MATEU 12 - KARÚK-PËRIM KAWALU Nouveau Testament

Ko wi ulua ja wi tsi uleka Unu-pënaakësa

¹ A tsi uwal umënts wan, tsi Unu-pënaakësa, a Yeesu par tsi ireeŋ mmaaj; uparul, a bafetsul kë cët mmaaj koo muac a bu kë re, par bu bonats.

² Bi Bafariseu win bi ko wan, a ba jaul: “Bafetsu ci bikink tsi përo ko un poka wi përoa tsi Unu-pënaakësa.”

³ Maa a Yeesu yank bukul, aja: “Nda jukats ko wi Dawid ro wi-a? Bi na bonats bi ni ban ci biki ni nul;

⁴ ni bi ba niaj bi kato-kayëman, a ba re upom uyëman; te a u ci aatsum upom wi ba kaats wi përe; nin nul, nin ban ci biki ni nul; aci koon bajakan din, ka bukun përe.

⁵ Oo nda jukats ko un jaka wink tsi tsua-a? Tsi ngënu pënaakësa, bajakan di kato-kayëman bë ja ba roon bu ri ka rëmban Unu-pënaakësa, te bu lacäts.

⁶ Maa, man ja ind: Nan pee kato-kayëman ci ink tsi.

⁷ Nda roon iink me ko wi përim pi pac wi, ‘Kayëk-ipës ki n ŋal kun, cits bëjakan,’ nda bitse ka ro lacan bañaan bandoots biki ko.

⁸ Par, Abuk ñaan-najin, ci-un Ajug Unu-pënaakësa.”

Yeesu ayësan ñaan nan cätsi kañan

⁹ A Yeesu pën tsul, a na tsëp ee niaj kato-kajúki bukul.

¹⁰ A u ka tsul ñaan nan cätsi kañan. A ba yepar Yeesu ajaul: “Pëyësan ñaan tsi Unu-pënaakësa, aniirana-a?” Bu jaul ank pa pëtsasëna bi bu kë tumtsarul bi.

¹¹ A na yepar bukul, aja: “Naom tsi ind, ci-un uci na ka unkaanel uloole rin, a u yër baar tsi Unu-pënaakësa, di ka mob na toti-a?

¹² Andes ñaan-najin nan pee unkaanel pëka bëkat! Wul ka wun, ulua aniiran përo uwar tsi Unu-pënaakësa.”

¹³ Din, a na ja kancäts kañan: “Colani kañanu!” A na colan kul, a ka kak aci kayësal pi kacints kul.

¹⁴ A Bafariseu cil utsand, a ba ci tsi pëñakanaan bi bu kë ro bi a bu ka fiŋul.

¹⁵ Maa a Yeesu me ko wan, a na pën di tsëko tsëmënts tsun. A bañaan bacumal fetsul, a na yësan bukul bëlieng;

¹⁶ a na ja bukul ba rits leents koon këleents ñaan ulekaul.

¹⁷ Aroa ank, pa u ci bi Isaaya nayëlia ro bi ja; iink di na ja run:

¹⁸ “Naleemp nji, ni n dati, nuu ni; nul ni n ŋali mak, a n lílandërul. Man tsu Uwejats nji tsi nul. Nul kee leents un ban cits biki Bajudeu uleka bëmabal.

¹⁹ Di ka ci tsi mantotëlër, a di ka liandar; a ñaan di ka te përimul di iga.

²⁰ Di ka cët pëjaam pan fama pi, a di ka jimb kames ki kan ruan ki, aa në tsënkëna ka tsu bëmabal ba gaañaar.

²¹ Din, ban cits biki Bajudeu ka watsaraan katimul.”

Yeesu ni Beelsebul

²² A niints ni ucaay niaji tsijee tsi Yeesu; aci nakuel, a na ci nayilats-pëlent. A Yeesu yësanul, din a nayilats-pëlent kë ñakan, a nuu win.

²³ A indënd bañaan pikra mak bëlieng, a bu kë ja: “Cits ink ni ci-un abuk Dawid a?”

²⁴ Maa, bi Bafariseu te bi ko wan, a ba ja: “Namëntsi ja nuu ruak ngëcaay, në ruakëna ngul Beelsebul, uwiak ngëcaay.”

²⁵ Maa a Yeesu me ibats bukul, a na ja bukul: “Pëbos pantowsër pi a pu këkam tsi pa ci tsi, di ka toman. A përaasa oo pëbuka pantowsër pi a pu kam tsi ci tsi, ka garsër.

²⁶ A uci Useetaani kë ruak Useetaani, akaman been bërier; a um di pësien kë kënats run?

²⁷ A uci u ci Beelsebul wi duu ruakëna wun ngëcaay, a babuk ind, bu ka ruakëna ngul yën-i? Wul ka wun, buk kë ci bawat ind pëleents.

²⁸ Maa, uci u ci Uwejats Nasien-batsi wi duu ruakëna wun ngëcaay, ndë me, ne pësien Nasien-batsi abaandi tsi ind.

