MATEU 1 - KARÚK-PËRIM KAWALU Nouveau Testament

Pëbuka Yeesu Këristu

¹ Ulibëru un piban wi pëbuka Yeesu Këristu, nul nan cii abuk Dawid, a Dawid ci abuk Abraam:

² Abraam buk un Isaak, Isaak buk un Jakob, Jakob buk un Juda ni ban tsaar biki ni nul,

³ Juda buk un Peres ni Sera, a Tamar ci-un anin bukul; Peres buk un Esrom, Esrom buk un Aram,

⁴ Aram buk un Aminadabi, Aminadabi buk un Naason, Naason buk un Salëmon,

⁵ Salëmon buk un Boas, Raab ci-un anin Boas; a Boas buk un Obed, Ruuti ci-un anin Obed; a Obed buk un Jese,

⁶ Jese buk un Dawid nasien. A Dawid buk un Salomon; anin Salomondo un ci aar Urias;

⁷ Salomon buk un Reoboan, Reoboan buk un Abia, Abia buk un Asa,

⁸ Asa buk un Josafat, Josafat buk un Joram, Joram buk un Osias,

⁹ Osias buk un Jotam, Jotam buk un Akaas, Akaas buk un Esekiyas,

¹⁰ Esekiyas buk un Manase, Manase buk un Amon, Amon buk un Josias,

¹¹ Josias buk un Jekonias ni ban tsaar biki ni nul; bu bëka tsi uwal wi bañaan-ucaak Israel moba wi a ba tsëpanda ucaak Babiloonia.

¹² Bi ba tsëpanda bi Babiloonia, a Jekonias bi buk Salatiel; a Salatiel buk un Sorobabel,

¹³ Sorobabel buk un Abiuud, Abiuud buk un Eliakim, Eliakim buk un Asor,

¹⁴ Asor buk un Sadoki, Sadoki buk un Akim, Akim buk un Eliuud,

¹⁵ Eliuud buk un Eleasar, Eleasar buk un Matan, Matan buk un Jakob,

¹⁶ Jakob buk un Juse, ayën Maaria nan buki Yeesu, nul ni ka n jakee Këristu.

¹⁷ Unk a u ci bëlieng ijër untaaja ni ibaakër, pëkur tsi Abraam te tsi Dawid. A pëkur tsi Dawid te utsëpanda bukul Babiloonia, a u ci buts ijër untaaja ni ibaakër. A pëkur tsi utsëpanda bukul Babiloonia te tsi Këristu, a u kaka ci buts ijër untaaja ni ibaakër.

Ubukara Yeesu Këristu

¹⁸ Ubukara Yeesu, iink di u ci run: Maaria aninul aci nampëli Juse; maa bë netse ka tsoar a na mob pëpës tsi pëyëlan Uwejats-ujënts.

¹⁹ Juse ayënul aci niints na mabi, ŋalats pëkawaranul, na wejats pëgar ni nul te ñaan di ka me ko un ka wi.

²⁰ Maa bi nu wejats bi përo ko wan, a u ka uwaanju Ajug un cili wi tsi nul tsi utsaafi, a u jaul: “Juse abuk Dawid! Tsë lënk pëyank Maaria, aaru. Par amob pëpës maa aci ko un biini wi tsi Uwejats-ujënts.

²¹ Ka buk napäts niints, kë tsuul katim, Yeesu. Par nul ka bueran un bañaanul tsi ngëjuban bukul.”

²² A ko wan bëlieng ci, pa pëpibanaan u ci wun wi Ajug ro wi ja nayëlia na ja; iink di na ja run:

²³ “Teenan-e! Ŋaats na meetsi niints kee mob pëpës, në buk napäts niints, nuu jaka, Emanuel,” un ci wi, Nasien-batsi ni nja uci pa colësiaara.

²⁴ Bi Juse teeni bi, a na ro ko wi uwaanju Ajug jaul wi, a na yank aarul;

²⁵ maa meets ruetsul, te aarul tsënkëne buk napäts niints. A Juse tsuul katim, Yeesu.