MATEU 4 - KARÚK-PËRIM KAWALU Nouveau Testament

Yeesu ateen-teenana

¹ Din a Uwejats-ujënts tsëpand Yeesu ulaalats, pa Ujabël pii teen-teenanul.

² A bi na bër bi mlik aka kënak ngëntaaja ngëbaakër, ni ngërëm ngëntaaja ngëbaakër, a na ru bonats.

³ A nateen-teenan kika awokul, a na jaul: “Uci bi m ci bank Abuk Nasien-batsi, jaan ilaak yi i witsa upom.”

⁴ A Yeesu yankës, aja: “Ko wi, picana wun: Cits bariala rin ka bun ñaan kë yafënts, maa kara përim pan pëni pi di mtum Nasien-batsi.”

⁵ A Ujabël tsëpandul te di përaasa pëyëman, a u jutanul di ruets kato-kayëman,

⁶ a u jaul: “Uci bi m ci bank Abuk Nasien-batsi, jucan-e di utsia, par ko wi picana wun: ‘Ka ja ngëwaanjuul përim, ulekau, din ngë jaabu tsi iñan ngul, pa pëtsiimu rits júnk pëlaak.’”

⁷ Din a Yeesu ja : “Ko wi buts, picana wun: ‘Cäts teen-teenan Ajug, nul nan cii Nasien-batsiu.’”

⁸ A Ujabël tsëpandul kak, te di ruets untunda uyampal mak, a u pibanul msien bëlieng tsi umundu ni përëmb mul,

⁹ a u jaul: “Ngi bëlieng, ma welu ngul, uci m yër m jintëlain.”

¹⁰ A Yeesu ja : “Pënan tsi, wi useetaani, par ko wi picana wun: ‘Jintëlaan Ajug, nul nan cii Nasien-batsiu, kuu bëndanul, nul koorul.’”

¹¹ Bi Ujabël kikoul bi, din a ngëwaanju bi ee ka këmandul.

Yeesu di Galileeya

¹² Bi Yeesu te bi u jaka Joŋ arica, a na witsa Galileeya.

¹³ Apën di Nasaret, a na tsëp ee ci di Kafarnaum, untab un ci wi tsi kambaŋ bërëk, tsi kajara pëboos Sabëlon ni pëboos Neftali.

¹⁴ Aro ank, pa u ci bi Isaaya nayëlia ja bi:

¹⁵ “Pëboos Sabëlon ni pëboos Neftali, kajara pëya bërëk, tsi kalutar Jordan, Galileeya bañaan ban cits biki Bajudeu!

¹⁶ Bañaan bando biki ci tsi karëm, bu win ufac uwiak; bando biki ci di mcäts a pëcäts límëntsan bukul, ufac afietsi bukul.”

¹⁷ Pëkur tsi uwal umënts wun, a Yeesu jot pëleents përim, a nuu ja: “Nda yaari ibats, par pësien batsi awokani.”

Yeesu ajot përui bafetsul

¹⁸ Bi Yeesu kë yandaar bi tsi kambaŋ bërëk Galileeya, a na win tsul bañaan batëb ban tsaar biki, aci Simon, ni kanjakee Per, ni ni ba tsaari, Andëre, a bu kë guts itseenk di bërëk, par bë ci bábuets.

¹⁹ A Yeesu ja bukul: “Nda fetsin, ka tsu ind pëci babuets bañaan.”

²⁰ Tsi uyëk umënts wun, a ba bër itseenk, a ba fets Yeesu.

²¹ A na kikara bërun, a na win balon batëb kak, ban tsaar biki; aci Jakob abuk Sebede, ni atsaul Joŋ. Bu ci di kanawa, ni Sebede asin bukul, a bu këyecës itseenk bukul. A na ru bukul.

²² Tsi uyëk umënts wun, a ba ruk asin bukul, ni kanawa, a ba fets Yeesu.

Yeesu ajukan indënd bañaan, a na yësan bamoj

²³ Yeesu kë yaana Galileeya bëlieng, nuu jukan di ito-ijuki bukul, nuu leents Upetsan-uwar uleka pësien batsi, nuu yësanaand maak bëlieng, ni basal ban ci bi ba këci tsi bañaan.

²⁴ A katimul jëk ucaak Siiria bëlieng. A bañaan kë rëŋaniul bamoj bëlieng, ba maak biki gëkorar mmaak bëlieng a ba tsijar mak ni ngëliaf bukul: Biki ngëcaay niaj biki, ni bacäts-bëcäts ni balab; a Yeesu yësan bukul bëlieng.

²⁵ A indënd bañaan kë fetsul, ban pëni biki Galileeya, ni Dekapolis, ni Jerusalem, ni Judeeya ni biki kalutar kabulaŋ Jordan.