²⁹ Oo, um di ñaan kë niaj run kato niints nan kai uyëlan, pii ca ngëkoul, uci na tanats niints namënts un brun? Uroko, në tanul bërun, a uu ba, në ca ngëko katoul.

³⁰ A ñaan nan citsi ni nji, aci tsi pëkamanin. A nan jukëlënatsi ni nji, aci tsi pëgar-garan.

Pëkar Uwejats-ujënts

³¹ Wul ka wun du n ja ind: Ujuban un ci wi-ba këci, ka jampësaa. A kakar kan karaa ki ba këkara Nasien-batsi, ka jampësaa; maa nan kari Uwejats-ujënts, di ka jampësaa.

³² A na njai ba kë ja përim pa mabats pi tsi uleka Abuk ñaan-najin, ka jampësaa; maa na njai ba kë ja përim pa mabats pi tsi uleka Uwejats-ujënts, di ka jampësaa, nin tsi umundu wi, nin tsi umundu wi kan bi wi.

Bëko, ni mbuk bul

³³ Uci bëko wara, mbuk bul ka wara; oo bëko waraatsa, mbuk bul di ka wara. Par, bëko ka meena mbuk bul.

³⁴ Ko wi nda ci wi ngëko-pëtsats! Um di nda yil run pëja ngëko ngëwar, ind ba waraatsa biki? Par, un cum wi uwaas, wi mtum kë ja wun.

³⁵ A ñaan na waree, ka pënani ngëko ngëwar tsi bëka bëwar; a na waraatsee, ka pënani ngëko ka waraats tsi bëka ba waraatsa bi.

³⁶ Man ja ind: Tsi Unu Kawat-pëleents, bañaan bëlieng ka leents uleka irim yi ba ñakan yi, in kaats yi bëkat.

³⁷ Par tsi irimu, kë faŋana; a tsi irimu kë lacana.”

Upibanaani wi Jonas ci wi

³⁸ A balon tsi bapican-utua tsi Bafariseu yankul aja: “Najukan! Wund aŋal pëwin upibanaani wi kan pëni wi ri wi.”

³⁹ A Yeesu yank bukul, a na ja: “Bañaan ntsari, ban kaalam biki, ni ba mobats biki tsi Nasien-batsi, ku ma bu yep upibanaani ank a! A-aa, i kaats upibanaani wi du wëla wi bukul, un cits wi wi Jonas wun, nayëlia.

⁴⁰ Par, bi Jonas ro bunk kënak këwaants, ni ngërëm ngëwaants di pëpës utsëb uwiak, unk buts di Abuk ñaan-najin kë ro run kënak këwaants ni ngërëm ngëwaants di utsia.

⁴¹ Tsi Unu kawat-pëleents, bañaan-ucaak Niniwe ka natsee ni bañaan ntsari, bu ka lacan bañaan ntsari. Par, bi Jonas leents bi bukul përim Nasien-batsi, a ba yaar ibats. A te, nan pee Jonas ci ink tsi.

⁴² A tsi Unu kawat-pëleents, nasien ŋaats nan pëni unk uleka utsia-ucaak, ka natsee ni bañaan ntsari, në lacan bukul. Par, apëni tsan buer tsi pëlawan, a na bi pëcikëndën bëlipal Salomon nasien. A te, nan pei Salomon ci ink tsi.

Ucaay unduaka wi, ka teenaman pëwitsa tsi u ruaka tsi

⁴³ Aja ucaay pëni di ñaan, u ya bi tsëko tsëkay pëtsas tsëko pënaakësas. Au ci uwinats tsëko pënaakësa,

⁴⁴ din u ja: ‘Mán witsa kato nji ki n pënë-ni ki.’ Uband, a u tsënk kato ci kajënts, a ka wetaa, a ngëko-ngëro tsua bi nga ka bi pëci,

⁴⁵ din u tsëp wii pënandi ngëlon ngëcaay paaj ni ulon, ngan pe ngi pëjuats; ngë niaj bametsu ngë ciina rul. A bëci ñaan namënts un butuami pe bëcak pëjuats. Unk ti wii ci run pa bañaan ntsari, ba kaalam biki.”

Anin Yeesu, ni ban tsaar biki ni nul Yeesu

⁴⁶ Bi Yeesu wama bi ka ñakanaan indënd bañaan, a aninul, ni ban tsaar biki ni nul Yeesu nats ri utsand, bu ka tsas pëñakanaanul.

⁴⁷ A ñaa n jaul: “Aninu ni ban tsaar biki ni wi, bu nats di utsand, bu ka tsas pëñakanaanu.”

⁴⁸ A Yeesu yankul jaul: “Noom ci-un anin nji, a bokoom ci bukun ban tsaar biki ni nji?”

⁴⁹ A na yuer bafetsul kañan, a na ja: “Anin nji, ni ban tsaar biki ni nji, bukul biki!

⁵⁰ Par, nan cii ba këci tsi përo uŋal Asin nji nan cii di batsi, namënts un aci nan tsaari ni nji, niints, ni nan tsaari ni nji, ŋaats, ni anin nji.”