MATEU 14 - KARÚK-PËRIM KAWALU Nouveau Testament

Pëcäts Joŋ-namijan

¹ Uwal umënts wun, a Eroodis, nasien Galileeya, te bu kë ñakanaan uleka Yeesu,

² a na ja baleempul: “Niints nan, aci Joŋ-namijan! Anatsee di bacäts, ka wun na ka uyëlan përo ngëko bawitsa.”

³ Par Eroodis aro mob Joŋ-namijan, a na tanul, a na ricul di ukalabus, undo Eroodia, aar ni ba tsaari Filip.

⁴ Par Joŋ aro ka jaul: “M kaats pëjejul ro aaru.”

⁵ A Eroodis ro ŋal pëfiŋ Joŋ, maa a na lal bañaan, par pa bukul, Joŋ aci nayëlia.

⁶ Maa, tsi unu ufesta pëlesës mbukara Eroodis, a abuk Eroodia ŋaats ci tsi ukay tsi bërun bañaan banduuree biki ufesta, a Eroodis lílandërul.

⁷ Wul ka wun na baaja, a na tsupul pëwëlul ko wi na ŋal wi ba këŋal.

⁸ A aninul tsuul na ja: Wëliin tsi, been Joŋ-namijan tsi pëlat.

⁹ A nasien juatsan tsi ko wan. Maa undo ubaajaul, ni undo ban tsoar biki kare ufesta, a na tsu na wëla been!

¹⁰ A na tsu been Joŋ falee di ukalabus.

¹¹ A been Joŋ tsijee tsi pëlat, a ba wëla napäts ŋaats; a na rëŋan bul aninul.

¹² A bafets Joŋ bi, a ba tsëpand puumul ee mooy; a ba tsëp ee leents Yeesu ko un par wi.

Yeesu aro bawitsa upom

¹³ Bi Yeesu te bi ko wan, a na pën tsul ni kanawa atsëp ulaalats pii pats tsëko. A bi kandënd bañaan te bi ko wan, a ba pëni di iraasa afetsanul ni iyots.

¹⁴ Bi Yeesu welee bi di kanawa, a na win kandënd bañaan, kawiak. A na yëkar bukul ipës, a na yësan bamoj bukul.

¹⁵ Bi bërëm jëk bi, a bafets kikee awokul, a ba jaul: “Tsëko tsi laayatsa, te unu par, wëtani indënd bañaan, pa ba tsëp ngëntab bee ba weel bariala.”

¹⁶ A Yeesu yankës bukul aja: “Bu fierats pëtsëp rul; nda wëlan bukul bariala, ind bërier ind.”

¹⁷ Maa, a ba jaul: “Ko wi wund ka wi tsi, aci këpom kañan rin, ni ngëtsëb ngëtëb.”

¹⁸ A na ja: “Nda da biindi a tsi.”

¹⁹ A na tsu kandënd bañaan ba tsoar tsi pëtsats pëñuaw. A na jej këpom kañan kun ni ngëtsëb ngëtëb ngun, a na kat këkës akaŋan batsi, a na baran. Din, na cëtës upom awël bafetsul, a bafetsul fa kandënd bañaan.

²⁰ A ba riala bëlieng asuets, a ba tsëpand ijats untaaja ni itëb, in cum yi irukësar.

²¹ Bañaan ban diala biki, bu ruakan bayënts ngëmiil kañan (5.000); bakaats ni upäts pinaatsa.

Yeesu ayandaar tsi ruets bërëk

²² Uba bukul, tsi uyëk umënts wun, a Yeesu tsu bafetsul ba gija kanawa, bu ka yërul bërun ba tsëp kalutar, a na wama ka wëtan bañaan.

²³ Bi na ba bi pëwëtan bañaan, a na paya untunda pëyots tsëko, në ñaan. A bërëm kë jëk, a na ci tsul koorul.

²⁴ A kanawa tsëp ba alawan kankay aband umetaari bërëk; a ngëmaroŋ kë kobar tsi kul, par arek ufuts.

²⁵ Tsi kafa-unu a Yeesu pën pëtsëp di bafetsul; a nuu yandaar tsi ruets bërëk.

²⁶ Bi bafetsul win bi nuu yandaar tsi bërëk, a ba lënk, a ba ja: “Aci napën-upën!” A ba lënk a bu kë lië,

²⁷ din a Yeesu ja bukul: “Nda kaan katsëb! Aci nji, ind tsë lënk.”

²⁸ A Per yankësul ajaul: “Ajug! Uci u ci wi, tsuin ka yandaar tsi ruets mlik pëbi ri wi.”

²⁹ A Yeesu jaul: “Bili!” A Per welee di kanawa, a na yandaar tsi ruets mlik pëtsëp di Yeesu.

³⁰ Maa, bi na win bi ufuts buer, a na lënk; a në kur pëmij, a nalië aja: “Ajug! Bueranin.”

³¹ Uyëk umënts, a Yeesu colan kañan amobul, a na jaul: “Natienkëts uwak! We ka wun m tsij ibats itëb?”

³² A ba gija kanawa, a ufuts tsëkandar.

³³ A ban ci biki tsi kanawa jintëla Yeesu, a ba ja: “Ucar, wi ci-un Abuk Nasien-batsi!”

³⁴ A ba lut a kata kankay aband pëboos Genesaret.

³⁵ A bañaan tsëko tsëmënts tsun yëkërën Yeesu, a ba wëtan ikuran di ngëntab nga woki ngi bëlieng, a ba tsijiul bamoj bëlieng.

³⁶ A ba buaraul na wët bukul ba kërara ŋal kambiantëmb kaŋiul. A ban këraraul biki bëlieng yësana.