MATEU 24 - KARÚK-PËRIM KAWALU Nouveau Testament

Yeesu car leents kato-kayëman kë gara

¹ Bi Yeesu pën bi di kato-kayëman pëtsëp, a bafetsul kika awokul, pa pëpibanul buniewara kato-kayëman.

² A na ja bukul: “Nda winats ngi bëlieng-a? Mán leents ind ucär: Pëlaak di ka wam tsi ruets pëcints pul tsi, pan dits pi kee garaa.”

Unoor, ni pënoor-noorana

³ Bi na tsoar bi tsi untunda Mëoliwa, a bafetsul bi tsi nul tsi ufaai, a ba jaul: “Leents wund-e lum di ngëmënts ngan kii ci run? A wom upibanaani kee piban wun pëbiu, ni ubaar umundu?”

⁴ A Yeesu yank bukul aja: “Nda rukan ibats, pa ñaan tsë fäl ind.

⁵ Par bacumal kee ba bi, bu ka tsuar katim nji; uja nan dooni nuu ja: ‘Nji n ci-un Këristu;’ bu kee fäl bañaan bacumal.

⁶ Nduu te ukam kë kamaa, ni pësiints ukam; maa, ind tsë lënk, par ko wan aka pëci; maa netse ka ci ubaar umundu.

⁷ Këbos ka kamanlër, mësien ka kamanlër; a di ngëleka ngëcumal, ubon koo ci, utsia kë siintsar.

⁸ Ngëmënts ngan bëlieng, ka ci pi ujuundar urear uliaf-kabuk.

⁹ Din, bu ka guts ind tsi unoor, bu ka fiŋ ind. Ban cits biki Bajudeu bëlieng, bu ka ñaas ind, undo katim nji.

¹⁰ Din, u ci ko wi ka wat wi bacumal; bu ka yalër ufets, bu kë ñaasëlër.

¹¹ Bayëlia batsup bacumal ka natsa, bu kë fäl bañaan bacumal.

¹² Bi kamabats kë watsësar bunk, bëŋal bañaan bacumal ka juabuts.

¹³ Maa nan tambandari te tsi utuami, në buerana.

¹⁴ Upetsan-uwar pësien Nasien-batsi wi, ka leentsa di umundu bëlieng, pa pëci upibanaani pa ban cits biki Bajudeu bëlieng. Din, utuami ka baandi.

Unoor uwiak

¹⁵ Wul ka wun, uwin ind ujuatsar wi Daniel, nayëlia, ñakan wi di tsëko-tsëyëman, (najuk na mean ko wi u pac wi).

¹⁶ Din, ban ci biki di Judeeya, ba túkari ngëntunda;

¹⁷ nan cii di ruets kato, nul tsë welee pëjej ko un ci wi di bametsu;

¹⁸ a nan cii di bëreeŋ, nul tsë kak ufets pëwitsara kaŋí-bëtiemul.

¹⁹ Cay bakaats ban seempa biki, ni biki kan buatan biki tsi ngënu ngëmënts ngan!

²⁰ Nda ñaandëri pëtúk ind përits ci tsi uwal ujoonts, oo tsi Unu-pënaakësa.

²¹ Par unoor uwiak kee u ci, u netse wi ro ci, ki ujuund umundu te pënak pëntsa, a te katse kee u ci yaas.

²² Te uci ngënu ngëmënts ngandoots rukësa, nin ñaan di ka buer; maa undo ban data biki, ngënu ngëmënts ngan ka rukësa.

²³ A uci ñaa n ja ind: ‘Këristu, nuu ni tsi!’ Oo: ‘Nul nun dun!’ Ind tsë fiaar.

²⁴ Par barata bafälar, ni bayëlia bafälar, bu ka natsa, bu kë ro ngëpibanaani ngëwiak, ni ngëko ngan pikran ngi, pa puu fälëna bañaan, te ŋal ban data biki, uci ba yil bëro.

²⁵ Nji n car ank a leents ind.

²⁶ A uci ba ja ind: ‘Nda teenan-e, nul nan di ulaalats;’ ind tsë pën nda tsëp. Oo: ‘nda teenan-e, aci di bametsu ifër;’ ind tsë fiaar.

