MARKU 14 - KARÚK-PËRIM KAWALU Nouveau Testament

Bajudeu ci tsi pëtsas bi bu kë ro bi aa bu ka fiŋ Yeesu

¹ A u ruka ngënu ngëtëb, pa Ufesta-pëbuer ni ufesta kare-upom un tsijats wi bëko-bëlëtsatsaani ka baandi. A bawiak-bajakan, ni bapican-ngëtsua kë tsas bi bu kë par-na bi kafӓl, aa bu ka mob Yeesu ba fiŋ.

² Maa, a ba ja: “Kaats pëci tsi unu ufesta, pa mangúsëlar përits ci tsi bañaan.”

Nalon ŋaats atular Yeesu ulicar tsi been

³ Bi Yeesu ci bi di Betaania, a ba tsoar bariala di kato Simon, na maaki kantseul-kajankal. A u ka ŋaats na niajii, a tsiji pëjaam alabastëru, pan tsij pi ulicar un gëbëlanaatsa wi, uñatsal, u leempëna wi ni bënardu. A na fam pëjaam alabastëru atular Yeesu ulicar tsi been.

⁴ A balon tsi ban ci biki tsul riabats, a uja nandooni në ja bacints: “We ci wun kacok ulicar ki?

⁵ Par ulicar umënts wi aro yëlan pëwaapara ngëseent ngëwaants Dinaariu, u aa baranj.” A ba ŋoman ŋaats.

⁶ Maa a Yeesu ja: “Nda wëtanul; We ka wun a ndu nooranul? Nul aro ko uwar tsi uleka nji.

⁷ Par, nda ci ni baranj ngënu bëlieng; nda yëlan përoor bukul uwar, uwal wi nda ŋal wi. Maa nji, nda ri ka ci ni nji ngënu bëlieng.

⁸ Nul, aro ko wi na yëlan wi përo. Acar atular uliaf nji ulicar, pa pëmooy.

⁹ Mán leents ind ucär: Tsi Upetsan-uwar kë leentsaa tsi, tsi umundu bëlieng, ko wi ŋaatsi ro wi, ka leentsaa buts pa pëlesënaul.”

Judas Iskarioti ayecis pëya Yeesu ufets

¹⁰ Judas Iskarioti, nan cii nalon tsi bafetsul untaaja bukun ni batëb, atsëp di bawiak-bajakan, pii gutsar bukul Yeesu.

¹¹ Bi ba cikëndënul bi, a ba lílan, ba watsanul pëul uncaam. A Judas kë tsas bi në ro bi aa në guts Yeesu tsi uwal u wara wi.

Yeesu ayecis pa përe Ufesta-pëbuer ni bafetsul

¹² Tsi unu ucak ufesta upom un tsijats wi bëko-bëlëtsatsaani, wi Ufesta-pëbuer kë jakanaa wi, bafets Yeesu jaul: “Tsum tsi m ŋal tsun wund pëtsëp pii yecis ngëko pa wi përe Ufesta-pëbuer?”

¹³ Din, a na yël bafetsul batëb, aja bukul: “Nda tsëpan di përaasa, niints na yuuntsi pëliiki mlik ka jëk ni ind. Nda fetsanul;

¹⁴ tsi na niaj tsi, ndë ja ajug kato: ‘Najukan aja: Pëfër nji pi pëtsooŋ, tsi ndu n deena tsi Ufesta-pëbuer ni bafetsin, aci tsum?’

¹⁵ Në piban ind pëfër pëwiak di ruets kato, pan yecisa pi ngëko-ngëro; nda yecis ngëko ufesta rul pa n ja.”

¹⁶ A bafets pën atsëp përaasa, a ba tsënk ngëko bëlieng bi Yeesu ja bi bukul; a ba yecis Ufesta-pëbuer.

¹⁷ Uyër pëcaal, a Yeesu band ni untaaja bukun ni batëb.

¹⁸ Bi ba tsoar bi bariala, a Yeesu ja bukul: “Mán leents ind ucär: Nalon tsi ind, nan cii tsi bariala ni nji, ka yain ufets.”

¹⁹ A ba kur pëjuatsan, a uja nandooni në jaul: “Aci nji-a?”

²⁰ Yeesu yankës bukul aja: “Aci nalon tsi ind untaaja ni batëb, ni ka yuagi kañan ni nji di pëkanda.

²¹ Abuk ñaan-najin ka tsëp, bi u ro bi picanaa tsi ulekaul. Maa cay ñaan ni kan ya ank Abuk ñaan-najin ufets! Aro pe pëmat ñaan namënts përoots bëka yaas.”

