MATEU 13 - KARÚK-PËRIM KAWALU Nouveau Testament

Yeesu atib përim, anaamanaan nagur

¹ Tsi unu umënts wun a Yeesu pëni ri kato, a na tsëp ee tsoar di kambaŋ bërëk.

² A indënd bañaan fayul, a u tsuul a na gija kanawa tsoar, a bañaan bëlieng ruka tsi kambaŋ bërëk.

³ A na tib bukul irim tsi ngëko ngëcumal, aja: “Nagur apën atsëp kagur;

⁴ a bi nu gur bi, a u ka u yër wi tsi kambaŋ bëga, a ngëko-ngëyits bi ee re.

⁵ A ulon yër tsi tsëko ilaak, tsan dëmbats tsi mboos; a u car amayi, par mboos rëmbats tsul.

⁶ Maa ukatee unu, a bunu tër a u kay, par ibuul niajats umboose mak.

⁷ A ulon yër tsi buwuul iyu; a buwuul iyu wiaka, a ba nëts.

⁸ A ulon yër tsi tsëko mgiji, a u buk mbuk: ulon a buk këbuk useent, au ulon buk ngëntaaja paaj, au ulon buk ngëntaaja ngëwaants.

⁹ Nan kai ibats iteeni, na teen!”

¹⁰ A bafets kika awokul, a ba yeparul ajaul: “We ka wun kë ñakanaan bukul uñakan katib-irim?”

¹¹ A Yeesu yank bukul aja: “Par ind, nda wëla pëme ngi pësien batsi, ngandoots ngunk mea. Maa bukul, bu wëlaatsa pëme ngul.

¹² Par nan kai, nii wëlaa në rëmban mak. Maa nan kaatsi, nii caanaa ŋal wi na ka wi.

¹³ Wul ka wun ndu n tib bukul irim, par bu koo teen, maa bu ri ka win; bu kë cikëndën, maa bu ri ka te, te bë ri ka me ko wi i pac wi.

¹⁴ Unk, a përim pi Isaaya nayëlia car pi leents pibanaa tsi bukul; iink di pa ja run: ‘Tsi pëte, ndu te; maa kaats bi ndu ro bi a pëjënts ind; tsi pëteen, ndu teen; maa kaats bi ndu ro bi a ndë win;

¹⁵ par ngëwaas bañaan biki, atamb; ibats bukul ka te uwar; bë puman këkës, pa përits win ni këkës bukul, pa përits te ni ibats bukul, pa përits jënts tsi ngëwaas bukul, pa përits witsee tsi nji, ka yësan bukul.’

¹⁶ Maa ind, ko wi nda naak wi! Par, nda win ni këkës ind, a nda te ni ibats ind.

¹⁷ Mán leents ind ucär: Bayëlia bacumal, ni bañaan bamabal, bë ro ŋal pëwin ngi nda ci ngink tsi pëwin, maa bu winats; ni pëte ngi nda ci ngink tsi pëte, maa bu teets.

Yeesu aleents ko wi Ka tib përim pan naamanaanapi nagur, pac wi

¹⁸ Bi u ci bank, nda cikëndëni-e përim pa naamanaana pi nagur, ko wi pa pac wi.

¹⁹ Utul u yër wunk tsi kambaŋ bëga, aci nan tei përim uleka Pësien, a meets ko wi pa pac wi, a nakaalam bi ee waj pul tsi uwaasul.

²⁰ A utul u yër wunk tsi tsëko ilaak, aci ban tee biki përim, a ba niiran pul ni ulílan,

²¹ maa pul niajats këwas bukul te bërika jon; ubaandi unoor tsi undo përim, din bu ka wëtan uwak.

²² A utul u yër wunk tsi buwuul iyu, aci ban te biki përim, maa gëtaag ubira ni karí përëmb umundu nëts përim a kaats bëkat.

²³ A utul u yër wunk tsi mgiji, aci ban tee kiki përim, a pa jënts bukul, a pa ka bëkat: ulon abuk këbuk useent, a ulon buk ngëntaaja paaj, a ulon buk ngëntaaja ngëwaants.”

Ka tib përim pan naamanaana pi umaani ni pëmaanamaan

²⁴ A Yeesu tib bukul pëlon përim kak, aja: “Pësien batsi anaam pi nints nan saali tsi mleempnaul.

²⁵ A bi bañaan ci bi tsi bëŋooy, a nabërul baandi ee saal pëmaanamaan di pëncuaf umaani, a na pën atsëp.

²⁶ Bi umaani wiakee bi, a uu bëban, a pëmaanamaan wiaka buts.

²⁷ A baleemp ajug kato bi ee jaul: ‘Ajug! Cits ink ucapi uwar wi m saal wun uleempnau-a? A pëmaanamaan bi pënëni tsum?’

²⁸ A na ja bukul: ‘Aci nabër ro un ko umënts wun.’ A baleemp jaul: ‘M ŋal wund pëtsëp wund kee rët pul-a?’

²⁹ A na pok bukul aja: ‘Man lënkar urët ind pëmaanamaan, ndë rëtand umaani.

³⁰ Nda wëtan pul pa wiaka tsëloole ni, te tsi kacët. Tsi uwal kacët, bacët ka jaa : Nda rëtan bërun pëmaanamaan ndë tan pul ka ro ibac, pii tëraa; maa ndë lueg umaani di kalëpats nji.’”

