MARKU 9 - KARÚK-PËRIM KAWALU Nouveau Testament

¹ A na kaka ja bukul: “Mán leents ind ucär: Aka balon tsi ba nats biki tsi, kaats bi bu kë teenaman bi pëcӓts, aa bu ka tsënkëna ka win pësien Nasien-batsi baandi ni pëyëlan.”

Bënaam Yeesu awitsësar

² Bi u par bi ngënu paaj, Yeesu tsëpand Per ni Jakob ni Joŋ, na pats ni bukul baŋ, di ruets untunda uyampal. A bënaamul witsësa tsi bërun bukul.

³ A iŋi-bëtiemul witsa faac faŋ, a yu lik-lik; kaats nanijar tsi umundu nan yëlani pëfaacan pi yul.

⁴ A Eliyas ni Moises pibandari tsi bukul, a bu kë ñakan ni Yeesu.

⁵ Din, a Per ja Yeesu: “Rabi! Awara n ja pëci tsi; nda ju ngë natsan ngënkundan ngëwaants, ulon pa wi, ulon pa Moises, ulon pa Eliyas.”

⁶ Per meets ko wi nu ja wi, par bu lënk mak.

⁷ A kasa bi ee kund bukul. A përim pëni di kasa, a pa ja: “Ni ci-un Abuk nji, na ŋalee! Nda cikëndëniul!”

⁸ Tsi uyëk umënts wun, ba teen afayësan, maa bu winats ñaan; aci koon Yeesu koorul ni bukul.

⁹ Bi bu kë welee bi di untunda, a Yeesu ja bukul përim pi: “Ind tsë leents ñaan ko wi nda win wink, te uwal wi Abuk ñaan-najin kë natsee wi tsi bacӓts.”

¹⁰ A ba mob tsi përim pi Yeesu ja pi bukul, bu kë yepëlar ko un ci wi kanatsee-di-bacӓts.

¹¹ A ba bafetsul yeparul aja: “We ka wun, a bapican-ngëtsua ja ba roon bu kë ja Eliyas ka un pëwitsee bërun?”

¹² A Yeesu ja bukul: “Ucär, Eliyas aka pëbi bërun nii kakan ngëko bëlieng. We picana wun tsi uleka Abuk ñaan-najin? Ajaka, ka noor mak në bëraa.

¹³ Maa ma n ja ind, Eliyas abi ba, a ba roul ngëko bëlieng ngi ba ŋal ngi, bi u ro bi picana tsi ulekaul.”

Yeesu ayësan napäts niints ni ucaay niaji

¹⁴ Bi nu bi bi tsi bafets, a ba win kandënd bañaan kawiak fay bukul, a bapican-ngëtsua kë totëlar irim ni bukul.

¹⁵ A bu kë win Yeesu, din a kandënd bañaan pikra, a ba túk ee leenul.

¹⁶ A na yepar bukul aja: “Uleka we wi nduu totëlaraan wun irim ni bukul?”

¹⁷ Nalon tsi kandënd bañaan yankësul aja: “Najukan! Man tsijiu abuk nji ni ucaay urika-ñakan niaji.

¹⁸ Aja tsi u mobul tsi, u watul tsi utsia, mtum kë pën pëlëts, nuu ñaam irumaj, në witsa ka tamb ŋak. Man ñaan bafetsu ba ruak, a bu yilaants.”

¹⁹ Din, Yeesu yank bukul aja: “Ind bañaan ntsari, baranj Uwak! Mán ci ni ind te lum-i? Mán miira ind te lum-i? Nda tsijiin nul.”

²⁰ A ba tsijiul nul. Bi napäts win bi Yeesu, a ucaay urika-ñakan lic-licanul awat tsi utsia, a nuu bera-bera, a mtum kë pën pëlëts.

²¹ Yeesu yepar asin napäts aja: “Lum di ko wi baandë-niul run?” Na jaul: “Ki na ci ki napäts.

²² Ngëyaas ngëcumal u watul di bërua, ngëyaas ngëcumal u watul di mlik, pa pëfiŋul. Maa uci m yëlan përo ko ulon, yëkar wund ipës kë tsënk wund.”

²³ Yeesu jaul: “Uci m yëlan! Na Uwaki, ayëlan përo ngëko bëlieng.”

²⁴ Uyëk umënts wun asin napäts lie aja: “Man Uwak! Tsënkin tsi kakaats-u Uwak nji!”

