MARKU 7 - KARÚK-PËRIM KAWALU Nouveau Testament

Yeesu, ni undimaan

¹ Bafariseu, ni balon bapican-ngëtsua ban pëni biki Jerusalem, bi ee júk afay Yeesu.

² A ba win balon tsi bafetsul kë rialaan iñan in jëntsats yi, un ci wi, bu ñawats iñan.

³ Par Bafariseu ni Bajudeu bëlieng, bu mob tsi undimaan bajon; bu ri ka riala, uci ba ñawats iñan bërun ajëntsan.

⁴ A uja ba pëni di kënjëkënts, bu ri ka riala uci ba ñawësarats bërun. A u ka ngëko ngëcumal tsi undimaan bukul, ngi bu kë ro ngi; pi kañaw-iraani, ni iliiki, ni iŋi itsak, ni ikaab.

⁵ A Bafariseu, ni bapican-ngëtsua yepar Yeesu aja: “We ka wun bafetsu mobats tsi përo undimaan bajon, maa bu kë rialaan iñan in jëntsats yi?”

⁶ A na yank bukul aja: “Isaaya, nayëlia, acar aleents ucär tsi uleka ind banguungu, par iink di u picana run: ‘Bañaan biki ka bëndanin ni iruj, maa ngëwaas bukul alawanin.

⁷ Bu ka rëmbanin tsi ko un kaats wi bëkat; bu kë jukan bañaan ngëtsua bañaan-bajin.

⁸ Bu bër utsua Nasien-batsi, a ba mob tsi undimaan bañaan-bajin.’”

⁹ A na kaka ja bukul: “Nda yil-bëro a nda bër utsua Nasien-batsi, a nda mob tsi përo undimaan ind.

¹⁰ Par Moises aja: ‘Rëmbani asinu ni aninu.’ A na kaka ja: ‘Nan kari asin oo anin, aka na roon në fiŋa.’

¹¹ Maa ind, nda ja nda roon nduu ja: ‘Uci ñaa n ja asinul oo aninul: Ko wi m do wi ka pyank tsi nji, aci Korban, un ci wi, utseend uyëman pa Nasien-batsi,’

¹² din ndë tsuul përits roor asinul ulon ko, oo aninul.

¹³ Unk, ndë tsu përim Nasien-batsi kakaats-bëkat, undo undimaan ind bërier ind, wi nduu jukan wi; a nduu roond ngëcumal nga naam ngi ni.”

Ngëko ngi kan tsopan ngi ñaan-najin

¹⁴ A Yeesu kaka rui kandënd bañaan, a na ja bukul: “Nda cikëndënin bëlieng, ndë te uwar!

¹⁵ Kaats ko un ci wi di utsand, wi kan niaj wi di ñaan-najin, u tsopanul; maa wi kan pëni wi di bametsu ñaan-najin, ci wun wi kan tsopanul wi.

¹⁶ Uci ñaan ka ibats iteeni, na tean.”

¹⁷ Bi na pën bi tsi kandënd bañaan aniaj bametsu kato, a bafetsul yeparul uleka përim pi na tib pank.

¹⁸ Din, na ja bukul: “Ane ind buts, nda lipats koon këlip-a? Nda meets ne, ngëko utsand bëlieng, ngi ka niaj ngi di ñaan-najin yilaants pëtsopanul;

¹⁹ par di ka niaj di uwaasul, maa di pëpësul, wii pëni pa utsad.” Unk, apiban ne, ngëko ngi kan dea ngi bëlieng ajënts.

²⁰ A na ja: “Ko wi kan pëni wi di ñaan-najin, ci wun wi kan tsopan wi ñaan-najin.

²¹ Par di bametsu ngëwaas bañaan-bajin, dul di ngëwejats nga waraatsa ngi kë pënë-ni run, ngëko katúk-ufuts, kakiej, kafiŋ-ñaan,

²² mjubi, kariisan-ko, kajuats-uwaas, pëlipëna ñaan, pëwëtandar tsi ngëko katúk-ufuts, mankocëlar, mankarar, mdiangar, bëfuur.

²³ Ngëko kawaraatsa ngëmënts ngi bëlieng, ka pënë-ni di bametsu ñaan-najin, ngë tsopanul.”

Uwak ŋaats nan citsi Najudeu

²⁴ Yeesu natsa apën tsul, a na tsëp pëboos Tiiru. Na niaj kato kalon, a ŋalats ñaan pëme na ci rul, maa yilaants pëjaa meaatsa na ci rul.

²⁵ A u ka nalon ŋaats ni ucaay niaji abukul ŋaats; uteul wun bañaan kë ñakanaan uleka Yeesu, a na bi ee jintëla tsi itsiimul.

²⁶ Ŋaats namëntsi aci nagërek, apënë-ni Feniisia Siiria. A na buara Yeesu na ruak ucaay tsi abukul ŋaats.

²⁷ Maa Yeesu jaul: “Wëtan bërun upäts ba suets, par waraatsa pëjej bariala upäts pëgutsar bul ngëbuus ngëties.”

²⁸ A Ŋaats yankësul aja: “Aci ucär Ajug; maa ŋal ngëbuus ngëties, aja nga roon ngu re icuk upäts tsi utsia.”

²⁹ Din a Yeesu jaul: “Tsi undo përim pan, tsëpan, ucaay apën tsi abuku.”

³⁰ Ŋaats witsa katoul, a na tsënk napäts piints tsi bëkaab; ucaay pën ba tsi nul.

Yeesu ayësan narika-te nan ciindi narika-ñakan

³¹ Yeesu kaka pëni di pëboos Tiiru, a na par-ni di Sidon ni di pëboos Dekapolis, aband bërëk Galileeya.

³² Din, a ba tsijiul narika-te nan ciindi narika-ñakan, a ba buaraul na paful iñan.

³³ A Yeesu pënandul tsi kandënd bañaan alaayatsaand; a na tsuul ikuanj di ibats, a na túj, a na këraraul pëndiamënt.

³⁴ A uu ba, na katar këkës batsi, na ti mak, a na ja: “Ef-fata,” un ci wi “ricësari!”

³⁵ Tsi uyëk umënts wun, ibatsul rícësa, a pëndiamëntul kabusa, a nuu ñakan uwar.

³⁶ A Yeesu ja bukul, ba rits leents koon këleents ñaan ko wan. Maa, ŋal bi na pok bank bukul, ba ru pe këpe pëñakanaan.

³⁷ Ba pikra mak, a bu kë ja: “Aro ngëko bëlieng, uwar; atsu ŋal barika-te a bu kë te, barika-ñakan bu kë ñakan.”