MARKU 12 - KARÚK-PËRIM KAWALU Nouveau Testament

Përim pan tiba pi anaamanaana baleemp ba waraatsa biki

¹ A Yeesu kur pëñakanaan bukul tsi katib-irim, a na ja bukul: “Aka nalon ñaan, na yíiri uwoorta mko ubiiñu, a na cag afayësan, na jëp tsëpuañi, a na niew tsëko kawaay ayampan; a uu ba na rukar baleemp, a na tsëp bëyaas.

² Uband uwal kamar mbuk, a na yël naleemp di baleemp, pii yanki di bukul mbuk tsi mbuk uwoorta mko ubiiñu.

³ Maa baleemp mobul atucan, a ba ruakiul iñan bajëntsu.

⁴ A na kaka yël nalon naleemp di bukul; a ba tucan naleemp namënts un, a ba kobul tsi been, ba kawaranul.

⁵ A na kaka yël kak nalon; namënts un, a ba fiŋul. A na yël balon, bacumal: a ba tucan balon, a ba fiŋ bacints.

⁶ A na wama rukanda naloole, un ci wi abukul na ŋalee. Tsi utuami, a na yëlul di bukul a na ja: ‘Bu kee rëmban abuk nji.’

⁷ Maa baleemp bamënts buku n jaalar tsi ba ci tsi: ‘Nul ci-un ni kan dukandee bëka. Nda bili, nda ju ngë fiŋul, din pëij ka ci píic nja.’

⁸ A ba mobul, a ba fiŋul, ba gutsul di utsand uwoorta mko ubiiñu.”

⁹ Unk, a Yeesu yepar aja: “We wi ajug uwoorta mko ubiiñu kii ro wun, ubaandiul? Ka fiŋ baleemp bamënts bukun, në balon baleemp uwoorta mko ubiiñu umënts wun.

¹⁰ Nda layirëts përim pi tsi Bëpican-a? Iink di pa ja run: ‘Pëlaak pi baniew bër pi, pul bi ci pa liincan pi pëniew;

¹¹ ko wi, apënë-ni tsi Ajug, a u pikran tsi këkës nja.’”

¹² A ba ro ka tsas pëmobul, maa ba lal kandënd bañaan. Par bu me uci uleka bukul wi Yeesu kë ñakanaan wun, tsi katib-përim ki. Din a ba pën arukul, ba tsëp.

Uleka kaluk-uraasa

¹³ A ba yël balon tsi Bafariseu ni balon tsi bañaan Eroodis; bu yël bukul di Yeesu, pa pii mobunul tsi përim.

¹⁴ Bi ba band bi, a ba jaul: “Najukan! Wund ame m ci nacӓr; m fierats pëme ko wi ñaan ci wi, a m di kë teena bënaam bañaan; maa m ja m doon kuu jukan bëga Nasien-batsi tsi ucär. Pëluk Seesar uraasa, aci ko u niirana wi oo niiranaatsa-a? Ngë ka pëluk oo ngë kaats pëluk-a?”

¹⁵ Maa Yeesu me kanguungu bukul, a na ja bukul: “We ka wun ndu teen-teenanin? Nda iin-e pëdinaariu mán teen.”

¹⁶ A ba iul pul. A Yeesu yepar bukul aja: “Bënaam yën ci bun bi, ni ko un picana wink?” A ba jaul: “Bi Seesar.”

¹⁷ Din, a Yeesu ja bukul: “Nda an Seesar ngi Seesar, ndë Nasien-batsi ngi Nasien-batsi.” A ba pikra mak tsi ulekaul.

Basaduseu, tsi uleka kanatsee-di-pëcӓts

¹⁸ Din, a Basaduseu, bukul ba nja biki ba roon bu kë ja kanatsee-di-pëcӓts cits, bu bi tsi Yeesu, a ba yeparul aja:

¹⁹ “Najukan! Moises apicandar nja aja: Uci ñaan tsaar ni ñaan a nee cӓts aruk ŋaats, te rukats napäts, atsaul ka rukanda ŋaats, në bëkar tsëmakul.

²⁰ A u ro ka bayënts paaj ni nalon, ban tsaar biki; nacak ayank ŋaats, a na cӓts te rukats napäts.

²¹ A natëbantsan yankul, a na cӓts buts te rukats napäts, a u kaka ci unk buts ni nawaajantsan.

²² Unk, paaj bukun ni nalon, kaats nan duki kajër. Tsi utuami, bi ba ba bi bëlieng, a ŋaats cӓts buts.

²³ Tsi kanatsee-di-pëcӓts, uwal wi bu kë natsee wi di pëcӓts, ŋaats namënts un, kee ci aar naom tsi bukul? Par, bukul paaj bukun ni nalon, bu ro nimul.”

