MATEU 18 - KARÚK-PËRIM KAWALU Nouveau Testament

Naom pe un pëci nawiak di pësien batsi

¹ Tsi uwal umënts wun, a bafets kika awok Yeesu, a ba yeparul aja: “Yën pe un pëci nawiak di pësien batsi?”

² A Yeesu rui napäts naties ee natsan tsi pëncuaf bukul,

³ a na ja bukul: “Mán leents ind ucär: Uci nda wëtanats ba bëci ind, a nda witsaats aci pi upäts uties, nda ri ka niaj koon këniaj pësien batsi.

⁴ Wul ka wun, ná welani beenul pi napäts naties ni, ci-un nan pei pëci nawiak di pësien batsi.

⁵ A ná welani napäts naties pi ni, tsi katim nji, nji ni na welan un.

⁶ Maa ñaan nan tsui nalon tsi baties ba uwak bikink tsi nji a na juban, amat na roon në ŋaŋana pëlaak pëwiak tsi katsuts, në gutsa di bërëk.

⁷ Cay umundu, tsi uleka ngëko ngi kan tsu ngi ñaan në juban! Par, kaats bi nga rits bi ka ci; maa cay, ni kan kai ngëko nga kë baandë-ni ñaan!

⁸ Uci kañanu, oo pëtsiimu kë tsuu juban, falan kë guts ka lawan. Par, amat wi përukanda kañan kaloole, oo pëtsiim pëloole, kë ci tsi ubiira, ni pëjaa m gutsara bërua ban dits bi ka ba, ni iñan itëb, oo ni këtsiim këtëb.

⁹ A uci pëkësu kë tsuu këjuban, kuatësi pul, kë guts pul pa lawanu. Par, amat wi përukanda pëkës pëloole kë kaand ubiira, ni pëjaa m gutsara bërua ban dits bi kaba, ni këkës këtëb.

¹⁰ Nda rukan ibats! Ind tsë be nalon tsi baties biki; par man ja ind, ngëwaanju bukul di batsi aci tsi puu win urostu Asin nji, nan cii di batsi.

¹¹ Par, Abuk ñaan-najin abi pëbueran u niam wi.

Unkaanel u niam wi

¹² Wee nda ja wun? Uci ñaan ka ngënkaanel useent, a ulon tsi ngul niamënul, di ka ruk ngënkaanel ngëntaaja këwas ngun ni ulon, ni këwas ni ulon, tsi untunda, në ya pëtsas u niam wunk-a?

¹³ Mán leents ind ucär: Uci na yaa na wini, në lílan tsi undo na pean undo ngënkaanel ngëntaaja këwas ngun ni ulon, ni këwas ni ulon nga niamats ngunk.

¹⁴ Unk buts, cits uŋal Asin ind nan cii di batsi, pa naloole tsi baties biki pëniam.

Pëjampësa ñaan ngëjuban

¹⁵ Uci ni nda tsaari jubanu, tsëpan band ri nul, tsi kambeku, kë ñakanaanul. Uci na cikëndënu, kë me m kakaniul nda tsaari.

¹⁶ Maa uci na cikëndënatsu, tsijariul ñaan naloole oo batëb, ‘pa ko wi ka ñakanaana wi bëlieng, u ba tsi përim bañaan batëb oo bawaants ban maatir biki.’

¹⁷ A uci na pok pëcikëndën bukul, leentsan Ngëriisia ko umënts. A uci na pok buts pëcikëndën Ngëriisia, tsuun nul pi nameets-nasien-batsi, ni pi nayep bëluk-uraasa.

¹⁸ Mán leents ind ucär: Ko wi nda tan wi ba këtan tsi umundu, wii tanaa di batsi. A ko wi nda pac wi ba këpac tsi umundu, wii pacaa di batsi.

¹⁹ Mán leents ind ucär kak: Uci batëb tsi ind baar pëloole tsi umundu, tsi ko wi bu kë yep wi ba këyep, Asin nji nan cii di batsi ka wël bukul.

²⁰ Par, tsi batëb oo bawaants júk tsi, tsi katim nji, man ci tsi pëncuaf bukul.”

²¹ Din, Per wok Yeesu na yeparul ajaul: “Ajug! Ngëyaas um ngi n du n jampësa ngun nan tsaari ni nji, uci na lacin? Te ngëyaas paaj ni ulon-a?”

²² A Yeesu jaul: “Njnjaatsu te ngëyaas paaj ni ulon, maa ngëyaas ngëntaaja paaj ni ulon, te ngëyaas paaj ni ulon.

Naleemp nan ditsi ka yëkar ñaan ipës

²³ Wul ka wun, pësien batsi anaam pi nasien na ŋali përo baleempul unkoont.

²⁴ Bi na jot bi përo unkoont, a u ka nalon nan baandandee tsi nul; a tsijarul ngëmiil untaaja (10.000) Taleentu.

²⁵ Bi na kaats bi ko wi nu lukëna wi, a nawiakul tsuul na waapa, nul ni aarul ni upätsul, ni bëkaul bëlieng, pëlukëna batsiats.

²⁶ Naleemp yër tsi utsia, a na jintëla tsi bërun nawiakul, a na jaul: ‘Míirain, mee n luku bëlieng.’

²⁷ Nawiakul yëkarul ipës, na wëtanul, na jampësaul batsiatsul.

²⁸ Bi naleemp namënts un pën bi tsul, na jëk ni acintsul naleemp, nan tsijaruli useent tsi uncaam wi ka n jaka wi Dinaariu. A na mobul tsi katsuts amiep, a na jaul: ‘Lúkan batsiats bi m tsiatsin bi!’

²⁹ A acintsul naleemp namënts un yër tsi utsia, na buaraul aja: ‘Míireen, mee luku.’

³⁰ Maa na pok, a na pënandul aguts di ukalabus, te uwal wi na luk wi ko wi na ka wi pëluk.

³¹ Bi bacintsul baleemp win bi bi ngëko par bi ja, ba juatsan mak; ba tsëp ee leents nawiak bukul bi ngëko par bi ja.

³² Din, nawiakul ruiul, a na jaul: ‘M ci naleemp na waraatsee! Ma n jampësau batsiatsu bëlieng, undo m dúgarin;

³³ a m kaats m doon kë yëkar buts acintsu naleemp ipës bi n yëkaru bi a?’

³⁴ Nawiakul riabats mak, a na gutsarul bawaay ukalabus ba pikaarul mak, te uwal wi na luk wi bëlieng ko wi na ka wi pëluk.

³⁵ Unk di Asin nji di batsi kë ro ind run buts, uci kara ñaan tsi ind jampësaats acintsul tsi uwaasul.”