NGËRO 1 - KARÚK-PËRIM KAWALU Nouveau Testament

Bapostolu atsana Uwejats-ujënts

¹ Teofilu! Man pican ulibëru nji ucak a n leents ngi Yeesu juund ngi përo bëlieng ni pëjukan,

² te unu wi na tsëpanda wi batsi, bi na ba bi pëwël bapostolu ngëtsua tsi pëyëlan Uwejats-ujënts, bukul biki na rat biki.

³ A tsi bamënts biki buts a na pibandar na kak aci nayësal, ni ngëpiban gëcumal bi na ba bi unoor, a nuu cili tsi bukul tsiun ngënu ngëntaaja ngëbaakër gun, a nuu ñakan ngëko pësien Nasien-batsi.

⁴ Bi na ci bi tsi bariala ni bukul, na ja bukul: “Ind tsë pën tsi Jerusalem; nda lipan ko wi Asin watsan wi, a nda te wul tsi mtum nji.

⁵ Par Joŋ amijanaan mlik, maa ind, tsini ngënu ngi, ndu mijana di Uwejats-ujënts.”

Yeesu tsëpanda batsi

⁶ Din, bukul ban juk biki yeparul aja: “Ajug, ka ci uwal wi; wi kë kakan wun pësien Israel natsan-a?”

⁷ Na yankës bukul aja: “Nda kaats pëme ngëwal oo ngënu ngi Asin tsu ngi, tsi pëyëlanul bërierul.

⁸ Maa ndu yank pëyëlan, uwelee Uwejats-ujënts tsi ind, din ndë ci bamaatir ngëmíñ, di Jerusalem, unk buts di Judeeya bëlieng, ni di Samaaria, te di ngëntsañi umundu.”

⁹ Ubaul pëja irim yan, a bu kë teenul, a nu tsëpanda ruets, a kasa bi ee kúndul tsi këkës bukul.

¹⁰ Bi ba wama bi kaŋan këkës di batsi bi Yeesu kë tsëpanda bi, bayënts batëb ban tiema biki iŋi ifaacal cili tsi kawok bukul;

¹¹ a ba ja: “Bayënts Galileeya, we ka wun nda nats a nduu teen batsi? Yeesu, nul nan jeja ink tsi pëncuaf ind atsëpanda batsi, unk ri nu witsee run bi nda winul bunk a nuu tsëpanda batsi.”

¹² Din, a ba pën di untunda wi ka n jaka wi, Mëoliiwa u ci wi tsi ka wok Jerusalem, ba witsa Jerusalem.

¹³ Bi ba niaj bi përaasa, a ba paiya pëfër përuets di ba ro ri ka jukëna; aci Per ni Joŋ, Jakob ni Andëre, Filip ni Tomaas, Bartolomeu ni Mateu, Jakob abuk Alfeu, ni Simon nakamandar ucaakul, ni Judas abuk Jakob.

¹⁴ A ba baar bëlieng pëloole a bu kë mob tsi bëñaan, ni balon bakaats, ni Maaria anin Yeesu, ni ban tsaar biki ni nul Yeesu.

Matias ayank pëlas Judas Iskarioti

¹⁵ Tsi ngënu ngëmënts ngun, Per natsa tsi pëncuaf ban tsaar biki ni nul, ban juk biki aci ko pi bañaan useent ni ngëntaaja ngëtëb, a na ja bukul:

¹⁶ “Batsaar ni nji! Ko un jaka wi di Bëpican, aka përolaa, bi Uwejats-ujënts tsu bi Dawid a na car ñakan tsi uleka Judas, nan ci bëga bi ba mob biki Yeesu par-na bi.

¹⁷ Par nul, aro pina tsi nja a na ro ka kafaul tsi uleemp wi.”

¹⁸ A inkri Judas weelna bërig bëluk kamabatsul, na júŋee ayëri, a na tawa tsi pëncuaf, a ipësul garee bëlieng.

¹⁹ Bañaan bëlieng ban ciina biki Jerusalem bi me ko wan. Wul ka wun, tsi ulíingu bukul, bërig bëmënts bun kë jaka Akelëdama, un ci wi, bërig-pëñaak.

²⁰ “Par, iink di u picana run di ulibëru Uya-ubëndan, aja: ‘Katoul; ka rukan kajënts; ñaan tsë ci di kul.’ A u kaka jaka: ‘Nalon na yankan uleemp wi na ro wi tsua.’

²¹ Bi u ci bank, awara u roon, tsi bayënts ban do biki ci ni nja uwal bëlieng, wi Yeesu Ajug kë yandaar wi tsi pëncuaf nja

²² pëkur-ni tsi bëmijan Joŋ, te tsi unu wi Yeesu tsëpanda wi ruëts, nalon tsi bukul aka pëci ni nja tsi puu leents uleka pënatsee Yeesu di pëcäts.”

²³ Din, a ba piban batëb: Juse ni ka n jakee Barsabas, a nuu jakaa kak Justus; ni Matias.

²⁴ A ba ñaan aja: “Wi Ajug, na mei ngëwaas bañaan bëlieng, pibani ni m dati tsi batëb biki,

²⁵ pa na yank pëlas tsi uleemp wi ni tsi kayëlia, pi Judas wëtan pi a na tsëp tsëko tsan ci tsi tsíicul.”

²⁶ Ba júgatsar bukul iko, a kako yër tsi Matias, din a na pinanda ni bapostolu untaaja bukun ni naloole.