MATEU 17 - KARÚK-PËRIM KAWALU Nouveau Testament

Bënaam Yeesu awitsësar

¹ Bi u par bi ngënu paaj, a Yeesu patsësaanda Per, ni Jakob, ni Joŋ, nan tsaari ni Jakob, a na tsëpand bukul ee paiya untunda uyampal.

² A bënaamul witsësar tsi bërun bukul. A urostuul kë yëk pi unu, a iŋiul witsa ifaacal pi ufac.

³ A Moises ni Eliyas cili tsi bukul, a bu kë ñakan ni Yeesu.

⁴ A Per ja Yeesu: “Ajug! Awara n ja pëci tsi. Uci m ŋal, ká n natsan ngënkundan ngëwaants tsi: ulon pa wi, ulon pa Moises, ni ulon pa Eliyas.”

⁵ Bi na wama bi ka ñakan, a kasa fietsi ee kund bukul. A përim pëni di kasa, a pa ja: “Ni ci-un Abuk nji; ni ŋali, man lílandërul. Nda cikëndëniul!”

⁶ Bi bafetsul te bi ko wan, a ba lënk mak, a ba yër alëm ngërostu bukul tsi utsia.

⁷ Maa a Yeesu kikee, a na kërara bukul, a na ja: “Nda natsaan, ind tsë lënk!”

⁸ Bi ba kat bi këkës, a ba win Yeesu koorul baŋ.

⁹ Bi bu kë pëni bi di untunda a bu kë welee, a Yeesu ja bukul përim pi: “Ind tsë leents ñaan ko wi nda win wink, te Abuk ñaan-najin ka tsënkëna ka natsee di pëcäts.”

¹⁰ A bafetsul yeparul ajaul: “We ka wun, a bapican-ulua ja ba roon bu kë ja, Eliyas ka un bërun pëbi?”

¹¹ A Yeesu yankës bukul, aja: “Ucar, Eliyas ka bi, në kakan ngëko bëlieng bi nga ro bi ci.

¹² Maa ma n ja ind, Eliyas abi ba, bu yëkëranatsul, a ba rolul ko wi ba ŋal wi. Unk buts di Abuk ñaan-najin kë noor run tsi iñan bukul.”

¹³ Din a bafetsul me u ci uleka Joŋ-namijan wi na ñakanaan wun bukul.

Yeesu ayësan napäts niints ni ucaay niaji a nuu cäts-bucäts

¹⁴ Bi ba band bi tsi kandënd bañaan, a niints nalon bi ee jintëla tsi bërun Yeesu a na ja:

¹⁵ “Ajug! Yëkari abuk nji niints ipës; ka cäts-bëäts a na noorand mak. Bëlon bëyaas në yër di mlik, a bulon bëyaas në yër di bërua.

¹⁶ Man tsijiul tsi bafetsu, maa bë bitse yëlan pëyësanul.”

¹⁷ A Yeesu yankësul, aja: “Ind bañaan uwal wi, ko wi nda ranj wi uwak, a nda colandëts bëga! Mán ci ni ind te lum-i? A ndu miira ind te lum-i? Tsíjiin nul tsi.”

¹⁸ A Yeesu yënt ucaay, a u pën di napäts, a na yës tsi uyëk umënts wun.

¹⁹ A bafetsul kika awok Yeesu, a ba patsësaandaul a ba jaul: “We ka wun a wund yëlaants përuak ucaay umënts wi?”

²⁰ A Yeesu yankës bukul, aja: “Aci uleka bi nda tienkëts bi uwak. Mán leents ind ucär: Uci nda ka uwak u liing wi ni pëbuk bëmutaar ndë yëlan pë ja untunda wi ‘Pënan tsi këtsëp ran,’ din u pën. Nda rits ka nin ko, wi nda rits wi ka yëlan përo.

²¹ Maa ucaay pi umënts wi, uruakëni aci bëñaan ni kabër-mlik.”

²² Bi ba ci bi di pëboos Galileeya, a Yeesu ja bukul: “Abuk ñaan-najin aka pii gutsa tsi iñan bañaan;

²³ bu ka fiŋul, në natsee di pëcäts tsi unu uwaajantsan.” Bi bafetsul te bi irim yan, a ba juatsan mak.

Uleka kaluk-uraasa

²⁴ Bi ba band bi Kafarnaum, a bayep bëluk-uraasa kato-kayëman tsëp aband di Per, a ba jaul: “Najukan ind di ka luk Drakëma këtëb a?”

²⁵ A Per yankës aja: “Eey-e.” Bi Per niaj bi kato, a Yeesu cakës un pëñakan, a na ja: “Simon, uci wi kë ja um? Basien tsi umundu, bë ja ba roon bu kë tsu bokoom pëluk pataant oo pëluk bëluk-uraasa? Babuk bukul oo batsooŋ?”

²⁶ A Per yankul ajaul: “Batsooŋ.” A Yeesu jaul: “Bi u ci bank, babuk bukul afac.

²⁷ Maa, pa n ja përits kaana ba juban, yaan bërëk, kë guts kabuetsi, kë toti utsëb ucak wi ka n jank wi kabuets; waabësi mtum, din kë win dul Estateera dëloole. Jejan pul kë wël bukul, pa nji, ni pa wi.”