MATEU 16 - KARÚK-PËRIM KAWALU Nouveau Testament

Bafariseu ni Basaduseu yep upibanaani

¹ A Bafariseu ni Basaduseu tsëp di Yeesu. Pa pëgunganul, a ba yepul na piban bukul upibanaani un pëni wi batsi.

² A na yankës bukul, aja: “Uyër-unu, ndë ja, ucaak waree wink, par batsi jankan.

³ A bëfa, ndë ja, ukëk ka ci ntsari, par batsi jank a ba jínëf. Nda me pëja nda win bënaam batsi, ndë yil jakëntsën ko wi kan ci wi, maa nda yëlaants pëjaakëntsën ngëpibanaani ngëwal!

⁴ Ban ntsari, ko wi ba kaalam wi te bë mets Nasien-batsi, a bu yep upibanaani ank! Kaats upibanaani wi ka wëla wi bukul, un cits wi wi Jonas wun.” A uu ba, a na ruk bukul, a na pën atsëp.

Bëko Bafariseu bëlëntsëntsaani

⁵ Bi bafetsul kë tsëp bi kalutar kacints kun, a ba fin pëtsëpand upom.

⁶ A Yeesu ja bukul: “Nda rukan ibats mak tsi uleka bëko Bafariseu bëlëntsëntsaani ni bi Basaduseu.”

⁷ A ba wejatsar, a ba jaalar përim pi: “Aci bi ngë tsijatsi bi upom.”

⁸ A Yeesu me ko wi bu kë ñakanaan wi, a na ja: “Ko wi nda tiesëts wi uwak! We ka wun nduu ñakan uleka bi nda tsijatsi bi upom?

⁹ Nda netse me këme-a? Nda lesats këpom kañan kan faa kunk bañaan ngëmiil kañan a (5.000)? A këcaa um ki nda tsëpand kun.

¹⁰ A nin nda lesats këpom ka wëla kunk bañaan ngëmiil ngëbaakër (4.000), a këcaa um ki nda tsëpand kun?

¹¹ Um di nda meets run u cits uleka upom wi n ñakanaan ind wun? Maa, nda rukan ibats mak tsi uleka bëko Bafariseu bëlëntsëntsaani ni bi Basaduseu.”

¹² Din, a ba ru me u cits uleka bëko-bëlëntsëtsaani upom wi na ro wu n ja, ba ruk ibats; maa aci uleka bëjukan Bafariseu ni Basaduseu.

Per aja, Yeesu ci-un Këristu

¹³ Bi Yeesu band bi pëboos Seesareeya Filip, a na yepar bafetsul aja: “Yën ni bañaan kë ja un Abuk ñaan-najin aci?”

¹⁴ A ba yankësul aja “Balon ka ja, Joŋ-namijan; a bacints, Eliyas; a balon, Jeremias oo nalon tsi bayëlia.”

¹⁵ A na ja bukul: “Maa ind, yën ni nda ja un man ci?”

¹⁶ A Simon Per ja: “Wi ci-un Këristu, Abuk Nasien-batsi nayësal.”

¹⁷ A Yeesu ñakan kak ajaul: “M naak, Simon, abuk Jonas; par cits uyamats ni pëñaak pibanu ngun ko wan, maa aci Asin nji nan cii di batsi.

¹⁸ A nji, ma njau: M ci Per, a tsi bulaak bëmënts bi, mán niew Ngëriisia nji, te ilëman mcäts di ka pe ngul uyëlan.

¹⁹ Mán wëlu inigësaani pësien batsi: Ko wi m tan wi ba këtan tsi utsia, wii tana buts di batsi; a ko wi m pac wi ba këpac tsi utsia, wii pacaa di batsi buts.”

²⁰ Din, a na ja bafets ba rits leents koon këleents ñaan ne nul ci-un Këristu.

Yeesu añakan uleka unoorul, ni pëcätsul, ni pënatseeul di pëcäts

²¹ Tsi uwal umënts wun, a Yeesu kur pëpiban bafetsul na ka pëtsëp Jerusalem, di nii unoor ri mak tsi bawiak Bajudeu, ni bawiak-bajakan, ni bapican-ulua, në fiŋaa, në natsee di pëcäts tsi unu uwaajantsan.

²² A Per kikësaanda Yeesu apatsand, a na ci tsi pëleentsarul koo jaul: “Aa-a, Ajug! Ko wan di ka baandë-niu!”

²³ Maa, a Yeesu witsësa, a na ja Per: “Pënan lawanin, Useetaani! M ci natsuin pëyër, par ngëwejatsu cits ngi Nasien-batsi, maa ngi bañaan-bajin.”

Ñaan, në lap kruusul

²⁴ Din, a Yeesu ja bafetsul: “Na ŋali pëfetsin, na bëran ngiicul; në lapan kruusul, nuu fetsin.

²⁵ Par, na ŋali pëbueran ubiiraul, ka niaman; maa na niamani ubiiraul undo nji, nii wini.

²⁶ We kat wun koon ñaan pëpe umundu upëban, maa na niaman beenul? Oo we wi ñaan kë wël wun, pa pëtsëtsëlaan ubiiraul?

²⁷ Par, Abuk ñaan-najin, kee bi ni ngëwaanjuul di përëmb Asin; uja kara ñaan, në lukul ngi na ro ngi ka ro.

²⁸ Mán leents ind ucär: Aka balon tsi ba nats biki tsi, ba dits biki kacikëndën pëcäts aa bu ka tsënkëna ka win Abuk ñaan-najin, ubiul di pësienul.”