²² Bi ba ci bi tsi bariala, a Yeesu jej pëpom, a na ja-gëwar a nu ba, a na cëtës pul a bafetsul, a na ja: “Nda yankan, ko wi aci uliaf nji.”

²³ A na jej karaani, a na baran a nu ba, a na bukul kul, a ba raan bëlieng tsi kul.

²⁴ A na ja bukul: “Ko wi aci pëñaak nji, pëñaak karo-pëloole, pan tulaa pi pa bañaan bacumal.

²⁵ Mán leents ind ucär: In katse ka n daan pëwat mbuk bëbiiñu, te unu wi ndu n daan wi pul pëwalu, di pësien Nasien-batsi.”

²⁶ Bi ba ba bi pëya uya-ubëndan, a ba pën atsëp untunda Mëoliwa.

Yeesu acar aleents Per kë fatsul ufets

²⁷ A Yeesu ja bukul: “Ndii yër bëlieng, par ko wi picana wun: ‘Mán kob nayafan, din ngënkanel ka garandar.’

²⁸ Maa unatsee nji di pëcӓts, ka yër ind bërun pëtsëp Galileeya.”

²⁹ A Per jaul: “Ŋal bañaan ka yër bëlieng, maa di ka ci nji.”

³⁰ A Yeesu yankësul aja: “Mán leentsu ucär: Bërëm buntsari bi, uguk ka ruka ka aan ngëyaas ngëtëb, kë bërin aa ngëyaas ngëwaants.”

³¹ Maa, Per mob tsi pëjaul: “Ŋal ank ka ka pëcӓts ni wi, nin in di ka n bëru.” A bafetsul bëlieng ja pëloole pan.

Yeesu di Getsësemani

³² Bi ba band bi tsëko tsi kanjaka tsi Getsësemani, a Yeesu ja bafetsul: “Nda wamaan nda tsoar tsi, mán tsëp buñaan.”

³³ A na tsëpand Per ni Joŋ ni Jakob; a na kur pëte unjuatsia, ni pëlënk pëwiak.

³⁴ A na ja bukul: “Uwaas nji ajuatsan mak, aa ndu n tsas pëcӓts. Nda rukaan tsi, nduu waay.”

³⁵ A na kikara bërun ko uties, na jintëla tsi utsia, a na ñaanar uci u yëla bëro, uwal umënts wi ka lawanul.

³⁶ Aja: “Aba, Paapa! M yëlan përo ngëko bëlieng; lawanin karaani kan ci kink ki unoor; tsë ci ko wi n ŋal wi, maa wi m ŋal wi.”

³⁷ A na witsee tsi bafetsul, na tsënk ba ci tsi bëŋooy; a na ja Per: “Simon, m ŋooy-a? M yëlaants koon pëwaay, nin uwal uloole-a?

³⁸ Nda waayan nduu ñaan, pa nda rits yër tsi mteen-teenana. Par uwejats ayecis, maa uyamats araf.”

³⁹ A na kaka kika, na ñaan akaka ja përim pëloole pëmënts pun.

⁴⁰ A na witsee, na kaka tsënk ba ci tsi bëŋooy, par këkës bukul aritsan, a bu meets përim pi bu kë yankul pi.

⁴¹ A na witsee uyaas uwaajantsan, a na ja bukul: “Nda wama ka ŋooy a nduu naakësa! Aliing! Uwoora band wink, wi Abuk ñaan-najin kë gutsa wi tsi iñan bajuban.

⁴² Nda natsaan! Nda ju ngë tsëp! Ni ka yaini ufets wokani ink.”

Yeesu amoba

⁴³ A bi Yeesu wama bi ka ñakan, din a Judas, nan cii nalon tsi untaaja bukun ni batëb baandi; acii ni kandënd bañaan kawiak, a ba tsiji ngëlaac ni ngëndog. Bawiak-bajakan, ni bapican-ngëtsua, ni bawiak Bajudeu yëli bukun bukul.

⁴⁴ Ni ka yauli ufets ro leents bukul upibanaani, aja: “Ni ndu n wúnkëree, aciul; nda mobanul nda liincan, ndë tsëpandul.”

⁴⁵ Ubaandiul wun, din a na kika awok Yeesu, a na jaul: “Rabi!” A na wúnkëraul.

⁴⁶ Din, ba yërand Yeesu amob.

⁴⁷ Nalon tsi ban ci biki tsul, toti ulaac a na tib naleempar nan pei pëci nawiak-bajakan, afalul kabats.