Ka tib përim pan naamanaana pi pëbuk bëmutaar

³¹ A na tib bukul pëlon përim kak, aja: “Pësien batsi, anaam pi pëbuk bëmutaar, pi ñaan jej pi a na saal tsi tsëkoul.

³² Ci pun pëbuk pan pe pi pëtienkëts tsi mbuk bëlieng, maa ba yaa ba wiaka, bu pe mko karëmb, din bu ruka ci bucanganani, ngëko-ngëyits.”

Bëko-bëlëntsëtsaani

³³ A na tib bukul pëlon përim, aja: “Pësien batsi anaam pi bëko-bëlëntsëtsaani, bi ŋaats jej bi abofëlan ni ifale i niiba yi iniibi iwaants, aa i lëntsëtsëni bëlieng.”

Ko un ka wi Yeesu kë tib këtib irim

³⁴ Yeesu aja ko wan bëlieng indënd bañaan, atib këtib bukul irim; kaats ko wi na ja wi bukul a tibats këtib bukul irim.

³⁵ Unk, pa u ci bi nayëlia ja bi; iink di na ja run: “Mán ñakanaan bukul koo tib këtib irim; mán leents ngëko nga beka ngi ki umundu juund ki.”

Yeesu apac Ka tib përim pan naamanaana pi pëmaanamaan

³⁶ Din, a Yeesu wëtan bañaan, a na niaj kato. A bafetsul tsëp awokul, a ba jaul: “Pac wund-e përim pi m tib punk m naamanaan pëmaanamaan tsi tsëko uleemp.”

³⁷ A na yankës bukul aja: “Niints na saalunk uwar, ci-un Abuk ñaan-najin.

³⁸ A tsëko uleempul, ci umundu. A ucapi uwar, ci babuk Pësien. A pëmaanamaan, aci babuk Nacok.

³⁹ A nabër nan saalunk pul, ci Ujabël. A kacët, ci ubaar umundu; a bacët, ci ngëwaanju.

⁴⁰ Bi pëmaanamaan rëta bunk a pa gutsa di bërua, unk ri wii ci run tsi ubaar umundu.

⁴¹ Abuk ñaan-najin, kee yëli ngëwaanjuul, ngë pënan tsi pësienul biki kan tsu biki bañaan ba yër tsi ngëjuban, ni biki kando biki ngëjuatsal,

⁴² bu ka gutsa di bërua bëwiak, tsul tsi irug kë ci tsun, ni kañaam irumaj.

⁴³ Din, bamabal kë kul pi unu, di pësien Asin bukul. Nan kai ibats iteeni, na tean!

Bëka ban beka bi

⁴⁴ Pësien batsi anaam pi bëka ban beka bi di tsëlon tsëko; a ñaan bi win bul, a na bek bul. A na tsëp ni ulílan, a nee waap bëkaul bëlieng, a na weel tsëko tsëmënts tsun.

Ilaants iwar, in ka yi bëkat.

⁴⁵ Pësien batsi anaam buts ni nawaapalëtsa nan ci tsi pëtsas ilaants i wara yi;

⁴⁶ a bi nee win pëlaants pëloole, pëñatsal, a na pën ee waap ko wi na ka wi bëlieng, a na weel pul.

Ka tib përim pan naamanaana pi pëtseenk tsi babuets

⁴⁷ Pësien batsi akaka naam pi pëtseenk pan gutsa pi di bërëk, a pa mob ngëkoraar ngëtsëb bëlieng.

⁴⁸ A bi pa cum bi, a bábuets kë totar pul kambaŋ bërëk, pa bu ka tsoar ka rat nga wara ngunk, bu ka tsu ri itekal; a nga waraatsa ngunk bu ka guts ngul.

⁴⁹ Unk di wii roaa run tsi ubaar umundu. Ngëwaanju kee nga bi, ngii patsës ba waraatsa biki tsi pëncuaf bamabal,

⁵⁰ ngë guts ba waraatsa biki di bërua bëwiak, tsul tsi irug kë ci tsun, ni kañaam irumaj.

⁵¹ Nda te aatsum ngëko ngi n ja ind ngank bëlieng-a?” A ba yankësul aja: “Ee-e.”

⁵² A na ja bukul: “Wul ka wun, napican-ulua nan ci nafets ngëko pësien batsi, anaam pi nawiak kato nan pënanii ngëko ngëwalu ni ngëjon tsi bëkaul.”

Yeesu niiranaatsa di Nasaret

⁵³ Bi Yeesu ba bi pëtib irim yan, a na pën tsul atsëp.

⁵⁴ A na band përaasaul pi na kusëna pi, a nuu jukan bañaan di kato-kajúki bukul aa ba pikra a bu kë ja: “Tsum tsi na pënanaani tsun bëlipal bi, ni ngëko bawitsa ngi?

⁵⁵ Namëntsi, cits iink abuk naliir nun-a? A aninul di ka jaka iink Maaria-a? A ban tsaar biki ni nul bayënts cits iink Jakob, ni Juse, ni Simon, ni Judas-a?

⁵⁶ A ban tsaar biki ni nul bakaats bëlieng bë cits iink ni inja-a? A tsum tsi na kaani tsun ngëko ngi bëlieng?”

⁵⁷ A na kaana ngëwaas bukul coka. Maa a Yeesu ja bukul: “Kaats tsi nayëlia rispitaaraatsa tsi, ucits ba tsi ucaakul ni di katoul.”

⁵⁸ A Yeesu roots bawitsa bucumal rul, undo bu kaats uwak.