MATEU 25 - KARÚK-PËRIM KAWALU Nouveau Testament

Bampëli untaaja, bameets-niints

¹ Unk, pësien batsi ka naam pi bampëli untaaja ba meets biki niints, bän jej biki ngëlamp bukul, a ba tsëp pii jëk ni nanim.

² Kañan tsi bukul, bë ci bafuur, a kañan ci bameko.

³ A ban fuur bukunk kë jej ngëlamp bukul, bu tsijandats mkër.

⁴ Maa a bameko bukun kë jej ngëlamp bukul, a ba tsijand mkër tsi itsuuni mul.

⁵ Bi nanim wama bi ka jon pëbaandi, a ba ŋënd bëlieng aa ba ŋooy.

⁶ Tsi myëŋ, a kalië tea, aja: ‘Nanim, abaandi oo! Nda cili ndii jëk ni nul!’

⁷ A bukul, bameets-niints, natsa bëlieng, a ba yecis ngëlamp bukul.

⁸ A ban fuur bukunk ja bameko bukun: ‘Nda tseend wund ko tsi mkër ind, par ngëlamp wund ka tsas pëjimbar.’

⁹ A bameko yank bukul aja: ‘Nin a, di kee man kës wund ni ind. Nda roon ndë tsëp di ba waap mul, ndii weeli míic ind.’

¹⁰ Bi bu kë tsëp bi pëweeli mul, a nanim baandi. A bando bukunk yecis niaj ni nul pa ufesta bënim, a pëlëman dica.

¹¹ Tsi bërun, a bacints bukul, bameets-niints, baandi a ba ja: ‘Ajug! Ajug! Waants wund!’

¹² Maa a na yank bukul aja: ‘Mán leents ind ucär: Nji n meets ind.’

¹³ Bi u ci bank, nda waayan, par nda meets nin unu umënts, nin uwoora umënts.

Baleemp ba wëla biki këtaleentu

¹⁴ Pësien batsi naam pi ñaan ni kan pëni pëya bëyaas, a na rui balempul, a na pëtanan bukul bëkaul.

¹⁵ Awël nalon këtaleentu kañan, nacints këtëb, a nawaajantsan pëloole; ñaan, ni ko wi na yëlan wi. Din a na pën aya bëyaas.

¹⁶ A na yank unk këtaleentu kañan tsëp ee leempëna kul, a na gaañaari këtaleentu kañan këcínts.

¹⁷ Unk, a na yank unk këtaleentu këtëb, gaañaari këtaleentu këtëb këcínts.

¹⁸ Maa a na yank unk pëloole pën ee jëp baar tsi utsia, a na bek uncaam nawiakul.

¹⁹ Bi u par bi ajon, a nawiak baleemp bamënts bukun witsee, a na tsu bukul ba ro unkoont.

²⁰ A nando unk yank këtaleentu kañan kikee, a na tsiji këtaleentu kañan këcínts, a na ja: ‘Ajug! M do tananin këtaleentu kañan, kañan këcínts kul ki, ki n gaañaari ki.’

²¹ A ajugul jaul: ‘M do uwar, naleemp nawar a m moband tsi ko wi m tsua wi; m mob tsi ngëko ngëties, mán tsuu kë kaana ngëcumal. Pëni kë bofara ulílan ni ajugu.’

²² A nando unk yank këtaleentu këtëb kikee buts, a na ja: ‘Ajug! M do tananin këtaleentu këtëb, këtaleentu këtëb këlon ki, ki n gaañaari ki.’

²³ A ajugul jaul: ‘M do uwar, naleemp nawar a m moband tsi ko wi m tsua wi; m mob tsi ngëko ngëties, mán tsuu kë kaana ngëcumal. Pëni kë bofara ulílan ni ajugu.’

²⁴ A nando unk yank pëtaleentu pëloole kikee buts, a na ja: ‘Ajug! Ma me m ci ñaan na liinci tsi ko unjaka wi; m ja m doon kë cët tsi m wayaants tsi, a kë jukëlën tsi m gurats tsi;

²⁵ a n lal, a n tsëp ee bek pëtaleentuu, di utsia. Pul pi, yankan aci piicu.’

