NGËRO 12 - KARÚK-PËRIM KAWALU Nouveau Testament

Pënoor-noorana kak

¹ A tsi uwal umënts wun, Eroodis, nasien kur pëmob balon bañaan Ngëriisia koo noor-nooran.

² Na tsu Jakob, nan tsaari ni Joŋ, na fiŋënaa ulaac.

³ A na win ko umënts líl Bajudeu, na kaka wejats pëmob buts Per; aro ci-unu kare-upom un tsijats wi bëko-bëlëntëntsaani.

⁴ Bi na mobul bi agutsar ukalabus, ba tsu itawar ibaakër yi bawaayul, kara ngërúp a tsij basondaari babaakër; aro ŋal pii pibanul tsi bërun bañaan, upar ngënu Ufesta-pëbuër.

⁵ Unk a Per ríca di ukalabus, maa, bañaan Ngëriisia wëtanats pëtambandar pëñaan Nasien-batsi pa nul.

Per apënanee di ukalabus

⁶ Bi Eroodis kë yecis bi pii biindiul tsi bërun bañaan, tsi bërëm bëmënts bun, Per tanaa ni këkorenti këtëb a nuu ŋooy tsi pëncuaf basondaari batëb, a bawaay ci tsi pëlëman, bu kë waay ukalabus.

⁷ Maa, ulon uwaanju Ajug baandi, a ufac fiets di ukalabus; a uwaanju kërara Per tsi kabuuru a wambël, u jaul: “Natsaan ucar!” Din, a mkorante pën tsi iñanul ayër.

⁸ A uwaanju jaul: “Tanan katël, kë tsu iraala.” A na ro unk. A u jaul kak: “Waan kapantu, kë fetsin.”

⁹ Din na pën afets wul, meets ne ko wi uwaanju tsuul wi përo aci ucär; maa, na ja ne aci bëlon bëwinal.

¹⁰ Bi ba par bi nawaay nacak, ni natëbantsan, a ba band di pëlëman ifeeru, pan cil pi përaasa, a pa waantsar bërier pul. Ba pën, ba yandaar a bu kë ba urawa, uyëk umënts a uwaanju patsësaul.

¹¹ Din, a uwejats Per witsee tsi nul, a na ja: “Inkri man me, tsi ucär, Ajug yëli un uwaanjuul, a u buëranin tsi iñan Eroodis ni ko wi bañaan-ucaak Bajudeu ro wi ka lip bëlieng.”

¹² Per yëkëran bi ko wi na ciina wi, na tsëp kato Maaria, anin Joŋ ni ka n jakee Marku, di bañaan bacumal juk ri a bu kë ñaan.

¹³ Bi na kob-koban bi pëlëman pëbëëm, a nalon nampëli naleemp, ni ka n jakee Rode bi pii cikëndën ñaan namënts;

¹⁴ a nu yëkëran përim Per, na lílan mak, te waantsatsul pëlëman na niaj, maa na túk awitsa ee leents bañaan Per ci tsi pëlëman.

¹⁵ A ba jaul: “M cits uwar, wi!” Maa, na piaka tsi pëja aci ucär. A ba ja: “Aci uwaanjuul.”

¹⁶ Maa, Per wama ka kob-koban; bi ba waants bi pëlëman, ba winul, a ba lënk.

¹⁷ Maa, a na wiil bukul kañan pa ba yëŋandar, na leents bukul bi Ajug pënaniul bi di ukalabus, a na ja: “Nda leentsan Jakob ko umënts wi, ni batsaar ni inja.” A na pën tsul atsëp ulon uburu.

¹⁸ Unu kë fa, a u ka mantotëlër mwiak tsi pëncuaf basondaari, undo ko un par-na wi Per.

¹⁹ Bi Eroodis tsasul bi a winatsul, na yepar bawaay, a uu ba, na tsu bukul ba fiŋaa. Eroodis pën di Judeeya atsëp Seesareeya, na ro rul ngënu.

Pëcäts Eroodis

²⁰ Eroodis ro riabatsar mak ni bañaan Tiiru, ni biki Sidon. Maa, ba baar pëloole, pii bi tsi nul. A ba kaaya Bëlaastu, nan ci naleemp di kato nasien, a ba ñaan Eroodis ba ro pëfac, par pëboos bukul ka yankëna ngëko bariala di pëboos nasien.

²¹ Tsi unu un tsua wi, a Eroodis tiema iŋi pësien a na tsoar tsi pëtsoari kawat-pëleents, a na ñakanaan bañaan bëlieng.

²² A bañaan kë lië koo ja: “Pi, aci përim nalon nasien-batsi, cits pi ñaan-najin!”

²³ Tsi uyëk umënts wun, ulon uwaanju Ajug kob Eroodis, undo bi na rëmbanats bi Nasien-batsi, a ngëkuc reul, na cäts.

²⁴ A tsi uwal umënts wun, përim Nasien-batsi ru pe këpe pëwiaka ni pëlaar.

²⁵ Bi Barnabas ni Sol ba bi përo uleemp, ba pën di Jerusalem pëwitsa. A ba tsëpand Joŋ, ni ka n jakee Marku.