MARKU 5 - KARÚK-PËRIM KAWALU Nouveau Testament

Yeesu ayësan niints ni ucaay niaji

¹ A ba band kalutar bërëk kacints, di pëboos bañaan Geraasa.

² Bi Yeesu welee bi di kanawa, din a nalon niints ni ucaay niaji pëni di ibuk pii jëk ni nul.

³ Nul, aciina di ibuk, a uja ŋal ni mkorente, ñaan yilaants pëtanul.

⁴ Par ngëyaas ngëcumal na janka, a na tana ni mkorente, maa na mar-maran mkorente, na fam-faman ngëjank. A ñaan cits, nan yilaani pëmobul.

⁵ Bërëm ni pënak, nuu yaana ibuk ni ngëntunda, nuu lië rul, nuu lupan uliaful ni ilaak.

⁶ Bi na win bi Yeesu wama lawani, na túk ee jintëla tsi bërunul,

⁷ a na lië mak aja: “Wee m kaaraan wun ni nji, wi Yeesu Abuk Nasien-batsi Kanpe pëci di ruets? Man ñaanu tsi katim Nasien-batsi, cӓts luekanin.”

⁸ Par Yeesu ro ci tsi pëjaul: “Ucaay, pënan tsi niintsi.”

⁹ A Yeesu yeparul aja: “Katímu ka jaka um?” A na yankul aja: “Katím nji ka jaka Kandënd, par wund acum.”

¹⁰ A na buara Yeesu mak, pa na rits ruak ngul nga pën tsi pëboos pëmënts pun.

¹¹ A pëtan ngënkëmbe pëwiak ro ci tsi kafeer, tsi kambaŋ untunda.

¹² A ngëcaay buara Yeesu, ajaul: “Gúts wund di ngënkëmbe gun, wund ka niaj ngul.”

¹³ A Yeesu niiran ngul. A ngëcaay pën, a nga niaj ngënkëmbe; a pëtan panduakan pi ngënkëmbe ngëmiil ngëtëb (2.000), këra-këree di ruets ee yër di bërëk, a nga yoora.

¹⁴ A bayafan ngënkëmbe túk ee leents di përaasa ni di ngëntab, ko un par wi. Din, a bañaan pëni pii teen ko un par wi.

¹⁵ Bi ba baandi bi tsi Yeesu, a ba win niints ni ngëcaay roi niaj kak aci uwar, na tiema iŋi a na tsoar. Din a ba lënk.

¹⁶ Ba maatir biki ko un par wi, leents bañaan ko un par-na wi niints ni ngëcaay roi niaji, ni uleka ngënkëmbe.

¹⁷ A ba kur pëbuara Yeesu, na pën na lawan pëboos bukul.

¹⁸ Bi Yeesu kë gija bi kanawa, niints ni ngëcaay roi niaj buaraul na wëtul në ci ni nul.

¹⁹ Yeesu niiranatsul, maa na jaul: “Tsëpan katou, di bañaanu; leentsan bukul ngi Ajug rooru ngi bëlieng, ni bi na yëkaru bi ipës.”

²⁰ Din, a niints namënts un pën atsëp; a na kur pëleents tsi pëboos Dekapolis, ngi Yeesu roorul ngi bëlieng; a bañaan pikra bëlieng.

Yeesu natsani abuk Jairus ŋaats di pëcӓts, a na yësan ŋaats ni kan tulee pëñaak

²¹ Bi Yeesu gija bi kanawa awitsa kalutar kacints, a kandënd bañaan kawiak fayul; aro ci di kambaŋ bërëk.

²² A nalon tsi bawiak kato-kajúki baandi tsi Yeesu, ka jaka Jairus. A nu win Yeesu, na yër tsi itsiimul,

²³ a na ci tsi pëbuaraul koo ja: “Abuk nji ŋaats ka tsas pëcӓts; bili kii paful iñan, në buer, në kak ka ci nayësal.”

²⁴ A Yeesu tsëp ni nul. A kandënd bañaan kawiak kë fetsul, bu kë miepul.

²⁵ A u ka nalon ŋaats, ni kan tulee pëñaak, ko undo wi ngëwaanu untaaja ni ngëtëb;

²⁶ anoor mak tsi iñan bacuunkan bacumal, acok ko wi na ka wi bëlieng, te matats koon këmat; maa a na ru pe këpe pëci tsi unoor.

²⁷ A bi na te bi bu kë ñakanaan uleka Yeesu, a na bi tsi ufets Yeesu tsi kandënd bañaan, a na kërara kaŋí-bëtiemul.

²⁸ Par aja tsi uwejatsul: “Ŋal uci iŋiul yi bëtiem din, yi n kërara yun, ka yës.”

²⁹ Tsi uyëk umënts wun, a pëñaakul tsañan pëtula, a na te tsi uliaful na yësana pëmaakul.

³⁰ Tsi ucar umënts wun a Yeesu te pëyëlan pën tsi nul; a na witsësa tsi pëncuaf kandënd bañaan, a na ja: “Yën kërara un iŋi nji?”

³¹ A bafetsul jaul: “M win kandënd bañaan ci tsi pëmiepu, a m du kë ja, yën kërarain un.”

³² Maa Yeesu teen afayësan, pëwin nandoi ko wan.

³³ A ŋaats me ko undola wi tsi nul, a na lal a nuu lënk, din a na bi ee jintëla tsi bërun Yeesu, a na leentsul ucär bëlieng.

³⁴ A Yeesu jaul: “Abuk nji, uwaku abueranu, tsëpan ni pëfac, m yësana pëmaaku.”

³⁵ Bi na wama bi ka ñakan, balon ban pëni biki kato nawiak kato-kajúki baandi, a ba jaul: “Abuku ŋaats acӓts; we ka wun a m wama ka nooran Nawiak?”

³⁶ Maa Yeesu yankats irim yan, na ja nawiak kato-kajúki: “Cats lënk, Uwakan din.”

³⁷ A niiraants ñaan pëfetsul, ucits ba Per, ni Jakob, ni Joŋ nan tsaari ni Jakob.

³⁸ Bi ba band bi kato nawiak kato-kajúki, a Yeesu win bañaan juatsan, bu kë kaan a bu kë lië mak.

³⁹ Bi na niaj bi, a na ja bukul: “We ka wun nda juatsan, a nduu kaan? Napats cӓtsats, aŋooy këŋooy.”

⁴⁰ A ba ci tsi përiatul. Maa, bi na ba bi përuakar bukul bëlieng utsand, a na tsëpand asin abuk nji, ni anin abuk nji, ni ban ci bukunk ni nul, a na niaj di abuk nji ci ri.

⁴¹ Na mob kañan napäts, a na jaul: “Talita, kum!” Uci pa colësiaara, aci: “Napats nampëli, manjau, natsaan.”

⁴² Tsi uyëk umënts wun, napäts natsa a nuu yandaar, par aka ngëwaanu untaaja ni ngëtëb. Din, ba pikra mak.

⁴³ A Yeesu ja bukul ñaan tsë me koon këme umënts wi; a na ja, napäts aa bariala.