MARKU 6 - KARÚK-PËRIM KAWALU Nouveau Testament

Yeesu niiranaatsa di Nasaret

¹ Yeesu pën tsul, a na tsëp ucaakul, a bafetsul tsëp ni nul.

² Uband Unu-pënaakësa, a na kur bëjukan di kato-kajúki. A bañaan bacumal kë cikëndënul, a ba pikra, a bu kë ja: “Tsum tsi namëntsi pënanaani tsun ngëko ngi? Kaom kameko ci kun ka wëlaul kink a nuu ro ngëko bawitsa ni iñanul?

³ Ni, cits iink nalír-a? Abuk Maaria; a ban tsaar biki ni nul cits iink Jakob, ni Juse, ni Judas, ni Simon-a? A ban tsaar biki ni nul, bakaats, bë cits iink ni nja tsi-a?” A ngëwaas bukul coka tsi undoul.

⁴ Maa, Yeesu ja bukul: “Kaats tsi nayëlia rëmbanaatsa tsi, ucits ba tsi ucaakul, ni tsi bayëtsul, ni di katoul.”

⁵ A yëlaants përo bawitsa bëlon dul, ucits ba balon bamoj rin, biki na paf biki iñan, na yësan bukul.

⁶ A na pikra bi ba Uwakats bi. A nuu yaana ngëntab nga woki ngi tsul, a nuu jukan.

Yeesu ayël bafetsul untaaja ni batëb

⁷ Arui bafetsul, untaaja bukun ni batëb, a na jot pëyël bukul batëb-batëb, na bukul pëyëlan përuak ngëcaay.

⁸ Na ja bukul ba rits tsëpand ko tsi bëyaas, ucits ba pëndog rin: nin pëpom, nin kamaañ, nin uncaam di ikalpa.

⁹ Maa, ba tsuun iraala, ba rits waa imíisa itëb.

¹⁰ A na ja bukul: “Kato ki nda niaj ki, nda ciin dul te upën ind tsul.

¹¹ A uci di tsëlon tsëko, bañaan welanats ind a bë cikëndënats ind, upën ind tsul ndë raaf kandëpe iyots ind pa pëpibanaan ba lac.”

¹² Din a ba pën, a bu kë leents përim koo ja bañaan ba yaar ibats.

¹³ Bu ruak ngëcaay ngëcumal tsi bañaan, a bu kë kër bamoj bacumal mkër, a bu kë yësan bukul.

Pëcӓts Joŋ-namijan

¹⁴ Eroodis, nasien, ate uleka Yeesu, par katimul aruka mea mak; balon ka ja: “Joŋ-namijan natsee un di pëcӓts, ka wun na ka pëyëlan përo ngëko bawitsa.”

¹⁵ A balon kë ja: “Aci Eliyas.” A balon kak ja: “Aci nayëlia, pi nalon tsi bayëlia.”

¹⁶ Maa, Eroodis kë te ko wan, a na ja: “Aci Joŋ, ni n tsui na fala been, natsee un di pëcӓts.”

¹⁷ Par nul Eroodis, undo bi na jej bi Eroodia anim, aar ni ba tsaari Filip, ka wun na mob Joŋ-namijan atan, a na ricul di ukalabus.

¹⁸ Par Joŋ aja Eroodis: “M niiranaatsa pëjej aar atsau nim.”

¹⁹ A Eroodia riabatsar Joŋ a na ŋal pëfiŋul, maa yilaants;

²⁰ par Eroodis alal Joŋ, ame na ci niints namabal, najënts; a na waayul. Aja na teul, katse ka me ko wi nu ro wi, maa në ŋal aatsum puu cikëndënul.

²¹ A unu uwar baandi, wi Eroodis kë ro wi ufesta ubëkaraul; arui bawiak tsi baleempul, ni bawiak basondaari, ni bawiak tsi Galileeya, pa bariala ufesta.

²² Bi abuk Eroodia ŋaats niaji bi a nuu kay, a na líl Eroodis, ni biki na ruuri biki ufesta. Din, Eroodis nasien nja napäts ŋaats: “Yepin ko wi m ŋal wi, ka u.”

²³ A na baajaul aja: “Ko wi m yepin wi ba këyepin, ka u, ŋal ank u ci pëcuaf pësien nji.”

²⁴ A napäts ŋaats pën ee yepar aninul, aja: “Wee wi ndu yepul wun?” Aninul jaul: “Been Joŋ-namijan.”

²⁵ Tsi uyëk umënts wun, a napäts ŋaats niaj tsi ko un car wi ee tsënk nasien, a na jaul: “Man ŋal wi pëwëlin been Joŋ-namijan tsi pëlat, tsi ko un jonats wi.”

²⁶ A nasien juatsan mak; maa undo ubaajaul, ni undo biki na ruuri biki ufesta, a ŋalats pëpokul.

²⁷ Ucar umënts wun, na tsu nagaarir na ya nii tsiji been Joŋ-namijan. Nagaarir ya ee fal been Joŋ-namijan di ukalabus.

²⁸ A na tsiji bul tsi pëlat, ee napäts ŋaats. A napäts ŋaats bul aninul.

