MATEU 19 - KARÚK-PËRIM KAWALU Nouveau Testament

Kagar-bënim

¹ Bi Yeesu ja bi ko wan a uu ba, a na pën di Galileeya atsëp pëboos Judeeya, di kalutar bërëk Jordan.

² A indënd bañaan icumal runanul; a na yësan bukul dul.

³ A balon tsi Bafariseu tsëp di Yeesu pii teen-teenanul; a ba jaul: “Niints pëgar bënim ni aarul tsi uleka ko un ci wi-ba këci, aci ko un tsua wi-a?”

⁴ A Yeesu yankës bukul, aja: “Nda jukatsko un picana wi-a? Tsi ujuundi, Kaleemp-ngëko-bëlieng aleemp bukul, niints ni ŋaats,

⁵ a na ja: ‘Wul ka wun, niints ka pën tsi asinul ni aninul, në mobëlar ni aarul, din bukul batëb ka ruka ci katël uliaf kaloole baŋ.’

⁶ Unk, bu katse ci batëb, maa katël uliaf kaloole baŋ. Wul ka wun, ko wi Nasien-batsi bofëlan wi, ñaan tsë gar.”

⁷ A ba ja Yeesu: “A we ka wun a utua-Moises tsu niints pëwël aarul kakaarta kagar-bënim, din bë gara?”

⁸ A na ja bukul: “Aci uleka katamb-ngëwaas ind, ka wun Moises tsu ind pëgar bënim ni baar ind. Maa ki ujuundi, doots ci ank.

⁹ Má n ja ind: Nan gari bënim ni aarul, te cits tsi uleka katuk-ufuts, a na nim nalon ŋaats, a jub.”

¹⁰ A bafetsul jaul: “Uci ko wan ci wun tsi pëncuaf niints ni ŋaats, pëwët bënim mat pun.”

¹¹ A Yeesu yank bukul aja: “Cits bañaan bëlieng ka niiran bukun përim pan, maa aci ba wëla biki pëte pul rin.

¹² Par, aka ban yëlants biki pënim, par unk di ba bukee run; a u ka biki bañaan kas biki; a balon ci ban pok biki bënim, undo pësien batsi. Na yëlani pëniiran ko wan, në niiran.”

Yeesu abeenir upäts uties

¹³ A u ka ban rëŋani biki Yeesu upäts uties, pa në paf bukul iñan në ñaandër bukul. Maa bafetsul leentsar bañaan bamënts bukun.

¹⁴ A Yeesu ja bukul: “Nda wëtan upäts uties ba bi tsi nji, ind tsë laaŋ bukul. Par, pësien batsi aci pa bañaan ban naam biki pi bukul.”

¹⁵ A na paf bukul iñan, a na pën tsul atsëp.

Nalon niints narëmb

¹⁶ A nalon niints tsëp di Yeesu a na jaul: “Najukan, wee ndu ndo wun, u wara wi, pa pëka ubiira un dits wi ka ba?”

¹⁷ A Yeesu yankul, aja: “We ka wun a kë yeparin uleka ko u wara wi? Naloole rin, ci-un nawar. Uci m ŋal pëka ubiira, moban tsi përo ko wi ngëtsua ja wi.”

¹⁸ A na yeparul aja: “Ngëom?” A Yeesu yankul, aja: “M di kë fiŋ ñaan, m di kë piintsand ŋaats na nimee, m di kë kiej, m di kë jaar ñaan ko u mabats wi;

¹⁹ dëmbani asinu ni aninu; kë ŋal acintsu, pi m ŋal pi beenu.”

²⁰ A upaas yankës Yeesu, ajaul: “Ngëmënts ngan bëlieng, man do ngul. We wi n dukanda wun përo kak?”

²¹ A Yeesu jaul: “Uci m ŋal pëci nan bai pëci nawar, tsëpan kii waap ko wi m ka wi bëlieng kë tseend baranj uncaam, kii ka bëka di batsi. Din, kë pëni kë fetsin.”

²² Bi upaas te bi përim pan, a na pën tsul ni uwaas un coka wi, a na tsëp bëgaul; par aci narëmb nawiak.

²³ Din, a Yeesu ja bafetsul: “Mán leents ind ucär: Aci ko u nooran wi, tsi pëjaa narëmb ka niaj di pësien batsi.

²⁴ A ndu nja ind kak: A pe përaf pë ja ungilëm pëpar bi baar kagúja, ni pëjaa narëmb na niaj pësien Nasien-batsi.”

²⁵ Bi bafets te bi ko wan, a ba pikra mak a ba ja: “A yën yëlan un pëbuer, bi u ci bank?”

²⁶ A Yeesu kaŋan bukul këkës a na ja bukul: “Bañaan-bajin yëlaants përo, maa Nasien-batsi ayëlan përo ngëko bëlieng.”

²⁷ A Per yankul ajaul: “Wund wëtan bikink ngëko bëlieng, a wund fetsu. We wi wund kii ka wun?”

²⁸ A Yeesu ja bukul: “Mán leents ind ucär: Ind ban ci biki tsi pëfetsin: Uwal wi ngëko bëlieng kë witsa wi ngëwalu, Abuk ñaan-najin ka tsoar tsi pëtsoariul pi pësien, pi përëmb. Ind buts, ndë tsoar tsi këtsoari-pësien, untaaja ni këtëb, ndë wat këbuka Israel pëleents, kul untaaja kun ni këtëb.

²⁹ Ñaan na wëtani ito, tsi undo nji, oo ban tsaar biki ni nul, bayënts oo bakaats, asinul oo aninul, upätsul, oo ireeŋul, nii yank un pe wi përëmb, aa ngëyaas useent; në kaand ubiira un dits wi ka ba.

³⁰ Bacumal tsi bacäk kee ba ci batuami, a bacumal tsi batuami kii ci bacäk.