MARKU 4 - KARÚK-PËRIM KAWALU Nouveau Testament

Përim pan tiba pi anaamanaana nagur

¹ Yeesu akaka jot bëjukan di kambaŋ bërëk. A kandënd bañaan kawiak júk tsi nul, a u tsuul a na gija kanawa ee tsoar, alaayatsa kambaŋ bërëk. A bañaan bëlieng ci di kambaŋ bërëk tsi kankay.

² A nuu jukan bukul ngëko ngëcumal, koo tib këtib bukul irim. Tsi bëjukanul a na ja:

³ “Nda cikëndëni! Nagur apën pii gur utul;

⁴ a bi nu gur bi, a u ka u yër wi tsi kambaŋ bëga, a ngëko-ngëyits bi ee re.

⁵ A ulon yër tsi tsëko ilaak, tsan dëmbats tsi mboos; a u car amayi, par mboos rëmbats tsul.

⁶ Maa ukatee unu, a bënu tër a u kay, par kaats ibuul.

⁷ A ulon yër tsi buwuul iyu, a buwuul iyu wiaka a ba nëts, a bukats.

⁸ A ulon yër tsi tsëko mgiji, a u natsa wiaka, a u buk mbuk; pëlon buk këbuk ngëntaaja ngëwaants, a pëlon buk ngëntaaja paaj, a pëlon buk useent.”

⁹ Din, a na ja: “Nan kai ibats iteeni, na tean!”

¹⁰ Bi Yeesu laayatsa bi, a untaaja bukun ni batëb, ni bando bukunk fayul, yeparul uleka katib-irim.

¹¹ A Yeesu yank bukul aja: “Ind, un doots wunk mea, wi pësien Nasien-batsi, aa ind; maa ban ci biki di utsand, bukul bëlieng bu koo jukanaana tsi katib-irim,

¹² par bu koo teen bu ka win, maa bë ri ka yëkëran; bu koo cikëndën bu ka te, maa bë ri ka me; ucits ank, bu ka yaar ibats, din bu ka jampësaa.”

¹³ A na yepar bukul aja: “Nda meets përim pan tiba pink-a? A um bi ndu me bun irim bëlieng i kan tiba yi këtiba?

¹⁴ Nagur, agur përim;

¹⁵ balon bañaan, bë ci pi utul tsi kambaŋ bëga, tsi përim wayana tsi; bi ba te bi pul, ucar umënts wun a Useetaani bi ee pënan përim pa wayana punk di ngëwaas bukul.

¹⁶ A balon buts ci pi utul un gura wunk di tsëko ilaak; bi ba te bi përim, ucar umënts wun a ba niiran pul ni ulílan.

¹⁷ Maa bukul bërier bukul bu liincӓts, bë ci ban dits biki ka jon; ubaandi unoor, oo pënoor-noorana tsi undo përim, din bu ka wëtan uwak.

¹⁸ A balon kak, bë ci pi utul un gura wunk tsi buwuul iyu; bi ba te bi përim,

¹⁹ a bu kë wejats ngëko umundu, bëka ni karí-ko kë raac bukul; a ngëmënts ngan nëts përim, atsu pul kakaats-bëkat.

²⁰ Maa balon bañaan, bë ci pi utul un gura wunk tsi tsëko mgiji; bu te përim a ba niiran pul, a ba ka bëkat; nalon a tsij këbuk ngëntaaja ngëwaants, nacints këbuk ngëtaaja paaj, a nacints kak këbuk useent.”

Përim pan tiba pi anaamanaana ulamp

²¹ A Yeesu kaka ja bukul: “Ane ñaan ka tsiji ulamp, në jej pëcaa ka kundëna, oo në tsu di utsia bëkaab a? Wul tsijaatsee pii tsua di tsëpafi-a?

²² Par kaats ko un beka wi un dits wi ka pibanaa, nin un kunda wi un dits wi ka meaa.

²³ Nan kai ibats iteeni, na tean.”

²⁴ A na kaka ja bukul: “Nda rukan ibats tsi ko wi ndu te wi. Kaniibi ki nduu niibëna ki, kul kee niibëna ind kun buts, a ndë watsësaa.

²⁵ Par nan kai, nii aa; a nan kaatsi, nii caanaa ŋal wi na ka wi.”

Përim pan tiba pi anaamanaana utul

²⁶ A Yeesu kaka ja: “Iink di pësien Nasien-batsi naam dun: ñaan agur utul tsi utsia;

²⁷ bërëm ni pënak, na ŋooy oo na natsa ank, utul aci tsi pëmayi a uu wiaka, te nul meets bi u ro bi.

²⁸ Utsia ja u roon u buki bërier : ucak, aci katsats kañuaw, kii tsij kanëng; a tsi ituami, mbuk ka cum kanëng.

²⁹ A uwal wi mbuk jank wi, din në fali ni ukaawi, par uwal kacët aband.”

Përim pan tiba pi anaamanaana pëbuk bëmutaar

³⁰ A Yeesu kaka ja: “We wi nja kë naamanaan wun pësien Nasien-batsi? Oo uwom unaamanaani winja kë pibanaan wun pul?

³¹ Anaam ni pëbuk bëmutaar, pan ci pi pëbuk pan pe pi pëtienkëts tsi mbuk mko bëlieng tsi utsia;

³² maa uwal wi pa saala wi, pë wiaka, pë ruka ci bëko ban pe bi mko uwoorta bëlieng; bë jabani ina iwiak, a ngëko-ngëyits kë bi koo cangan tsi bëlími bul.”

³³ A Yeesu kë leents bukul përim, koo tib këtib irim icumal pi imënts yan, tsi ko wi ba yëlan wi pëte.

³⁴ Yeesu di ka ñakanaan bukul, ucits ba tsi katib-irim; maa tsi mpats, nëë pac bafetsul ngëko bëlieng.

Yeesu anatsan ukëk di bërëk

³⁵ Tsi unu umënts wun, uyër pëcaal, a Yeesu ja bafetsul: “Ngë lut pa kajara kacints kun.”

³⁶ Bi ba patsësar bi ni kandënd, a ba tsëpand Yeesu tsi kanawa ki na ciina kunk; a ilon inawa ci ni nul.

³⁷ A ukëk uwiak natsee, a ngëmaroŋ kë kobar tsi kanawa, a ku tsas pëcum mlik.

³⁸ A Yeesu ro ci di bëŋooy di ufets kanawa, a na paf beenul tsi upafi. A ba wambul, a ba jaul: “Najukan! Nja ka cӓts, a m tsuuts ko-a?”

³⁹ A na teeni, a na leentsar ukëk, a na ja bërëk: “Tsëkandari! Yëŋandari!” A ukëk nats, a tsëko juabuts jok.

⁴⁰ Din a na ja bukul: “We ka wun a nda lal iink? Nda netse ka uwak-a?”

⁴¹ A ba lënk mak, a uja bandoon biki bu ka ja bacints bukul: “Namëntsi aci naom? Par, aja ŋal ukëk ni bërëk, ngë ro ko wi na ja wi!”