²⁹ Bi bafets Joŋ te bi ko wan, a ba bi ee jej puumul, a ba mooy pul.

Yeesu arialan bañaan ngëmiil kañan (5.000)

³⁰ A bapostolu júk afay Yeesu, a ba leentsul ngëko ngi ba ro ngi bëlieng, ni ngi ba jukan ngi.

³¹ A na ja bukul: “Nda pëni ndii naakësa ko uties di tsëko tsa laayatsa tsi.” Par bu kaats uwal bariala, undo bañaan bacumal biki kan bi biki a bu kë tsëp.

³² Din, a ba gija kanawa, bukul rin, a ba tsëp di tsëko tsa laayatsa tsi.

³³ Maa, a bañaan bacumal win bu kë tsëp, a ba yëkëran bukul, ba pëni di iraasa bëlieng, a bu kë túk ni iyots pëtsëp rul, a ba band bukul bërun.

³⁴ Bi Yeesu kë welee bi di kanawa, a na win kandënd bañaan kawiak, a na yëkar bukul ipës, par bë ci pi ngënkanel ngan kaats ngi nayafan. A na kur pëjukan bukul ngëko ngëcumal.

³⁵ Bi unu ruka bi tsëp, bafetsul bi tsi nul, a ba jaul: “Tsëko tsi alaayatsa, a bërëm kë tsas pëjëk;

³⁶ wëtani bañaan biki bu ka tsëp ngëntab ireeŋ, ni ngëntab nga woki ngink, bu kee weel ko wi bu kë re wi.”

³⁷ Maa, Yeesu yank bukul aja: “Ind bërier ind, nda an bukul bariala.” A ba jaul: “Wund ka tsëp pi weeli upom un kës wi ngëseent ngëtëb uncaam Dinaariu, pii bukul ba re-a?”

³⁸ A Yeesu ja bukul: “Këpom um ki nda ka kun? Nda tsëpan ndii teen!” A ba tsëp ee teen, a ba jaul: “Këpom kañan, ni ngëtsëb ngëtëb.”

³⁹ Din, a Yeesu tsu bafetsul ba tsoaran bañaan bëlieng ba ro ijúk-ijúk, tsi pëtsats pëñuaw.

⁴⁰ A ba tsoar apatsësar, bu ro ijúk-ijúk: ilon aci bañaan useent, a ilon ci bañaan ngëntaaja kañan.

⁴¹ A Yeesu jej këpom kañan kun, ni ngëtsëb ngëtëb ngun, a na kat këkës akaŋan batsi, a na ja ngëwar, na cëtës upom a na bafetsul ba fa bañaan. A ngëtsëb ngëtëb ngun, ba fa buts ngul bañaan bëlieng.

⁴² Ba riala bëlieng a ba suets;

⁴³ a bafetsul bofëlan irukësar upom ni i ngëtsëb, a i cum ijats untaaja ni itëb.

⁴⁴ Ban de biki upom, bë ci bayënts ngëmiil kañan (5.000).

Yeesu ayandaar tsi ruets bërëk

⁴⁵ Tsi uyëk umënts wun, a Yeesu tsu bafetsul ba gija kanawa ba yërul bërun, pëtsëp kalutar bërëk Betësaida; a na wama ci tsi pëwëtan bañaan ba tsëp.

⁴⁶ Bi na ba bi pëwëtan bañaan, a na paya ruets untunda bëñaan.

⁴⁷ Uyër pëcaal, a kanawa ruka ci di pëcuaf bërëk. A Yeesu yots koorul tsi kankay.

⁴⁸ A na win ba noor mak tsi pëpaat kanawa, par ufuts akaŋi bukul. A uu wokan kafa-unu, a Yeesu pëni pëbi tsi bafetsul, a nuu yandaari tsi ruets bërëk, a na naam ka par bukul.

⁴⁹ Maa, bi bafetsul kë winul bi a nuu yandaar tsi ruets bërëk, a ba ja ne aci napën-upën, a ba lië.

⁵⁰ Par bu winul, a ba lënk bëlieng. Din a Yeesu ñakanaan bukul aja: “Nda uwakan! Aci nji, ind tsë lënk!”

⁵¹ A uu ba, na gija kanawa aci ni bukul, a ufuts tsëkandar. A ba pikra bëlieng;

⁵² par bë meets ko wi bawitsa upom pac wi, undo ngëwaas bukul atamb.

Yeesu ayësan bamoj di Genesaret

⁵³ Bi ba lut bi bërëk, a ba band pëboos Genesaret, a ba tan kanawa tsi pëkëŋ.

⁵⁴ Bi ba gíjësee bi di kanawa, a bañaan yëkëran Yeesu.

⁵⁵ Din, a ba yaana pëboos ajëkëlan, a bu kë tsiji bamoj tsi ikaab, pëbiindi tsi ba te tsi ba këte Yeesu ci.

⁵⁶ A uja kara tsëko tsi na niaj tsi, ngëntab, oo iraasa, oo ngëntab ireeŋ, bu ka tsëpand bamoj di kënjëkënts; bu kë ñaanul na wët bukul ba kërara ŋal kambiantëmb kaŋí-bëtiemul rin. A ban këraraul biki bëlieng yësana.