MATEU 7 - KARÚK-PËRIM KAWALU Nouveau Testament

Pëwat ñaan pëleents

¹ Ind tsë wat ñaan pëleents, din nda rits wata pëleents.

² Bi nduu wat bi bañaan pëleents, unk di nduu wata run pëleents buts. Kaniibi ki nduu niibëna ki, kee niibëna ind kun buts.

³ We ka wun kë teen kako kan ci ki di pëkës ni nda tsaari, te m winats pëmul pan ci pi di pëkësu?

⁴ Um bi kë ja bun ni nda tsaari: ‘Lipan-e mán pënani kako di pëkësu, te pëmul ci aatsum di pëkësu?’

⁵ Ko wi m ci wi nanguungu! Pënani bërun pëmul di pëkësu, din kë win bi kë pënan bi kako kan ci ki di pëkës ni nda tsaari.

⁶ Ind tsë ngëbuus ko u yëman wi, a te ind tsë gutsar ngënkëmbe ilaants ind. Uci nda ro ank, ngë poos-poosan yul a nguu ba, ngë witsësëra ind ka tawës-tawësan.

Bëyep

⁷ Nda yepan, ndë wëla; nda tsasan, ndë win; nda kob-kobani, pëlëman ka waantsa ind.

⁸ Par, na yepi, në wëla; nan tsasi, në win; a nan kob-kobani, pëlëman ka waantsaul.

⁹ Naom ñaan tsi ind, ni abuk kë yep un pëpom, u ci pëlaak pi në wëlul pun?

¹⁰ Oo në yepul utsëb, në wëlul uko-pëtsats-a?

¹¹ Ind ba waraatsa biki, ande nda me aatsum pëwël upäts ind ngëko ngëwar; a nda me koon, Asin ind nan cii di batsi, ka wël biki ka yepul biki ngëwar!

¹² Ngëko bëlieng, ngi nda ŋal ngi bañaan përo ind, nda rori bukul ngul buts, par unk di ulua-Moises ja run, ni bayëlia.

Pëlëman pan kats pi

¹³ Nda niajëni tsi pëlëman pan kats punk, par pëlëman pëwaanal pun ni bëga bëwiak bun ka niaman ñaan; a bañaan bacumal kë niajëna tsi bul.

¹⁴ Maa pëlëman pan kats punk, ni bëga buñíkëtsuel bun ka tsëpand ñaan pa ubiira; bapar tsi bul cumats.

Bëko, ni mbuk bul

¹⁵ Nda rukan ibats tsi bayëlia batsup; bi bu bi bi tsi ind ni kawara urafaal; maa di bametsu bukul, bë ci ngënjurtu ngëjuatsal.

¹⁶ Nduu yëkëraan bukul tsi ngi bu kuu ro ngi. Ñaan a yëlan pëmar mbuk bëbiiñu tsi buwuul iyu-a? Oo pëmar mbuk bëfiigu bëkungul tsi bëŋoñu-a?

¹⁷ Unk, bëko bëwar, ka buk bun mbuk mwar; a bëko ba waraatsa bi, ka buk bun mbuk ma waraatsa mi.

¹⁸ Bëko bëwar, yëlants pëbuk mbuk ma waraatsa mi; a bëko ba waraatsa bi, yëlants pëbuk mbuk mwar.

¹⁹ Bëko ban bëkats bi mbuk mwar, ka kënta bu gutsara bërua.

²⁰ Unk, tsi ngi bu kuu ro ngi, tsi nduu yëkëraan tsun bukul.

Bafets Yeesu bacar

²¹ Cits biki ka n jain biki blieng: ‘Ajug, Ajug!’ Ka niaj bukun pësien batsi, maa aci ni kan doi uŋal Asin nji nan cii di batsi.

²² Tsi unu umënts, bañaan bacumal koo jain: ‘Ajug, Ajug! Wund carats iink aleents përim tsi katimu-a? A wund ruakats iink ngëcaay tsi katimu-a? A wund roots iink ngëko ngëcumal ngi bawitsa tsi katimu-a?’

²³ Din, ka ja bukul tsi ko un jënts wi: Nji n meets ind yaas; nda lawanin, ind baro ngëko kamabats!

Baniew batëb ban bofats biki pëniew

²⁴ Wul ka wun, nan cikëndëni irim nji yi, a nuu ro ko wi n ja wi, në ci pi nalipal na niewi katoul tsi ilaak;

²⁵ a usubal subi, a uwëk-wëk bi, a ufuts natsee ee yërand kato kamënts kun, maa kato yërats, par ujuundi kul aci tsi ilaak.

²⁶ Maa, nan cikëndëni irim nji yi, a roots ko wi n ja wi, në ci pi nafuur na niewi katoul tsi kayii;

²⁷ a usubal subi, a uwëk-wëk bi, a ufuts natsee ee kob kato kamënts kun, a kato yër, a ka gara-gara.”

²⁸ Bi Yeesu ba bi pëleents ko wan, a indënd bañaan pikra tsi bëjukanul.

²⁹ Par, ka jukan pi aka pëyëlan, cits bi bapican-ulua ja bi ba roon bu kë jukan.