MATEU 26 - KARÚK-PËRIM KAWALU Nouveau Testament

Bajudeu baaraan pëloole pa Yeesu pëfiŋa di kruus

¹ Bi Yeesu ba bi pëleents irim yan bëlieng, a na ja bafetsul:

² “Nda me Ufesta-pëbuer kë ci, tsini ngënu ngëtëb; Abuk ñaan-najin ka gutsara përieŋa di kruus.”

³ Din, a bawiak-bajakan, ni bawiak Bajudeu, júk di kato nan pei pëci nawiak-bajakan, katimul Kayafas.

⁴ A ba baaraan pëloole pa pëpar-na kafäl, bu ka mob Yeesu në fiŋa.

⁵ Maa a ba ja: “Kaats pëci tsi unu ufesta, pa mangëbulër përits ci tsi bañaan.”

Yeesu atulara ulicar tsi been

⁶ Bi Yeesu ci bi di Betaania, di kato Simon, a nalon ŋaats na maaki kantseul-kajankal,

⁷ bi ee wokul; a tsiji pëjaam alabastëru tsi kañan, pan cum pi ulicar uñatsal mak. Bi Yeesu ci bi tsi bariala, a ŋaats tularul ulicar tsi been.

⁸ Bi bafetsul win bi ko wan, a ba riabats, a ba ja: “We ci wun kacok ko ki?

⁹ Ulícar umënts wi aro yëlan pëwaapara përes pan ñats pi mak, uncaam wël ka wëlaa baranj.”

¹⁰ A Yeesu me ko wan, a na ja bukul: “We ka wun ndu cok ŋaatsi uwaas? Nul, aroin ko un ci wi uwar.

¹¹ Par nduu ci ni baranj ngënu bëlieng; maa nji, nda ri ka ci ni nji ngënu bëlieng.

¹² Bi na tularin bink ulicar tsi uliaf, ayecisn pëmooy.

¹³ Mán leents ind ucär: Kara tsëko tsi Upetsan-uwar kë leentsaa tsi, tsi umundu bëlieng, ko wi ŋaatsi ro wi ka leentsa buts, pa pëlesnaul.”

Judas Iskarioti aya Yeesu ufets

¹⁴ Din a nalon tsi untaaja bukun ni batëb, ni ka n jakee Judas Iskarioti, tsëp di bawiak-bajakan;

¹⁵ a na jaul: “Wee nda yëlan wun pëwëlin, ka gutsar ind Yeesu?” A ba lukul ngëntaaja ngëwaants uncaam-utsak.

¹⁶ Pëjot tsi uwal umënts wun, a na kur pëtsas bëga bi nu gutsëna bi Yeesu.

Bafets Yeesu yecis Ufesta-pëbuer

¹⁷ Tsi unu ucak ufesta upom un tsijats wi bëko-bëlëntsëntsaani, a bafetsul Yeesu bi ee jaul : “Tsum tsi m ŋal tsun wund pëyecësëraanu bariala Ufesta-pëbuer?”

¹⁸ A na yank bukul aja: “Nda tsëpan di përaasa, di kato pase, ndë jaul: ‘Najukan aja: Uwal nji awokani, mán doona Ufesta-pëbuer di useu, ni bafetsin.’”

¹⁹ A bafetsul ro bi Yeesu tsu bi bukul përo, a ba pëyecës Ufesta-pëbuer.

Yeesu aleents nalon tsi bafetsul kë yaul ufets

²⁰ Uyër pëcaal, a na tsoar bariala ni untaaja bukun ni batëb.

²¹ Bi ba ci bi tsi bariala, a na ja: “Mán leents ind ucär: Nalon tsi ind ka yain ufets.”

²² A ba juatsan mak, a uja nandooni në jaul: “Ajug! Aci nji-a?”

²³ A na yank bukul aja: “Na yuagi kañan ni nji di përialaani, ka ci-un ni ka yaini ufets.

²⁴ Abuk ñaan-najin ka tsëp, bi u picanaa bi tsi ulekaul. Maa cay ñaan ni ka ya ank Abuk ñaan-najin ufets! Aro pe pëmat ñaan namënts përoots bëka yaas.”

²⁵ A Judas, ni ka yauli ufets, ja: “Rabi, Aci nji-a?” A Yeesu yankul aja: “A wi ja ank!”

Ufëri Ajug

²⁶ Bi ba ci bi tsi bariala, a Yeesu jej pëpom, a na beenir, a na cëtës pul; a nu wël bafetsul, a na ja: “Nda jejan, ndë re; ko wi aci uliaf nji.”

