MARKU 8 - KARÚK-PËRIM KAWALU Nouveau Testament

Yeesu arialan bañaan ngëmiil ngëbaakër (4.000)

¹ Tsi ngënu ngëmënts ngun, bi kandënd bañaan kawiak kaka bi júk, a bu kaats ko wi bu kë re wi, Yeesu rui bafets a na ja bukul:

² “Man yëkar kandënd bañaan biki ipës, bu ro ngënu ngëwaants ngi ba ci ngi ni nji, a bu kaats ko wi ba re wi.

³ Uci n wëtan bukul ba tsíis ito bukul bërialaats, bu kee labatsa di bëga, par balon tsi bukul bu pëni tsëko tsëlaw.”

⁴ A bafetsul yankul aja: “Tsum tsi ñaan kë kaani tsun upom, pa pësuetsan bañaan biki tsi ulaalats wi?”

⁵ A Yeesu yepar bukul aja: “Këpom um ki nda ka kun?” A ba yankul aja: “Paaj ni pëlon.”

⁶ A na tsu bañaan ba tsoar tsi utsia. Na jej këpom paaj kun ni pëlon, na baran, na tawës kul a bafetsul ba fa. A ba fa kandënd bañaan.

⁷ A ba ro tsij buts ngëtsëb ngëties, ko uties. Bi na ba bi pëbaran, na tsu bukul kak ba fa ngul.

⁸ A ba bariala aa ba suets; a irukësar bofëlana, a i cum këcaa paaj ni pëlon.

⁹ Bë ro ruakan bañaan ngëmiil ngëbaakër (4.000). Din, Yeesu wëtan bukul ba tsëp.

¹⁰ Tsi uyëk umënts wun, a na gija kanawa ni bafetsul atsëp pëboos Dalmanuta.

Bafariseu ayep upibanaani

¹¹ Bafariseu pëni ee kur pëyepar Yeesu irim. Ba yepul upibanaani un pëni wi batsi, pa pëteen-teenanul.

¹² A Yeesu ti mak di uwaasul, a na ja: “We ka wun bañaan ntsari kë yep upibanaani? Mán leents ind ucär: Bañaan ntsari di ka a nin upibanaani.”

¹³ A na ruk bukul, a na kaka gija kanawa awitsa kalutar kacints.

Bëko Bafariseu bëlëntsantsaani

¹⁴ Bafetsul afin pëtsëpand upom. A u ci pëpom pëloole rin pi ba tsij pun di kanawa.

¹⁵ A Yeesu car aja bukul: “Nda teenan-e, nda rukan ibats tsi uleka bëko Bafariseu bëlëntsantsaani, ni bëko Eroodis bëlëntsantsaani.”

¹⁶ A bafetsul kë ñakan tsi ba ci tsi, koo ja: “Aci bi ngë kaats bi upom.”

¹⁷ Yeesu me ko wi bu kë ñakanaan wi, na yepar bukul aja: “We ka wun a nduu ñakandar undo kakaats-upom? Nda netse yëkërëna-a? A nda teets-a? Nda tamb ngëwaas-a?

¹⁸ Nda ka këkës, a nda ri ka win-a? Nda ka ibats, a nda ri ka te-a? A nda lesats

¹⁹ bi n tawës bunk këpom kañan kun, pa bañaan ngëmiil kañan (5.000); ijats um cum yun irukësar i nda bofëlan-i?” A ba yankul aja: “Untaaja ni itëb.”

²⁰ A na ja bukul: “A bi n tawës bunk këpom paaj kun ni pëlon pa bañaan ngëmiil ngëbaakër (4.000), këcaa um cum kun irukësar i nda bofëlan-i?” A ba yankul aja: “Paaj ni pëlon.”

²¹ A na ja bukul: “Nda netse te-a?”

Yeesu ayësan nakuel di Betësaida

²² Bë band Betësaida, bañaan tsijiul nakuel, a ba buaraul na këraraul.

²³ Yeesu mob nakuel tsi kañan, a na pënandul tsi untab. A na tsuul itúj di këkës, a na paful iñan, na yeparul aja: “M win ko ulon-a?”

²⁴ A na teenan këkës, a na yankul, aja: “Man win bañaan, ma win ba naam pi mko, bu kë yandaar.”

²⁵ Din, Yeesu kaka tsuul iñan tsi këkës, niints win uwar, a na kak ayës; a na yëkëran ngëko bëlieng uwar.

²⁶ Yeesu kë wëtanul na tsíis katoul, a na jaul: “Tsë niaj koon këniaj untab.”

Per aja, Yeesu ci-un Kandata

²⁷ Yeesu pën ni bafetsul pëtsëp ngëntab Seesareeya Filip. Tsi bëga, a na yepar bafetsul, aja: “Yën ni bañaa n ja un man ci?”

²⁸ A ba yankul aja: “Joŋ-namijan; balon ka ja m ci Eliyas, a balon kak kë ja m ci nalon tsi bayëlia.”

²⁹ Din, a na yepar bukul aja: “Maa ind, yën ni nda ja un man ci?” Per yankul aja: “Wi ci-un Mesia.”

³⁰ Yeesu pok bukul, ba rits leents koon këleents ñaan ko wan tsi ulekaul.

Yeesu ñakanaan uleka pëcӓtsul, ni kanatsee-di-pëcӓts

³¹ A na kur pëjukan bukul a nuu ja: Abuk ñaan-najin aka pëtsua tsi unoor uwiak; bawiak Bajudeu, ni bawiak-bajakan, ni bapican-ngëtsua, bu ka fatsul ufets, në fiŋaa; a tsi unu uwaajantsan, në natsee di pëcӓts.

³² Aleents bukul ko wan ajëntsan. Per ruul apatsand, a na kur pëpokul.

³³ Maa Yeesu witsësa akaŋan bafetsul këkës na leentsar Per aja: “Useetaani, pënan tsi ufets nji! Par, m cits tsi pëwejats ngëko Nasien-batsi, maa ngi bañaan-bajin.”

Kara ñaan aka pëlap kruusul

³⁴ Din, na rui kandënd bañaan ni bafetsul a na ja bukul: “Uci ñaan ŋal pëfetsin, aka pëbër ngiicul në lap kruusul, në ci tsi pëfetsin.

³⁵ Ñaan na ŋali pëbueran ubiiraul, ka niaman; maa na niamani ubiiraul tsi undo nji, ni tsi undo Upetsan-uwar, ka bueran.

³⁶ A we kat wun ñaan-najin pëpe umundu bëlieng, në niaman ubiiraul?

³⁷ Wee ñaan-najin yëlan wun pë pa pëtsëtsëlaan ubiiraul?

³⁸ Par, nan kawee tsi uleka nji ni irim nji tsi bañaan ntsari biki, ba mabats biki tsi Nasien-batsi a ba ciind bajuban, Abuk ñaan-najin buts, kee kawa tsi ulekaul ubiul ni ngëwaanju ngëyëman di përëmb Asin.”