MATEU 27 - KARÚK-PËRIM KAWALU Nouveau Testament

Yeesu apënanda pëtsëp di Pilaatus

¹ Ujënts unu, bawiak-bajakan ni bawiak Bajudeu bëlieng baar pëloole tsi uleka Yeesu pë pëfiŋa.

² Bi ba tanul bi, a ba tsëpandul ee gutsarul Pilaatus, nan tsij-ni-pëboos.

Judas afiŋar

³ Bi Judas, nul nan gutsuli, win bi Yeesu lacana, din a na ru yaar ibats, a na kakan bawiak-bajakan ni bawiak Bajudeu, ngëntaaja ngëwaants ngun, ngi uncaam-utsak;

⁴ a na ja: “Ma ndo ujuban, par ma n tsu na lacätsi pa na fiŋa.” Maa a ba yankul aja: “Mtúm wund we tsul? Wi ruka un m me!”

⁵ A Judas guts uncaam umënts wun di kato-kayëman, a na pën atsëp ee ŋaaŋar acäts.

⁶ A bawiak-bajakan coonts uncaam, a ba ja: “Níiranaatsa pëkakan di tsëgaangi uncaam uyëman, par aci-uncaam pëñaak.”

⁷ A ba ñakan abaar pëloole, a ba jej uncaam umënts wun aweelëna irig naniew itsukar, pa përo unguran batsooŋ.

⁸ Wul ka wun irig umënts yun kë jaka irig pëñaak, te ntsari.

⁹ Ko wi tsu prim Jeremias nayëlia pa ci ucär, bi na ja bi: “Bu jej ngëntaaja ngëwaants uncaam-utsak, un ci wi përes pi balon tsi babuk Israel tsurul pi;

¹⁰ a ba welna irig naniew itsukar, bi Ajug ro bi tsuin pëja.”

Yeesu tsi bërun Pilaatus

¹¹ A Yeesu natsana tsi bërun na tsijëna-ucaak. A na tsijëna-ucaak yeparul, aja: “Wi ci-un nasien bajudeu-a?” A Yeesu yankul, aja: “Bi m ja bank.”

¹² Maa kaats ko wi na ja wi tsi uleka ngi bawiak-bajakan ni bawiak Bajudeu, tumtsarul ngi.

¹³ Din a Pilaatus na tsijëna-ucaak jaul: “M teets ngi ba jaaru ngank bëlieng-a?”

¹⁴ Maa Yeesu yankatsul nin përim pëloole; a u pikran mak na tsijëna-ucaak.

Yeesu alacana pa pëfiŋa

¹⁵ Na tsijëna-ucaak Baroman awakëtsa pëja tsi Ufesta në wëtan narica naloole ni kandënd bañaan yepi.

¹⁶ Bu ro ka nalon narica na mee-e mak, ka jaka Barabas.

¹⁷ Bi ba júk bi, a Pilaatus ja bukul: “Naom ni nda ŋal un n doon ka wëtandar ind, Barabas, oo Yeesu nul ni ka n jakee Këristu?”

¹⁸ Par nul ame u ci-undo mankocar ka wun ba gutsariul Yeesu.

¹⁹ Bi Pilaatus tsoar bi di kato kawat-pëleents, a aarul wëtaniul përim aja: “Tsë tsu mtumu di ko niints namabal ni, par ntsari ma noor mak tsi utsaafi, ujaraul.”

²⁰ A bawiak-bajakan ni bawiak Bajudeu, tsu kandënd bañaan ba yepul Barabas, Yeesu ka tsua na fiŋa.

²¹ A na tsijëna-ucaak jej uñakan, a na ja bukul: “Naom tsi batëb biki ni nda ŋal un nji pëwëtandar ind?” A ba yankul aja: “Barabas!”

²² A Pilaatus ja bukul: “A we wi n du do wun Yeesu, nul ni ka n jakee Këristu?” A ba yank bëlieng aja: “Na rieŋaan di Kërúus!”