²⁷ A bi na jej bi karaani a na wël mbaran, a nu wël bukul a na ja: “Nda raanan tsi kul, ind bëlieng;

²⁸ par ko wi aci pëñaak nji, pëñaak karo-pëloole, pan tulaa pi pa bacumal, pa pëjampësana ngëjuban.

²⁹ Par ma n ja ind, pëpën tsi inkri pëya bërun, in katse ka n daan pëwat mbuk bëbiiñu pi, te unu wi n du n daan wi pul pëwalu, ni ind, di pësien Asin nji.”

³⁰ Bi ba ba bi pëya uya-ubëndan, a ba pën atsëp untunda Mëoliwa.

Yeesu acar aleents Per kë fatsul ufets

³¹ A Yeesu ja bukul: “Bërëm bi, ndu yër bëlieng, undo nji; par ko wi picana wun: ‘Mán kob nayafan, din ngënkaanel pëtan ka garandar.’

³² Maa mán natsee di pëcäts, a uu ba, ka yër ind bërun di Galileeya.”

³³ A Per yankul aja: “Ŋal ank kë ci ko wi kan tsu wi bañaan bëlieng pëyër, m di kë ci ko wan pa nji yaas.”

³⁴ A Yeesu jaul: “Mán leentsu ucär: Bërëm bi, uguk ka ruka ka aan, kë bërin aa ngëyaas ngëwaants.”

³⁵ A Per yankul, aja: “Ŋal ank ka ka pëcäts ni wi, nin in di ka ja i meetsu.” A bafets bëlieng ja pëloole pan.

Yeesu di Getsësemani

³⁶ Din, a Yeesu tsëp ni bukul di tsëko tsi ka n jaka tsi Getsësemani, a na ja bafetsul: “Nda tsoaran tsi, mán tsëp run pa pii ñaan.”

³⁷ A na tsëpand Per ni babuk Sebede batëb bukun; a na kur pëci tsi unjuatsia, ni unoor.

³⁸ Din, a na ja bukul: “Uwaas nji ajuatsan mak aa ndu n tsas pëcäts. Nda rukaan tsi, ndë waay ni nji.”

³⁹ A uu ba, a na kikësa ko uties, a na yër alëm urostu tsi utsia, a nuu ñaan a nuu ja: “Asin nji! Uci u yila bëro, karaani kan ci kink ki unoor, ka lawanin! Maa, tsë roa bi n ŋal bi, maa bi m ŋal bi.”

⁴⁰ A na witsee tsi bafetsul, a na tsënk ba ŋooy. A na ja Per: “Nda bitse yëlan koon pëwaay ni nji, uwal uloole!

⁴¹ Nda waayan nduu ñaanand, pa nda rits yër tsi kafäl. Uwejats ayecis pa përo, maa katël labuts.”

⁴² A uyaas utëbantsan, a na kikësa alawan, a na ñaan, aja: “Asin nji, uci karaani unor ki yëlaatsa pëlawana uroko ne ka raan tsi kul, uŋalu u roaan!”

⁴³ A na witsee, a na tsënk bu kë ŋooy, par këkës bukul aritsan.

⁴⁴ A na ruk bukul, a na kika kak alawan, a na ñaan uyaas uwaajantsan, akakar irim iloole yun.

⁴⁵ A uu ba, a na witsee tsi bafetsul, a na ja bukul: “Nda wama ka ŋooy a nduu naakësa! Uwarl wokani wink, wi Abuk ñaan-najin kë gutsa wi tsi iñan bajuban.

⁴⁶ Nda natsaan ngë tsëp! Ni kan gutsini baandi ink.”

Pëmoba Yeesu

⁴⁷ Bi na wama bi ka ñakan, a Judas baandi; nul nan ci nalon tsi untaaja bukun ni batëb, acii ni kandënd bañaan kawiak, a ba ŋaŋandër ni ngëlaac ni ngëndog; bawiak-bajakan, ni bawiak Bajudeu yëli bukun bukul.

⁴⁸ Ni kan yauli ufets aro jaak bukul upibanaani wi: “Ni n du n wúnkëree, ka ci-un ni nuu mobi.”

⁴⁹ Uyëk umënts wun, a na bi ee wok Yeesu, a na ja: “Ciin tsi pëfac, Rabi!” A na wúnkëraul.

⁵⁰ A Yeesu jaul: “Bëfetsar! Ko wi m bi wi përo, doan!” Din, a bañaan bamënts bukun kikee, a ba yërna Yeesu amob.

⁵¹ A nalon tsi ban ci biki ni Yeesu tsu kañan acuati ulaac, a waŋ na moba-pëtsiek nawiak-bajakan, afalul kabats.

⁵² Din, a Yeesu jaul: “Kakani ulaacu di kabeel; par nan totii ba këtoti ulaac, ulaac ka fiŋul wun.

