MARKU 10 - KARÚK-PËRIM KAWALU Nouveau Testament

Kagar-bënim

¹ A Yeesu pën tsul atsëp pëboos Judeeya, a na lut kajara bërëk Jordan. A kandënd bañaan kaka júk tsi nul, a na kaka ci tsi puu jukan bukul, bi na ro bi Uwakëtsa përo.

² A balon tsi Bafariseu tsëp di Yeesu pii teen-teenanul, ba yeparul aja: “Aniirana niints pëwëtan aarul-a?”

³ A Yeesu yank bukul aja: “We wi Moises picandar ind wun?”

⁴ Ba yankul aja: “Moises aniiran niints pëpican kakaarta kagar-bënim, a uu ba në wëtan aarul.”

⁵ A Yeesu ja bukul: “Aci-undo katamb-ngëwaas ind ka wun Moises picandar ind utsua wi.

⁶ Maa ki ujuundi umundu, Nasien-batsi aleemp niints ni ŋaats;

⁷ ka wun, niints ka pën tsi asinul ni aninul në bofëlar ni aarul;

⁸ bukul batëb bu ka ci uyamats uloole. Unk, bu katse ci batëb, maa uyamats uloole.

⁹ Bi u ci bank, ko wi Nasien-batsi bofëlan wi, ñaan-najin tsë gar.”

¹⁰ Bi ba ci bi di bametsu kato, a bafets kaka yeparul ko wan.

¹¹ A Yeesu ja bukul: “Na wëtani aarul, a na nim nalon ŋaats, aro mjubi tsi uleka nacak nun.

¹² A uci ŋaats wëtan ayënul, a na nima nalon niints, aro mjubi.”

Yeesu aja ngëwar pa upäts uties

¹³ Din, a bañaan tsiji Yeesu upäts, nee na kërara bukul. Maa bafets leentsar bukul.

¹⁴ A Yeesu win ko wan, a u reanul uwaas na ja bukul: “Nda wëtan upäts ba bi tsi nji; ind tsë laaŋ bukul, par pësien Nasien-batsi aci pa ba naam biki pi bukul.

¹⁵ Mán leents ind ucär: Ñaan na niiranatsi pësien Nasien-batsi pi napäts, yaas a në niaj di pul.”

¹⁶ A na wúnkëra upäts, a na paf bukul iñan a na ja ngëwar pa bukul.

Narëmb nan fieri ubiira un dits wi ka ba

¹⁷ Bi Yeesu ci bi tsi bëga pëtsëp, a nalon niints túki ee jintëla tsi bërunul, a na yeparul aja: “Najukan nawar! We wi n ka wun përo pa pëka ubiira un dits wi ka ba?”

¹⁸ A Yeesu yankul, aja: “We ka wun m jain nawar? Nawar cits, ucits ba naloole baŋ, un ci wi Nasien-batsi.

¹⁹ Me ngëtsua: ‘M di kë fiŋ ñaan, m di kë ro mjubi, m di kë kiej, m di kë ja ko u mabats wi uleka ñaan, m di kë fal ñaan; kë rëmban asinu ni aninu.’”

²⁰ Din, a niints jaul: “Najukan, man mob tsi përo ngëmënts ngan bëlieng, ki n ci ki ndëpaas.”

²¹ A Yeesu kaŋan këkës tsi nul, a na ŋalul, na jaul: “Ko uloole wi m dukanda wun përo; tsëpan kii waap ko wi m ka wi bëlieng, kë baranj, kii ka bëka di batsi; din kë bi kë fetsin.”

²² Maa niints kë te irim yan a na pën atsëp, apiban na lílaants, par aci nan kai bëka bëwiak.

²³ Din, Yeesu teen tsëko tsëmënts tsun afayësan, a na ja bafetsul: “Aci ko u nooran wi mak, pa barëmb pëniaj pësien Nasien-batsi!”

²⁴ A bafetsul pikra tsi irimul, maa a Yeesu kaka ja bukul: “Upats, aci ko u nooran wi, pa ba watsaraan biki bëka pëniaj pësien Nasien-batsi!

²⁵ Ape përaf ungilëm pëpar tsi baar kagúja, ni pëjaa, narëmb aniaj pësien Nasien-batsi.”

²⁶ A bafetsul ru pe këpe pë pikra, a bu kë jaalar: “Uci ank, yën yëlan un pëbuer?”

²⁷ A Yeesu kaŋan bukul këkës a na ja: “Bañaan-bajin yëlaants përo, maa cits Nasien-batsi. Par, Nasien-batsi ayëlan përo ngëko bëlieng.”

²⁸ Din, a Per kur pëjaul: “Wund wëtan bikink ngëko bëlieng, a wund ci tsi pëfetsu.”