²⁶ A ajugul yankul aja: ‘Wi naleemp na waraatsee, a m ciind nabisarën! M do me nja ndoon koo cët tsi wayaants tsi, a n dë coonts tsi gurats tsi;

²⁷ m do ka pëtsu uncaam nji di bank, koo witsee iink, ka yanki ko un ci wi umiñ, ni balak.

²⁸ Nda caaniul pëtaleentu pun, ndë wël pul nan ka unk këtaleentu untaaja.

²⁹ Par kaja nan kai, nii wëlaa, në ka na pelëkën. Maa nan kaatsi, nii caana ŋal ko wi na ka wi.

³⁰ A nda gutsanul naleemp nan kaats unk bëkat, di karëm utsand, tsul tsi irug kë ci tsun, ni kañaam irumaj.’

Kawat umundu pëleents

³¹ Uwal wi Abuk ñaan-najin kë bi wi di përëmbul, ni ngëwaanju bëlieng, në tsoar tsi pëtsoari-pësien, pi përëmbul.

³² Bañaan ban cits biki Bajudeu bëlieng ka júk tsi bërunul, në patsës balon tsi bacints bukul, bi nayafan kë patsës bi ngënkaanel ni ngëpi;

³³ në tsu ngënkaanel tsi kariirul, maa ngëpi tsi kamay.

³⁴ Din, Nasien ka ja bukun tsi kariirul: ‘Nda bili, ind ban jaara biki ngëwar, biki Asin nji; nda rukandaan pësien pando pi yecësëra ind, ki umundu juund ki.

³⁵ Par mando n bonats, a nda wëlin bariala; a ndo n lofënts, a nda wëlin përaan; a ndo n ci natsooŋ, a nda welanin;

³⁶ a ndo n ci bëruent, a nda tiemanin; a ndo n maak, a nda bi pëteenin; a ndo n ci di ukalabus, a nda bi pëwinin.’

³⁷ Din, bamabal ka yankul ka jaul: ‘Ajug, lum di wund windun m bonats, a wund wëlu bariala, oo m lofënts, a wund wëlu përaan?

³⁸ A lum di wund windun m ci natsooŋ, a wund welanu, oo m ci bëruent, a wund tiemanu?

³⁹ Lum di wund windun m maak, oo m ci di ukalabus, a wund bi pëwinu?’

⁴⁰ Nasien ka yank bukul ka ja: ‘Mán leents ind ucär: Ko wi nda roor wi ba naloole tsi ban pe bikink pëci baties, tsi ban tsaar biki ni nji, nji ni nda roor un.’

⁴¹ Din në ja buts bukun tsi kamay: ‘Nda pënin tsi, ind ban tsua biki unjuatsia; nda tsëpan di bërua ban dits bi ka ba, ban yecisa bi pa Ujabël ni ngëwaanju.

⁴² Par mando n bonats, a nda wëlatsin bariala; mando n lofënts, a nda wëlatsin përaan;

⁴³ mando n ci natsooŋ, a nda welanatsin; mando ci bëruent, a nda tiemanatsin; mando n maak, mando n ci di ukalabus, a nda biits pëwinin.’

⁴⁴ Din, bukul buts, bu ka yank ka ja: ‘Ajug! Lum di wund windun m bonats, oo m lofënts, oo m ci natsooŋ, oo m bëruent, oo m maak, oo m ci di ukalabus, a wund këmandatsu?’

⁴⁵ Din, në yank bukul na ja: ‘Mán leents ind ucär: Ko wi nda roorats wi ba naloole tsi ban pe bikink pëci baties, tsi ban tsaar biki ni nji, nji ni nda roorats un.’

⁴⁶ Unk, bamënts biki ka tsëp pa pëpikaara pan dits pi ka ba; maa bamabal ka tsëp pa ubiira un dits wi ka ba.”