MATEU 28 - KARÚK-PËRIM KAWALU Nouveau Testament

Yeesu anatsee di bacäts

¹ Upar Unu-pënaakësa, a unu ucak kanëm kë joti, a Maaria kanpën-ni Magëdala, ni Maaria mcínts, tsëp kateen pëbuk.

² Ucar umënts wun a utsia siintsar mak, par aka uwaanju Ajug un pëni wi di batsi awelee, a u bi ee kël pëlaak apënan, a u tsoar tsi ruets pul.

³ Bënaam aci pi kalikajan, a kaŋí faac pi imuets-ibeñ.

⁴ A bawaay lal a ngëliaf bukul kë lënk, a ba ruka ci pi bu cäts.

⁵ Maa, a uwaanju ja bakaats: “Ind, ind tsë lal, par man me nda ci tsi pëtsas Yeesu, nul nandoi rieŋa di kruus.

⁶ Nul cits tsi; par anatsee di pëcäts, bi na ro bunk ja. Nda bili, da teenan tsëko tsi na ro tsi piintsana.

⁷ Nda tsëpan tsi ko un car wi, ndii leents bafetsul na natsee tsi bacäts. Nul, ayër ind bërun pëtsëp Galileeya; dul di ndu winënul run. Nji n leents ind ank.”

⁸ Din a ba lënk a ba ciind ni ulílan uwiak; a ba pën di pëbuk ucar umënts wun, a ba túk pii leents bafetsul.

⁹ Din a Yeesu jëk ni bukul, a na ja: “Nda ciin tsi pëfac!” A ba bi ee wokul, a ba wúnkaraul iyots, a ba jintëlaul.

¹⁰ A Yeesu ja bukul: “Ind tsë lënk; nda tsëpan ndii ja ban tsaar biki ni nji, ba tsëp Galileeya; dul di bu kë winënindun.”

¹¹ Bi bu kë tsëp bi, din a balon tsi bagaarir baandi përaasa, a ba leents bawiak-bajakan ngan par ngi bëlieng.

¹² Bi bawiak-bajakan júk bi ni bawiak Bajudeu a ba baar pëloole, a ba wël basondaari uncaam un kës wi mak.

¹³ A ba ja bukul: “Nda jaan: ‘Bafetsul abi bërëm, a ba kiej puumul, bi wund ci bi tsi bëŋooy.’

¹⁴ A uci na tsijëna-ucaak bi te ko wan, wund ka ñakan ni nul te në niiran, din wund ka randan ind unoor.”

¹⁵ A ba yank uncaam, a ba ro bi ba jukana bi. A përim pëmënts pan kë leentsa tsi Bajudeu, te unu untsari.

Kayëlia kawiak

¹⁶ Maa a bafetsul, untaaja bukun ni naloole pën pëtsëp Galileeya, di untunda wi na ro wi ja bukul.

¹⁷ A bu kë winul, a ba jintëlaul; maa balon tsi bukul tsij ngëwejats ngëtëb.

¹⁸ Din a Yeesu kikee, a na ñakanaan bukul, aja: “Pëyëlan pan ci pi-ba këci, awëlain di batsi, ni tsi utsia.

¹⁹ Bi u ci bank, nda tsëpan, ndë tsu bañaan ban cits biki Bajudeu bëlieng pëci bafetsin; nda mijani bukul di katim Asin, ki Abuk, ni ki Uwejats-ujënts;

²⁰ nda jukani bukul puu mob tsi ngi n tsu ind ngi, ngul bëlieng. Nda teenan-e, mán ci ni ind ngënu bëlieng, te uba umundu.”