MARKU 16 - KARÚK-PËRIM KAWALU Nouveau Testament

Yeesu anatsee di pëcӓts

¹ Bi Unu-pënaakësa par bi, a Maaria kanpënë-ni Magëdala, ni Salome, ni Maaria anin Jakob, weel ulicar pa pëtsëp pii kër tsi puum Yeesu.

² Kafa-unu tsi unu ucak kanëm, ukatee unu, a ba pën pëtsëp di pëbuk.

³ A bu kë yepëlar tsi ba ci tsi koo ja: “Yën ka këlar nja un pëlaak na pënan tsi mtum pëbuk?”

⁴ Maa, ukat bukul këkës, a ba win pëlaak pando pi sëtsëna pëbuk këla pënëna, te pul aci pëwiak pan.

⁵ Bi ba niaj bi pëbuk, a ba win ulon upaas tsoar tsi kajara kariir, atiema iŋi ifaacal; a bakaats pikra, ba lënk mak.

⁶ Maa, na ja bukul: “Ind tsë lënk. Ndu tsas Yeesu Kanpënë-ni-nasaret, nul nan doi rieŋa di kruus. Anatsee di pëcӓts; nul cits tsi. Nda teenan-e tsëko tsi na ro tsi piintsana.

⁷ Maa nda tsëpan dii leents bafetsul ni Per; nul ayër ind bërun pëtsëp Galileeya; dul di ndu winënul run, bi na ro bi ja ind.”

⁸ A bakaats cili, ba túk alawan pëbuk, par bu pikra bëlieng, a ngëliaf bukul kë lënk. Maa bë jaats ñaan ko, par bë lal.

Yeesu apibandar tsi këkës Maaria kanpënë-ni Magëdala

⁹ Bi Yeesu natsee bi di pëcӓts tsi unu ucak kanëm, a na pibandar ucak tsi këkës Maaria Magëdala, ni na pënanii ngëcaay paaj ni ulon.

¹⁰ A na tsëp ee leents ko wan bando biki ci ni Yeesu. Bu ro juatsan a bu kë kaan.

¹¹ Maa bi ba te bi u jaka Yeesu ci nayësal, te Maaria Magëdala awinul, bu Uwakats.

Yeesu apibandar tsi bafetsul batëb

¹² Upar ko wan, a Yeesu kaka pibandar ni bëlon bënaam tsi balon batëb tsi bafetsul, bi ba ci bi tsi bëga pëtsëp ngëntab ireeŋ.

¹³ A ba witsee ee leents banduka bukunk; maa, ŋal bukul batëb bukun, bu Uwakats.

Yeesu apibandar tsi bafetsul untaaja ni naloole

¹⁴ Tsi utuami, a Yeesu pibandar tsi bafetsul untaaja ni naloole, bi ba ci bi tsi bariala. A na leentsar bukul, undo kakaats-uwak ni katamb-ngëwaas bukul; par bë Uwakats ba winul bukunk, bi na natsee bi di pëcӓts.

¹⁵ A na ja bukul: “Nda tsëpan tsi umundu bëlieng, nda leentsan bañaan bëlieng Upetsan-uwar.

¹⁶ Ñaan na Uwaki a na mijana, në buerana. Maa na Uwakatsi, në lacana.

¹⁷ A ngëpibanaani ngi, ka ci ngun ni ba Uwak biki: Tsi katim nji, bu koo ruak ngëcaay, bu koo ñakan mleents mwalu,

¹⁸ bu koo mob ngëko-pëtsats ni iñan bukul; uci ba raan ko wi kan fiŋ wi, di ka ro bukul ko; uja ba paf iñan tsi bamoj, bamoj ka yës.”

Yeesu apaya batsi

¹⁹ Bi Yeesu, Ajug ba bi pëñakanaan bukul, a na tsëpanda batsi, a na tsoar tsi kariir Nasien-batsi.

²⁰ A bafetsul tsëp ee ka leents Upetsan-uwar di ngëleka bëlieng. Ajug kë leemp ni bukul; a tsi ngëpibanaani ngan ci ngi tsi përolaa, a nuu piban përim baaraan pëci.