²⁷ Par, bi kalikajë n ja bunk ka pëni di umay-unu kë yëk te di uyër-unu, unk di pëbi Abuk ñaan-najin kë ci run.

²⁸ Tsi ucäts ci tsi, ngëjúgëri ka júk tsul.

Ubi Yeesu, Abuk ñaan-najin

²⁹ Uba pëpar ngënu unjuatsia ngëmënts ngun, unu ka rëmënts, pëli katse ka fiets, ngëpesaj ka yëri ri batsi, myëlan man ci mi di batsi ka siints-siintsana.

³⁰ Din, upibanaani Abuk ñaan-najin ka wina di batsi, mbuka bëlieng tsi umundu kë kaan; mul më win Abuk ñaan-najin pafari tsi isa batsi pëbi, ni pëyëlan pëwiak, ni përëmb pëwiak;

³¹ pëncend puwiak ka leents mak, në yëli ngëwanjul ngë jukëlën bayiicul ban data biki, pëjej ni ri kajendats umundu te ri kacints.

Yeesu atib përim anaamanaan bëkungul

³² Nda cíkëndëni uwar bëjukan katib-përim ka naamanaana kink bëkungul. Aja ina bul luuntani, ndë me uwal uyëki ruka wokani.

³³ Unk ind buts, uwin ind ngëmënts ngan bëlieng, ndë me ne, aruka wokani, acii tsi pëbuam pun.

³⁴ Mán leents ind ucär: Bañaan ntsari biki bu ri ka cäts ba ba, te ngëmënts ngan bëlieng baandatsi.

³⁵ Batsi ni utsia ka par, maa irim nji di ka par yaas.

Nda waayan, par ñaan meets unu umënts ni uwal umënts

³⁶ Nin ñaan meets unu ni uwal umënts, ŋal ngëwaanju batsi, nin Abuk, aci koon Asin koorul.

³⁷ Ubiiri Abuk ñaan-najin kee u ci bi u ci buunk tsi pëcël Noe,

³⁸ Par tsi ngënu gi mlik-mfuer netse wi baandi, bañaan kë riala, a bu kë raan, a bu kë nim, a bu kë niman, aa unu wi Noe niaj wi bëntsian.

³⁹ Bu rukats ibats, aa mlik-mfuer baandi ee tsëpand bukul bëlieng. Unk ri wii ci run buts ubi Abuk ñaan-najin.

⁴⁰ Din, uja tsi bayënts batëb ban ci biki di bëreeŋ, nalon ka jeja, nacints ka ruka;

⁴¹ tsi bakaats batëb ban ci biki tsi pëson, nalon ka jeja, nacints ka ruka.

⁴² Bi u ci bank, nda waayan, par nda meets unu wi Ajug ind kë bi wi.

⁴³ Nda mean ko wi, uwar: uci ajug kato ro me uwal wi nakiej kë bi wi bërëm, në waay; bitse ka wët katoul ka lúŋana.

⁴⁴ Wul ka wun, ind buts nda ka pëparir, par Abuk ñaan-najin ka bi tsi uwal wi nda wejatsats wi.

Naleemp na mobi tsi përim, ni naleemp na mobatsi tsi përim

⁴⁵ Yën ci-un naleemp na mobi tsi përim a na lipand, ni nawiak tanani baleempul tsi kato, pa nuu wël bukul bariala, tsi uwal bul?

⁴⁶ Ko wi na naleempul kë lilan wi uci na tsënkiiul nuu ro unk, ubaandiul!

⁴⁷ Mán leents ind ucär: Ka tananul bëkaul bëlieng.

⁴⁸ Maa, uci na ci naleemp na waraatsee, në ja tsi ibatsul: ‘Nawiak ka jon pëbaandi,’

⁴⁹ din në jot pëtucan bacintsul baleemp, nuu riala koo raan ni bakuj.

⁵⁰ U ukaki nawiak naleemp namënts un ulon unu wi na watsatsul wi, ni uwoora wi na meets wi;

⁵¹ në falës-falsënul, kaboful tsi banguungu: tsul tsi nuu rug tsun, nuu ñaamand irumaj.