⁵³ Oo m ja ne, nji i yëlants pëyep Asin nji, në wëtaniin ngëwaanju ngan pe ngi ngëmiil paaj aa ngëyaas untaaja ni ngëtëb tsi umpankaar a?

⁵⁴ Bi u ci bank, ngi Bëpica n ja ngi, ka bandan përoaa nga ja um? Par ajaka, unk ri u ka run pëci.”

⁵⁵ Tsi uwoora umënts wun, a Yeesu ja kandënd bañaan: “Nda bi ni ngëlaac ni ngëndog, pii mobin, pi man ci uwayu. Man do ka n tsoar ngënu bëlieng di kato-kayëman, a ndu jukan, a nda mobatsin.

⁵⁶ Maa ko wi bëlieng abaandi, pa Bëpican bayëlia ka ba përoaa.” Din a bafetsul bëlieng bërul tsul, a ba túk atsëp.

Yeesu di kato kawat-pëleents kawiak

⁵⁷ A ba mob biki Yeesu tsëpandul di Kayafas, nul nan pei pëci nawiak-bajakan; bapican-ulua, ni bawiak Bajudeu, júk rul.

⁵⁸ A Per rukaul tsi ufets alawan, te di kato nan pei pëci nawiak-bajakan. A na niaj, a na tsoar ni bagaarir, pa pëwin ubaar ngëko.

⁵⁹ A bawiak-bajakan, ni kawiak bëlieng tsi kato kawat-pëleents ci tsi pëtsas pëtsupar Yeesu, pa në lacana, din në fiŋa.

⁶⁰ Maa bu kaats bëga, ŋal bi bacumal baandi bi ee ka leents ngan cits ngi ngëcär. Tsi utuami, a batëb bi, a ba ja:

⁶¹ “Namëntsi aja: ‘Man yëlan pëgar kato-kayëman Nasien-batsi, ka kakan kul ka niew tsi ngënu ngëwaants.’”

⁶² A nan pei pëci nawiak-bajakan natsa, a na jaul: “Tsi ko wi bamënts biki jaaru wank, m di kë ja ko-a?”

⁶³ A Yeesu yëŋandar tsi na yëŋandar tsi. A nan pei pëci nawiak-bajaka n jaul: “Man ñaanu këñaan tsi Nasien-batsi nayësal: uci wi ci-un Këristu, Abuk Nasien-batsi, leents wund.”

⁶⁴ A Yeesu yankul, aja: “Bi m ja bank. A ndu ja ind: Pëkur tsi inkri, ndë win Abuk ñaan-najin tsoar di kariir Kanpe pëyëlan-ngëko bëlieng, në pafari tsi isa batsi pëbi.”

⁶⁵ Din, a nan pei pëci nawiak-bajakan taw iŋiul, a na ja: “Akar Nasien-batsi! Wee ngë fierar wun kak bamaatir? Nda teenan-e! Nda te inkri kakar ki na kar ki Nasien-batsi.

⁶⁶ Wee nda wejats wun tsul?” A ba yankul aja: “Aka na roon në cäts.”

⁶⁷ Din a ba tújarul tsi urostu, a ba suk-sukanul, a balon waŋul tsi imbakats;

⁶⁸ a bu kë jaul: “Këristu! Leents wund-e, yën kobu un?”

Per aja meets Yeesu, aa ngëyaas ngëwaants

⁶⁹ Maa a Per ro tsoar di utsand, di bulay. A u ka nampëli naleemp nan tsëpi awokul, a na jaul: “Wi buts, m do ci ni Yeesu Kanpënë-ni-galileeya.”

⁷⁰ Maa a Per pok tsi bërun bañaan bëlieng, aja: “Nji n meets ko wi m ŋal wi pëja.”

⁷¹ Bi na pën bi pëtsëp pëlëman pëwiak, a nalon nampëli naleemp winul, a na ja ban ci biki tsul: “Namëntsi ro ci ni Yeesu Kanpënë-ni-nasaret.”

⁷² A na pok kak, ni ubaaja, aja: “Nji n meets niints namëntsi a!”

⁷³ Jonats, a ban ci biki tsul bi awoki, a ba ja Per: “Aci ucär, m bof ni bañaan biki, buñakanu apiban bi m ci bi.”

⁷⁴ Din, a na ci tsi pëjar beenul ngëjuatsal, a na baaja, aja: “Nji n meets niints namëntsi a!” Uyëk umënts wun, a uguk aan.

⁷⁵ Din a Per les përim pi Yeesu ro pi jaul: “Uguk ka ruka ka aan, kë pok m meetsin aa ngëyaas ngëwaants.” A na pën acil utsand, a na rug, ajuatsan mak.