⁴⁸ A Yeesu ja bukul: “Nda bi ni ngëlaac ni ngëndog, pii mobin pi uwayu-a?

⁴⁹ Man ci ni ind ngënu bëlieng di kato-kayëman, a ndu n jukan, a nda mobatsin. Maa ko wi arolaa, pa u ci bi u ro bi picanaa.”

⁵⁰ Din, a ba bërul bëlieng, ba túk atsëp.

⁵¹ A u ulon upaas ro ka fetsi Yeesu, buleenj rin bi na kula bun. A bu kë mobul,

⁵² na bërar bukul buleenj, na túk bëruent.

Yeesu di kato kawat-pëleents, kawiak

⁵³ A ba tsëpand Yeesu di nan pei pëci nawiak-bajakan, ee júk rul bëlieng ni bawiak-bajakan, ni bawiak Bajudeu, ni bapican-ngëtsua.

⁵⁴ Per rukaul tsi ufets alawan, te di bulay nan pei pëci nawiak-bajakan. A na tsoar ni bawaay a na ci tsi pëtama tsi kawok bërua.

⁵⁵ A bawiak-bajakan, ni kato kawat-pëleents kawiak bëlieng, kë tsas përim pi ka lacan pi Yeesu na fiŋa; maa bë kaats.

⁵⁶ Par bacumal ajaarul ngan cits ngi ngëcar, maa irim bukul yërëlarats.

⁵⁷ A balon natsa pëjaarul ko un cits wi ucär, a ba ja:

⁵⁸ “Wund ate na ja: ‘Nji, mán gar kato-kayëman ki kañan ñaan-najin leemp kink; tsi ngënu ngëwaants ka niew kalon ki kañan ñaan-najin leempats ki.’”

⁵⁹ Ŋal bi u ci bank, ngëko ngi ba ja ngi yërëlarats.

⁶⁰ A nan pei pëci nawiak-bajakan natsa tsi pëncuaf bañaan, a na yepar Yeesu aja: “M kaats ko wi kë yankës wi, tsi ngëko ngi biki kë jaaru ngink-a?”

⁶¹ Maa a Yeesu yëŋandar tsi na yëŋandar tsi, yankësats ko. A nan pei pëci nawiak-bajakan kaka yeparul aja: “Wi ci-un Mesia, Abuk Ka n jaara ngëwar-a?”

⁶² A Yeesu jaul: “Nji n ciul un; te ndii win Abuk ñaan-najin tsoar di kariir Kanpe pëyëlan-ngëko bëlieng, në pafari tsi isa batsi pëbi.”

⁶³ Din, nan pei pëci nawiak-bajakan taw iŋiul yi bëtiem, a na ja: “Wee ngë fierar wun kak bamaatir?

⁶⁴ Ind te bakank bi na kar bi Nasien-batsi! We wi nda wejats wun?” A ba lacanul bëlieng pa na fiŋa, aka na roon në cӓts.

⁶⁵ A balon kur pëtújarul, ba kúndul këkës, ba kobul ngësuk, ba jaul: “Leentsan-e!” A bagaarir mobul awaŋul tsi imbakats.

Per apok meets Yeesu

⁶⁶ A Per ro ci tsi utsia di bulay. A nalon tsi bampëli baleempar nan pei pëci nawiak-bajakan baandi;

⁶⁷ a na win Per kë tama, na teenul ajuŋaman a na jaul: “Wi buts, m do ci ni Yeesu Kanpënë-ni-nasaret.”

⁶⁸ Maa, a Per pokul, aja: “Nji n meets, a te nji n mobats ko wi m ja wi.” A na pën tsul atsëp uleka pëlëman pëwiak. A uguk aan.

⁶⁹ A nampëli naleemp namënts un winul a na kaka ja ban ci biki tsul: “Namëntsi aci nalon tsi bukul.”

⁷⁰ A Per kaka pok. Jonats, ban ci biki tsul ja Per: “Tsi ucär, m bof ni bukul; a te m ci ñaan Galileeya!”

⁷¹ Maa, a na kur pëñaan ngënjuatsia nga roon ngë baandë-niul, a nuu baaja koo ja: “Nji n meets niints namëntsi, ni ndu ñakanaan ink ulekaul.”

⁷² Uyëk umënts wun a uguk aan uyaas utëbantsan. Din a Per les përim pi Yeesu ro pi jaul: “Uguk ka ruka ka aan ngëyaas ngëtëb, kë pok m meetsin aa ngëyaas ngëwaants.” A Per yëlaants pëmiira, na ci tsi irug.