²⁵ Bi Yeesu win bi kandënd bañaan kë túki, a na yënt ucaay, aja : “Wi, ucaay urika-ñakan, urika-te, ma njau pënan tsi nul! Tsë niajul kak.”

²⁶ Ucaay lië, a u lic-licanul ni yilaani, a u pën. A napäts naam pi acӓts, a bañaan bacumal kë ja bëlieng acӓts.

²⁷ Maa a Yeesu mobul tsi kañan akatul anatsan, a na nats.

²⁸ Bi Yeesu niaj bi kato, a bafetsul yeparul, tsi mpats, a ba jaul: “We ka wun a wund yëlaants përuak ucaay wi?”

²⁹ A na yank bukul aja: “Ukoraar umënts wi yëlanaatsa pëpënana, ucits ba tsi bëñaan ni kabër-mlik.”

Yeesu kaka ñakanaan uleka pëcӓtsul ni kanatsee-di-pëcӓts

³⁰ Ba pën tsul, a ba par bi Galileeya; a Yeesu ŋalats ñaan me.

³¹ Par aro ka jukan bafetsul, a nuu ja bukul: “Abuk ñaan-najin kee gutsa tsi iñan bañaan. Bu ka fiŋul a uu ba, në natsee di pëcӓts tsi unu uwaajantsan.”

³² Maa, bafetsul meets ko wi përim pan pac wi, a ba lal pëyeparul.

Naom pe un pëci nawiak?

³³ A ba baandi përaasa kafarnaum. Di bametsu kato, Yeesu yepar bukul aja: “Wee nda ro wun ka ŋom tsi bëga?”

³⁴ Maa ba yëŋandar, par tsi bëga, bu ro ka ŋom, pëme nan pei pëci nawiak.

³⁵ A Yeesu tsoar, a na rui untaaja bukun ni batëb, a na ja bukul: “Uci ñaan ŋal pëci nacak, na ciin natuami tsi bañaan bëlieng, në ci nakëmand bañaan bëlieng.”

³⁶ Na jej napäts naties awúnkëra, a na natsanul tsi pëncuaf bukul, a na ja bukul:

³⁷ “Ñaan na welani nalon tsi upäts uties biki tsi katim nji, nji ni na welan un. A ñaan na welanini, cits nji ni na welan un, maa na yëliini.”

Ñaan nan bëratsi njai, aci ni nja

³⁸ A Joŋ jaul: “Najukan! Wund awin ñaan a nuu ruak ngëcaay tsi katimu, a wund pokul përo ank, par fetsats nja.”

³⁹ Yeesu ja: “Ind tsë pokul, par ñaan cits, ni kan doi bawitsa tsi katim nji, a uu ba në jaarin u waraatsa wi.

⁴⁰ Par ñaan nan bëratsi njai, aci ni nja.

⁴¹ Mán leents ucär: Ñaan na indi karaani mlik tsi katim nji pa nda raan, undo nda ci bañaan-kandata, di kee niaman bëlukul.

Pëtsu ñaan na yër tsi ujuban

⁴² Maa, ñaan nan tsui nalon tsi baties ba Uwak bikink tsi nji a na juban, amatul na roon në tana pëlaak pëwiak tsi katsuts, në gutsa di bërëk.

⁴³ Uci kañanu ka tsuu kun kë juban, falan kul. Amat pëjaa m ci tsi ubiira ni kañan kan fala ki, ni pëjaa m gutsara nfeernu ni iñan itëb, di bërua ban dits bi ka jimba; [

⁴⁴ ukúc rul di ka cӓts, a bërua di ka jimba.]

⁴⁵ Uci pëtsiimu ka tsuu pun kë juban, falan pul. Amat pëjaa m ci tsi ubiira ni pëtsiim pëloole, ni pëjaa m gutsara nfeernu ni këtsiim këtëb;

⁴⁶ ukúc rul di ka cӓts, a bërua di ka jimba.

⁴⁷ A uci pëkësu ka tsuu pun kë juban, kuatësi pul. Amat pëjaa m niaj pësien Nasien-batsi ni pëkës pëloole, ni pëjaa m gutsara nfeernu ni këkës këtëb;

⁴⁸ ukúc rul di ka cӓts, a bërua di ka jimba.

⁴⁹ Par, kara ñaan ka waayanaana bërua.

⁵⁰ Pënam, awara; maa uci pa katse tap, we wi ndu kakanaan wun pul pa tap? Nda kaan pënam tsi ngëbiira ind, ndë ka pëfac tsi nda ci tsi.”