MATEU 10 - KARÚK-PËRIM KAWALU Nouveau Testament

Yeesu ayël bafetsul, untaaja bukun ni batëb

¹ A Yeesu rui bafetsul, untaaja bukun ni batëb, a na wël bukul pëyëlan përuak ngëcaay, ni pëyësan mmoj bëlieng, ni mmaak man ci bi ba këci.

² Yi ci yun itim bapostolu, untaaja ni batëb: Nacäk aci Simon, a nuu jaka Per; ni ni ba tsaari Andëre; ni Jakob abuk Sebede, ni ni ba tsaari Joŋ;

³ ni Filip, ni Bartolomeu; ni Tomaas, ni Mateu nayep bëluk-uraasa; ni Jakob abuk Alfeu, ni Tadeu;

⁴ ni Simon ni kanjakee Nakamandar-ucaakul; ni Judas Iskarioti, nan bii ŋañ Yeesu.

⁵ A Yeesu ayël bukul untaaja bukun ni batëb, a na jaand bukul irim yi: “Ind tsë ya di bañaan ban cits biki Bajudeu, a te ind tsë niaj iraasa bañaan Samaaria;

⁶ maa nda tsëpan di kato Israel, bukul ba niam biki pi ngënkaanel.

⁷ Utsëp ind nduu leentsand bañaan ne Pësien batsi woki.

⁸ Nda yësani bamoj, ndë tsu bacäts ba natsee, ndë jëntsan ba maak biki kantseul-kajankal, ndë ruakand ngëcaay. Nda tseenda te nda lukats, nda tseendan buts nda rits luka.

⁹ Ind tsë tsij nin uwëru, nin uncaam-utsak, nin baceenc di ikalpa ind.

¹⁰ Ind tsë tsij nin kamaañ bëyaas, nin imíisa itëb, nin iraala, nin pëndog; par naleemp aka pëwëla barialaul.

¹¹ Tsi kara përaasa pi nda niaj pi, oo untab, nda tsasandul ñaan nan jëntsi pëwelan ind; ndë ci rul te upën ind.

¹² Uniaj ind kato, ndë wël mboos.

¹³ A uci nawelan ind ci, din pëfac pi nda ñaan pi ka ci tsi kato kamënts. Maa ucits ank, pë kaki di ind.

¹⁴ A u ci ñaan welanats ind, nin cikëndënats irim ind, upën ind tsi kato kamënt kun oo përaasa pëmënts, ndë raaf kandëpe ka pënan tsi itsiim ind.

¹⁵ Mán leents ind ucär: Tsi unu kawat-pëleents, Sodooma ni Gomoora ka matar përaasa pëmënts pëjuatsan.

Pënoor-noorana ka baandë-ni bafets Këristu

¹⁶ Nda teenan-e! Nji ka n yël ind ink pi ngënkaanel tsi pëncuaf ngënjurtu. A bi u ci bank, nda ciin balipal pi ngëko-pëtsats, ndë ciind ban tsëk biki, pi ngëtuuba.

¹⁷ Nda rukan ibats tsi bañaan, par bu ka tsëpand ind di ito kawat-pëleents; bu ka bup ind di ito-ijuki.

¹⁸ Tsi undo nji, nduu tsëpanda tsi bërun bakana-gëcaak, ni tsi bërun basien; unk, ndë piban bukul, ni bañaan ban cits biki Bajudeu, ne nda ci ba maatir biki nga dola ngi.

¹⁹ A utsëpanda ind kawat-pëleents, ind tsë wejats bi ndu ñakan bi, ni bi ndu ja bi. Par, tsi uler umënts, ndu leentsa ko wi ndu ja wi.

²⁰ Par, cits ind ka ñakan bukun, maa Uwejats Asin ind ka ñakan wun tsi ind.

²¹ Ñaan ka mob ni ba tsaari, në gutsul na fiŋa; niints-nambukari ka mob napäts në gutsul na fiŋa; upäts ka natsara bábuk bukul, bu ka tsu bukul ba fiŋa.

²² Bañaan bëlieng ka bër ind undo katim nji; maa nan tambandari te tsi utuami, në buer.

²³ A u ci ba noor-nooran ind tsi pëlon përaasa, nda tukari pëcints; mán leents ind ucär: Nda netse ka jëkëlan iraasa Israel bëlieng, Abuk ñaan-najin, ka witsee.

Yeesu awatsan bañaan

²⁴ Najuk, peets najukanul, a naleemp peets nawiakul.

²⁵ A najuk ci pi najukanul, din u liing; a naleemp ci pi nawiakul, din u liing. Uci ajug kato kë rua ‘Beelsebul,’ a m do um bañaan katoul!

²⁶ Wul ka wun, ind tsë lal bukul; par kaats ko un kunda wi, un dits wi ka kundësa, nin un beka wi, un dits wi ka mea.

²⁷ Ko wi n leents ind wi tsi bërëm, nda ñakani tsi pënak dakaŋ; a ko wi nda kuetana wi, nda leentsan di ruets ito.

²⁸ Ind tsë lal biki kan fiŋ biki uliaf ñaan a te bu yëlaants pëfiŋ ulugum; maa nda lalan na yëlani pëcok ulugum ni uliaf di nfeernu.

²⁹ Ngëkac pëweer ngëtëb, di ka waapara iink patakan pëloole-a? Maa nin uloole tsi ngul di ka yëri tsi utsia, uci Asin ind ŋalats.

³⁰ A ŋal iweel iyeen ind, apinaa bëlieng.

³¹ A bi u ci bank, ind tsë lal; par ngëkac pëweer cum ngunk, maa nda pe ngul pëka bëkat.

³² A ban ja biki tsi bërun bañaan bëci namiñ, nji buts, tsi bërun Asin nji nan cii di batsi, mee ja bukul bë ci bamiñ.

³³ Maa ba wëtanin biki tsi bërun bañaan, nji buts, tsi bërun Asin nji nan cii di batsi, mee wëtan bukul buts.

³⁴ Ind tsë wejats nda ja ne man bi pa pëtsiji pëfac tsi umundu; nji i biits pa pëtsiji pëfac, maa ulaac.

³⁵ Par man bi pëtsu napäts niints na gar ni asinul, napäts ŋaats na gar ni aninul, ŋaats na nimee na gar ni anin ayënul;

³⁶ a babër ñaan, a ci biki ba bof biki pëbuka.

³⁷ A ñaan na ŋali asinul oo aninul apean bëŋal bi na ŋalin bi, tsënkaants pëjaa aci namiñ; a na ŋali abukul niints oo abukul ŋaats apean bëŋal bi na ŋalin bi, tsënkaants pëjaa aci namiñ.

³⁸ A na lapatsi kruusul pëfetsin, tsënkaants pëjaa aci namiñ.

³⁹ A ñaan na ŋali pëtsijëna ubiiraul, ka niaman; a na niamani ubiiraul tsi undo nji, kee na win.

⁴⁰ A na welan indi, awelanin; a na welanini, awelan ka yëliin.

⁴¹ A ñaan na welani kayëliin undo aci nayëlia, kee yank bëluk pi nayëlia; a na welani ñaan namabal undo aci pi namabal, kee yank bëluk pi namabal.

⁴² Mán leents ind ucär: Na wëli nalon tsi baties biki ŋal karaani kaloole ki mlik mjuab, undo aci nafetsin, bëlukul di ka niaman yaas.”