²⁹ A Yeesu yankul aja: “Mán leents ind ucär: Kaats ñaan na wëtani kato, oo ban tsaar biki ni nul, bayënts ni bakaats, oo anin, oo asin, oo upäts, oo ireeŋ, tsi undo nji, ni tsi undo Upetsan-uwar,

³⁰ a na rits yank, ngëyaas useent tsi uwal wi, ito, ni batsaar ni nul, bayënts ni bakaats, ni banin, ni upäts, ni ireeŋ, ni pënoor-noorana; tsi umundu wi kan bi wi, në yank ubiira un dits wi ka ba.

³¹ Maa, bacumal tsi bacak kee ba ci batuami; batuami ka ci bacak.”

Uyaas uwaajantsan bi Yeesu leents bi uleka pëcӓtsul, ni pënatseeul di pëcӓts

³² Bë ci tsi bëga pëkata Jerusalem, a Yeesu yër bukul bërun. A ba lënk, a ban dukee biki tsi ufets lal. A Yeesu kaka pënand bafetsul untaaja bukun ni batëb apatsand, a na kur pëleents bukul ngëko ngi kan baandë-niul ngi.

³³ A na ja bukul: “Nda teenan-e! Nja ka kata bikink pëtsëp Jerusalem; Abuk ñaan-najin ka gutsa tsi iñan bawiak-bajakan, ni bapican-ngëtsua. Bu ka lacanul pa na fiŋa, bu ka gutsul tsi iñan ban cits biki Bajudeu.

³⁴ Bu ka jiul, bu ka tucanul, bu ka tújarul, bu ka fiŋul; tsi unu uwaajantsan në natsee di pëcӓts.”

Bëyep Jakob ni Joŋ

³⁵ Din, Jakob ni Joŋ, babuk Sebede, kika awok Yeesu, a ba jaul: “Najukan! Wund aŋal m doon kë niiran wund ko wi wund kë yepu wi.”

³⁶ A na ja bukul: “Wee nda ŋal wun nji përoor ind?”

³⁷ A ba yankul aja: “Wët wund di përëmbu, nalon ka tsoar tsi kariirul, nacints tsi kamayu.”

³⁸ A Yeesu ja bukul: “Nda meets ko wi nda ci wi tsi pëyep. Nda yëlan përaana karaani kan ci kink ki unoor, ki ndu n daana kink-a? Oo nda yëlan pëmijana pi ndu n mijana pi-a?”

³⁹ A ba jaul: “Wund ayëlan.” A Yeesu kaka ja bukul: “Ind kee raana karaani ki n daana ki, ndii mijana pi ndu n mijana pi,

⁴⁰ maa ind pëtsoar tsi kariir nji oo kamay nji, cits nji ka n tsu un. Maa aci pa biki u yecisara biki.”

⁴¹ Bi untaaja bukun te bi ko wan, ba riabatsar Jakob ni Joŋ.

⁴² A Yeesu rui bukul, a na ja: “Nda me koon, ban tsua biki pëci bawiak bañaan ban cits biki Bajudeu, bu ka pëyëlan tsi bañaan bukul; a ba wiak biki bukul ka buts pëyëlan tsi bukul.

⁴³ Maa tsi ind, di ka ci ank. Par na ŋali pëci nawiak tsi ind, aka pëci nakëmand ind.

⁴⁴ A na ŋal pëci nacak tsi ind, aka pëci naluek ind bëlieng.

⁴⁵ Par, Abuk ñaan-najin biits pa pëkëmandaa, maa pa pëkëmand ni pë ubiiraul pa pëlukar bañaan bacumal.”

Yeesu ayësan nakuel di Jeriko

⁴⁶ A ba band Jeriko. Bi Yeesu kë pëni bi di Jeriko ni bafetsul, ni kandënd bañaan kawiak, a u ka nakuel ni ka n jakee Bartimeu, abuk Timeu; atsoar tsi kambaŋ bëga, na ci tsi bëñaan.

⁴⁷ Bi na te bi u ci Yeesu Kanpënë-ni-nasaret, a na ci tsi pëlie koo ja: “Yeesu, Abuk Dawid! Yëkarin ipës!”

⁴⁸ A bañaan bacumal kë leentsarul pa na yëŋandar, maa na ru pe këpe pëlië mak koo ja: “Abuk Dawid! Yëkarin ipës!”

⁴⁹ A Yeesu nats, a na ja: “Nda ruiul!” Din a ba rui nakuel ajaul: “wak; natsaan, aruu.”

⁵⁰ A na guts kapantuul, din a na cat abi tsi Yeesu.

⁵¹ A Yeesu yeparul ajaul: “Wee m ŋal wun nji përooru?” A na jaul: “Nawiak, ma ŋal pëkak n win.”

⁵² Din, a Yeesu jaul: “Tsëpan, uwaku abueranu.” Tsi uyëk umënts wun, a na kak ka win, a nuu fets Yeesu tsi bëga.