²³ Maa a na tsijëna-ucaak ja: “Wee na ro wun, u waraatsa wi?” A ba ru pe këpe pëlië mak, koo ja: “Na rieŋaan di Kërúus!”

²⁴ Bi Pilaatus win bi na nayëlants ko tsul, a mangëbulër kë watsësar, a na jej mlik, a na ñaw iñan tsi bërun kandënd bañaan, a na ja: “Iñan nji jënts tsi katul pëñaak namëntsi. Ind ka teen bukun.”

²⁵ A bañaan-ucaak yankul bëlieng aja: “Pëñaakul pa kakari wund ni upäts wund!”

²⁶ Din, a Pilaatus wëtandar bukul Barabas, a na tsu a Yeesu tucana; a uu ba, a na gutsarul përieŋa di kruus.

Basondaari ci tsi përiat Yeesu

²⁷ A basondaari na tsijëna-ucaak tsëpand Yeesu di bametsu kato-pësien; a ba jukëlën kandënd basondaari bëlieng, afayul.

²⁸ A ba tiemësul iŋi, a ba kulul ni kapantu kajankal caw,

²⁹ a ba sier ucape iyu com wi pësien apaful tsi been, a ba mobanul pëndog pëkëpats tsi kañan kariir; a uu ba, a ba jintëla tsi bërunul, a bu kë riatul, koo ja: “Ciin tsi pëfac, nasien Bajudeu!”

³⁰ A bu kë tújarul, a ba yankënul pëndog pëkëpats, a bu kë kobënul pul tsi been.

³¹ A ba riatul a uu ba, a ba pënanul kapantu, a ba kakan iŋi-bëtiemul awaanul, a ba tsëpandul pii rieŋ di kruus.

Yeesu arieŋa di kruus

³² Bi ba pën bi pëtsëp, a ba jëk ni nalon niints nan pënë-nii Sireeni, katimul Simon; a ba forsaarul na lap kruus Yeesu.

³³ Bi ba band bi tsëko tsi ka n jaka tsi Golgota, un ci wi tsëko kankunkaloŋ,

³⁴ a ba tsu Yeesu përaan pëwat pan gëbëlëna pi ni ko uwaayal; maa bi na mel bi pul, a ŋalats përaan pul.

³⁵ A ba rieŋul di kruus a uu ba, a ba júgats afaar iŋi-bëtiemul,

³⁶ a ba tsoar a bu kë waayul.

³⁷ A përim picana apiban ko un ka wi na lacana, a pa tsua tsi ruets been Yeesu; iink di pa ja run: “NAMËNTSI ACI YEESU, CI UN NASIËN BAJÚDEU.”

³⁸ A ngëfët ngëtëb rieŋa ni nul, nalon tsi kariir, nacints tsi kamay.

³⁹ A biki kan par biki tsul kë karul, a bu kë siints iyeen

⁴⁰ koo ja: “Wi ni kan gari kato-kayëman, kë kakan kul ka niew tsi ngënu ngëwaants, buerani-e beenu! Uci bi m ci bank Abuk Nasien-batsi, welee di kruus!”

⁴¹ A bawiak-bajakan, ni bapican-utaua, ni bawiak Bajudeu kë riatul buts, a bu kë ja:

⁴² “Abueran balon, a yëlants pëbueran beenul! Aci nasien Israel ank, na welee-e di kruus, din nja ka fiaarul!

⁴³ Awatsaraan tsi Nasien-batsi, Nasien-batsi na bueraniul-e inkri, uci na ŋalul; par aja: ‘Nji n ci-un Abuk Nasien-batsi.’”

⁴⁴ A ngëfët nga dieŋa ngunk ni nul di kruus kë karul koo ja ank buts.

Pëcäts Yeesu

⁴⁵ Pëkur tsi uson unu, te ngëwal ngëwaants, a ucaak karëmts bëlieng.

