doi uŋal nji bëlieng.’

²³ Tsi pëbukaul tsi Nasien-batsi pënandari tsun Israel Nabuëran, un ci wi Yeesu, bi na ro bi watsan.

²⁴ Aruka ka baandi, a Joŋ cakës aleents bañaan Israel bëlieng uleka bëmijan kayaar-ibats.

²⁵ Maa, bi Joŋ kë bandan bi uleempul a na ja: ‘Yën ni nda wejats un pëja man ci? In citsul; maa, nalon ka bi tsi ufets nji, in tsënkaants pëjaa man pac iraala itsiimul.’

²⁶ Batsaar ni nji, ind pëbuka Abraam, ni ban ci biki tsi pëncuaf ind ba lënk biki Nasien-batsi, ja wëlee bukun përim pëbuër pi.

²⁷ Bañaan ban ci biki di Jerusalem, ni bawiak bukul bë meets ko Yeesu ci wi, bi ba lacanul bi, ba bandan irim bayëlia nja yi i roon, i ru jukaa tsi kara Unu-pënaakësa.

²⁸ Ŋal bi ba winats bi ko ulon wi kan tsuul wi na fiŋa, ba yep Pilaatus na tsuul na fiŋa.

²⁹ Bi ba ba bi pëbandan ko un picana wi bëlieng tsi ulekaul, ba welaniul di pëmul ee tsuul di pëbëk.

³⁰ Maa, Nasien-batsi natsaniul di bacäts,

³¹ a ban do bukunk ci ni nul di Galileeya pa Jerusalem, winul ngënu ngëcumal; a inkri, tsi bërun bañaan, bukul ci bukun ba maatir biki ngiicul pa pëleents bañaan.

³² Wund aci tsi pëleents ind Upetsan-uwar u watsana wi basin nja

³³ bi Nasien-batsi bandan bi wul tsi nja babukul, bi na natsanii bi Yeesu di pëcäts, bi u picana bi buts di Uya-ubëndan utëbantsan aja: ‘Wi ci-un Abuk nji; ntsari man bëku.’

³⁴ Nasien-batsi anatsaniul di bacäts, pa yaas a në nooy, wul ka wun na ja: ‘Mán wël ind ngëwar ngi watsan ngi Dawid, ngëyëman, ngan fiaara ngi.’

³⁵ Wul ka wun na ja buts di ulon Uya-ubëndan: ‘M di kë wët Nayëmanu na nooy.’

³⁶ Par tsi ucär, Dawid tsi uwalul, aleemp tsi uŋal Nasien-batsi, na cäts a na mooya tsëloole ni basinul, a uliaful nooy.

³⁷ Maa, ni Nasien-batsi natsani unk di pëcäts, uliaful nooyats.

³⁸ Batsaar ni nji, nda ka pëme u ci tsi Yeesu tsi nda leentsënaa tsun përim kajampësa ngëjuban; a tsi ngëko bëlieng ngi ulua-Moises yëlants ngi pëtsu ind bamabal,

³⁹ tsi nul, na waki ba këwak atsua namabal.

⁴⁰ Nda roon bëwaar pa ko wi bayëlia ro wi ja urits baandë-ni ind:

⁴¹ ‘Nda teenan-e, ind batsuuts-ñaan-ko! Nda pikraan, nda niaman! Par tsi ngënu ind, mándo uleemp, uleemp wi nda rits wi ka fiaar, uci ñaan leents ind.’”

⁴² Bi bu kë pëni bi di kato-kajuki, a ba ñaan Pol ni Barnabas pa ba kaka ñakan irim imënts yun, tsi Unu-pënaakësa wi kan bi wi.

⁴³ Bi bëjuk garandar bi, Bajudeu bacumal, ni ba niiran biki bëga Bajudeu a ba lënk Nasien-batsi, fets Pol ni Barnabas; a Pol ni Barnabas kë ñakanaan bukul a bu kë tsu bukul ba niiran pëtambandar tsi bëtseend Nasien-batsi.

⁴⁴ Tsi Unu-pënaakësa ucints, anats pi aci bañaan përaasa bëlieng bi bukun ee júk pa pëcikëndën përim Ajug.

⁴⁵ Maa, Bajudeu kë win indënd bañaan, ba cum ni mankocar, bu kë ñakan irim ikar koo pok ko wi Pol kë ja wi.

⁴⁶ Din, Pol ni Barnabas ñakanaan bukul ni bëyeentsal, aja: “Ind ka bukun pëleentsa përim Nasien-batsi ucak; maa, bi nda bër bink pul, a nda wejats bërier ind pëja nda tsënkaants pëyank ubiira un dits wi ka ba, inkri wund ka witsësa pa ban cits biki Bajudeu.

⁴⁷ Par, unk di Ajug wund wël wund run ulai aj: ‘Man tsuu ufac ci pa ban cits biki Bajudeu, pa wi pëtsëpand pëbuër te di untsañi ucaak.’”

⁴⁸ A ban cits biki Bajudeu kë te ko wan, ba lílan a ba ci tsi përëmban përim Ajug; a ban do biki jaakara ubiira un dits wi ka ba, wak bëlieng.

⁴⁹ A përim Nasien-batsi laar ajëk ucaak.

⁵⁰ Maa, Bajudeu sualan bakaats ba lënk biki Nasien-batsi a ba ciind ban dëmbana biki, ni bawiak përaasa, a ba natsara pënoor-nooran Pol ni Barnabas, ba ruak bukul di pëboos bukul.

⁵¹ A Pol ni Barnabas raafar bukul kandëpe iyots bukul, ba pën atsëp Ikooniu.

⁵² Maa, bafets Yeesu ban ci biki di Antiookia, cum ni ulílan ni Uwejats-ujënts.