²⁴ A Yeesu yankës bukul aja: “Bi nda meets bink nin Bëpican, nin pëyëlan Nasien-batsi, cits ka wun nda niam-a?

²⁵ Par, uwal wi bacӓts natsee wi, bu ri ka nim, bu ri ka nimaa; bu ka ci pi ngëwaanju di batsi.

²⁶ Tsi uleka pëjaa bacӓts anatsee, nda layirëts tsi ulibëru Moises, bi Nasien-batsi ñakanaanul bunk di buwuul bi ka yëk bi-a? Ajaul: ‘Nji n ci-un Nasien-batsi Abraam, ni Nasien-batsi Isaak, ni Nasien-batsi Jakob.’

²⁷ Nul cits Nasien-batsi bacӓts, maa Nasien-batsi bayësal. Nda niam mak.”

Utsua un pe wi pëci uwiak

²⁸ Nalon tsi bapican-ngëtsua abaandi, a na te bu kë yepëlar irim, a na win Yeesu yank bukul uwar; a na yepar Yeesu aja: “Wom ci wun ulua un pe wi pëci uwiak, tsi ngëtsua bëlieng?”

²⁹ A Yeesu yank aja: “Wi ci wun uwiak: ‘Cíkëndani, Israel! Ajug, Nasien-batsi nja ci-un Ajug, nul naloole;

³⁰ kë ŋal Ajug, Nasien-batsiu, tsi uwaasu bëlieng, ni tsi uwejatsu bëlieng, ni tsi pëyëlanu bëlieng.’

³¹ Utëbantsan ci wun wi: ‘Kë ŋal acintsu, pi m ŋal pi beenu.’ Kaats ulon utsua un pe wi ngëmënts ngi pëci uwiak.”

³² A napican-ngëtsua jaul: “Najukan! M ñakan uwar. Ucar m ja, Nasien-batsi ci naloole; ucitsul, nalon cits;

³³ ni pëŋal Nasien-batsi tsi uwaasu bëlieng, ni tsi uwejatsu bëlieng, ni tsi pëyëlanu bëlieng; kë ŋaland acintsu, pi m ŋal pi beenu. Ko wan ape ijakan i kan tëraa yi bëlieng, ni in dits yi ka tëraa.”

³⁴ A Yeesu win bi na yankul bi ni bëlipal, a na jaul: “M lawanats pësien Nasien-batsi.” Din, ñaan katse yeents pëyeparul përim.

Këristu aci Abuk Dawid

³⁵ Bi Yeesu kë jukan bi di kato-kayëman, a na yepar aja: “Um bi bapican-ngëtsua yëlan bun pëja Këristu aci Abuk Dawid?

³⁶ Dawid bërierul, Uwejats-ujënts atsuul a na ja: ‘Ajug aja Ajug nji: Tsoaran tsi kariir nji aa ka tsu babëru tsi utsia iyotsu.’

³⁷ Dawid bërierul ka ruul Ajug, a um bi na yëlan bun pëci abukul?” A kandënd bañaan kawiak kë cikëndënul ni ulílan.

Yeesu aja, bañaan dúk ibats tsi uleka bapican-ngëtsua

³⁸ Bi na ci bi tsi bëjukan, na ja bukul: “Nda rukan ibats tsi uleka bapican-ngëtsua, bukul ba ŋal biki puu yandaar ni iŋi-bëtiem iyampal, a ba ŋal puu leenaa tsi injëkënts,

³⁹ ni itsoari icak di ito-ijúki, ni ilas icak tsi ngëfesta.

⁴⁰ A bu kë yankëna ban cӓtsëndan biki bayën bukul bëka, bu kë ro bëñaan buyampal, pa pëkundaraan. Bamënts biki, bu kee yank ulaci-un pe wi pëjuats.”

Bëtseend ŋaats nan cӓtsëndani ayënul, a na ciind naranj

⁴¹ A Yeesu tsoar tsi bërun tsëgaangi-bëka, a na ci tsi pëteen bi kandënd bañaan kë tsu bi baceenc bukul di tsëgaangi-bëka. A barëmb bacumal kë tsu ko un dëmb wi.

⁴² A bi ŋaats nan cӓtsëndani ayënul bi bi, nul nan ci naranj, a na tsu rul ngënciliŋ ngëtëb; bëkat ngul atiesëts mak.

⁴³ A Yeesu rui bafetsul, a na ja bukul: “Mán leents ind ucär: Ŋaats nan cӓtsëndan ink ayënul, nul nan ci naranj, atsu di tsëgaangi-bëka apean ban tsu biki bëlieng.

⁴⁴ Par bukul bëlieng bu tsu ko wi ba rukësan wi. Maa nul, tsi bëranjul, na tsu ko wi na ka wi bëlieng, ko un ci wi-barialaul.”