⁴⁶ Uwokan ngëwal ngëwaants, a Yeesu kat përim alie mak, aja: “Eli, Eli, lema sabaktani?” Un ci wi: “Nasien-batsi nji, Nasien-batsi nji, we ka wun m bërin?”

⁴⁷ A balon tsi ban ci biki tsul teul, a ba ja: “Aci tsi përu Eliyas.”

⁴⁸ Tsi uyëk umënts wun, a nalon túk ee jej kapoons, a na yuag kul di buneegar añuawan; a na buats kul tsi bujul pëndog pëkëpats, a na colanul na raan.

⁴⁹ Maa a bacints buku n ja: “Wëtan, ngë teen-e ne Eliyas ka bi ank pëbueranul.”

⁵⁰ A Yeesu kaka kat përim alië mak, a na juab.

⁵¹ Uyëk umënts wun, a uridu tsëko-tsëyëman tawee di ruets te di utsia, aro itawar itëb; a utsia siintsar, din a ilaak tawa.

⁵² A ibuk waantsar, a ngëliaf bañaan Nasien-batsi bacumal, bando biki cäts, natsee di pëcäts.

⁵³ Bi Yeesu natsee bi di pëcäts, a ba pëni di ibuk, a ba niaj përaasa pëyëman, un ci wi Jerusalem; a ba pibandar tsi bañaan bacumal.

⁵⁴ A bi kapëton basondaari, ni ban ci biki ni nul tsi pëwaay Yeesu, win bi utsia usiintsar bi, ni ngandola ngi, a ba lënk mak, a ba ja: “Tsi ubaaraari, namëntsi ron un ci Abuk Nasien-batsi!”

⁵⁵ A u ka rul bakaats bacumal ba natsi biki alawan, a bu kë teeni; bu fetsëni Yeesu di Galileeya, a bu kë këmandul.

⁵⁶ Tsi bukul, aci Maaria kanpën-ni Magëdala, ni Maaria, anin Jakob ni Juse, ni anin babuk Sebede.

Puum Yeesu amooya di pëbuk pëwalu

⁵⁷ Uyër pëcaal, a nalon niints narëmb baandi, katimul Juse, apënë-ni Arimateeya. Nul buts, ee ci nafets Yeesu.

⁵⁸ A na tsëp di Pilaatus, a na yepul puum Yeesu. Din, a Pilaatus tsu na wëla pul.

⁵⁹ A Juse jej puum, a na bëb pul ni pëfaal pëjëntsal,

⁶⁰ a na mooy pul di baarul, buwalu, bi nul Juse ro bi tsu a ba jëparaul di bulaak. A uu ba, a na kël pëlaak pëwiak asëts tsi mtum pëbuk, a na pën atsëp.

⁶¹ A Maaria kanpën-ni Magëdala ci tsul, ni Maaria mcínts; a ba tsoar amabular ni pëbuk.

Basondaari awaay pëbuk

⁶² A unu kë fa, u nek wi unu pëyecisër ngëko, a bawiak-bajakan ni Bafariseu júk, a ba tsëp di Pilaatus,

⁶³ a ba jaul: “Ajug! Wund ales natsupalar namënts un ro ja uwal wi na wama wi ci: ‘Upar ngënu ngëwaants, ka n natsee di pëcäts.’

⁶⁴ Tsuun pëbuk pa waaya te unu uwaajantsan, pa bafetsul përits bi bee ba kiej puum, a uu ba, bu ka ja bañaan: ‘Anatsee di pëcäts.’ Din, kafäl katuami ka pe kacak pëjuats.”

⁶⁵ A Pilaatus ja bukul: “Nda jejan balon bawaay, ndë tsëp ndii waay pul, bi nda ŋal bi.”

⁶⁶ A ba tsëp, a bee ríc pëbuk aliincan, a ba tsu umarëka tsi pëlaak, a ba tsuund bagaarir.