MARKU 1 - KARÚK-PËRIM KAWALU Nouveau Testament

Joŋ-namijan

¹ Ujuundi Upetsan-uwar Yeesu Këristu nul Abuk Nasien-batsi.

² Apicana di ulibëru Isaaya Nayëlia, aja: “Teenan-e, mán wëtani nayëlia nji tsi bërunu, ni kan yecis bëgau.

³ Ñaan ka lië ank di ulaalats, a nuu ja: ‘Nda yecis bëga Ajug; nda colani ilëlul.’”

⁴ Joŋ-namijan, apibandar di ulaalats, a nuu leents uleka bëmijan kayaar-ibats, pa pëjampësaa ngëjuban.

⁵ A bañaan pëboos Judeeya bëlieng, ni bañaan ban ci biki bëlieng di Jerusalem kë tsëp di nul, a ba ja ba pets ngëjuban bukul, në mijan bukul di kabulaŋ Jordan.

⁶ Joŋ atiema iŋi i leempëna yi ni ifaal ungilëm, na tan katël ka n jand tsi bëlank. Barialaul aci ngë n jarabuts ni pëwaaj bëreeŋ;

⁷ a nuu leents përim koo ja: “Nan peini kaka pëyëlan ka bi tsi ufets nji; nji n tsënkaants pëjaa ma ŋëp ka pacul katanëni iraalaul.

⁸ Nji, man mijanaan ind di mlik; maa nul ka mijan ind un di Uwejats-ujënts.”

Yeesu amijana, a na teen-teenana

⁹ Tsi ngënu ngëmënts ngun, Yeesu pëni Nasaret di Galileeya, a Joŋ bi mijanul di kabulaŋ Jordan.

¹⁰ Tsi uyëk umënts wun, umijëseeul di mlik, a na win batsi waantsar, a Uwejats welee tsi nul, anaam unk utuuba.

¹¹ A përim pëni di batsi a pa ja: “Wi ci-un Abuk nji na ŋalee; man lílandëru mak.”

¹² Tsi uyëk umënts wun, a Uwejats tsëpand Yeesu ulaalats.

¹³ A na ro ngënu ngëntaaja ngëbaakër di ulaalats, a Useetaani kë teen-teenanul. A na ci rul ni ngë n jar, a ngëwaanju kë këmandul.

Yeesu ajot përui bafetsul

¹⁴ Bi Joŋ tsua bi di ukalabus, Yeesu bi Galileeya, a nuu leents Upetsan-uwar Nasien-batsi,

¹⁵ koo ja: “Uwal aband, pësien Nasien-batsi awokani. Nda yaari ibats, ndë Uwak tsi Upetsan-uwar.”

¹⁶ Bi nuu yandaar bi di kambaŋ bërëk Galileeya, a na win Simon, ni nan tsaari ni nul Simon, Andëre, a bu kë guts itseenk di bërëk, par bë ci bábuets.

¹⁷ A Yeesu ja bukul: “Nda fetsin, ka tsu ind pëci babuets bañaan.”

¹⁸ Tsi uyëk umënts wun, a ba ruk itseenk bukul, din, a ba fetsul.

¹⁹ A na kika ko uties, na win Jakob abuk Sebede, ni Joŋ, nan tsaari ni nul, ba ci di kanawa a bu kë yecës itseenk.

²⁰ Din a na rui bukul; a ba ruk Sebede, asin bukul, di kanawa ni baleemp, a ba fetsul.

Yeesu ayësan nalon ñaan ni ucaay niaji

²¹ Bi ba niaj bi Kafarnaum, a Yeesu tsëp ee ci tsi bëjukan di kato-kajúki, tsi Unu-pënaakësa.

²² A ba pikra tsi uleka bëjukanul, par ka jukan bukul pi ci ñaan nan kai pëyëlan, cits bi bapican-ngëtsua ja bi ba roon bu kë jukan.

²³ A tsi uyëk umënts wun, nalon niints ni ucaay niaji ro ci ba di kato-kajúki bukul, a na lië aja:

²⁴ “Yeesu, Kanpënë-ni-nasaret, we wi wund kaaraan wun ni wi? M bi pii cok-cokan wund-a? Ma me ne m cii: Najënts Nasien-batsi!”

²⁵ Yeesu leentsar aja: “Jaan jok, kë pën tsi niintsi!”

²⁶ A ucaay lic-lican niints ni pëyëlan, a u lië mak, u pën tsi nul.

²⁷ A bañaan bëlieng pikra mak, a bu kë yepëlar koo ja: “We ci wun umënts wi? Aci bëjukan bëwalu, ban ka bi pëyëlan! Aja ŋal në ja ngëcaay përim, din ngë ro ko wi na ja wi!”

²⁸ A tsi uyëk umënts wun, katim Yeesu jëk kaleka Galileeya bëlieng.

Yeesu yësan bañaan bacumal

²⁹ Upën bukul di kato-kajúki, din a ba tsëp ni Jakob ni Joŋ di kato Simon ni Andëre.

³⁰ Anin aar Simon apiints, a tsijar ni uliaf; din, ba leents Yeesu ulekaul.

³¹ A na kika awokul, a na mobul tsi kañan akat. A pëmaak pën tsi nul, a na ci tsi pëkëmand bukul.

³² A bëtakala, uyër pëcaal, a ba tsijiul bamoj bëlieng, ni biki ngëcaay niaj biki.

³³ A bañaan përaasa bëlieng júk tsi pëlëman.

³⁴ A na yësan bamoj bacumal mmaak man ci mi ba këci. A na ruakand ngëcaay ngëcumal, maa niiraants ngëcaay nga ñakan, par ngul ameul.

Yeesu aci tsi bëñaan di tsëko tsa laayatsa tsi

³⁵ Tsi kafa-unu, tsëko wama rëmënts, a Yeesu natsa atsëp tsëko tsa laayatsa tsi; a nee ci di bëñaan dul.

³⁶ A Simon, ni ban ci biki ni nul, ci tsi pëtsasul.

³⁷ Bi ba winul bi, a ba jaul: “Bañaan bëlieng ka tsasu.”

³⁸ Maa, Yeesu ja bukul: “Ngë ka pëtsëp ngëleka ngëlon tsi ngëntab nga woki ngink, pa nji pii leents buts rul përim; par ka wun n bi.”

³⁹ A na yaana bëlieng pëboos Galileeya, a nuu jukan di ito-ijúki bukul nuu leents përim, nuu ruakand ngëcaay.

Yeesu ayësan nalon niints na maaki kantseul-kajankal

⁴⁰ A nalon na maaki kantseul-kajankal bi tsi Yeesu, na buaraul, a na jintëla a na ja: “Uci m ŋal, m yëlan pëjëntsanin.”

⁴¹ A Yeesu cum ni kayëk-ipës, na colan kañan akëraraul, a na jaul: “Man ŋal, jëntsan!”

⁴² Tsi uyëk umënts wun, kantseul-kajankal pën tsi nul, a na jëntsana.

⁴³ A Yeesu ñakanaanul ni irim itamb, din na wëtanul na tsëp,

⁴⁴ a na jaul: “Teenan-e, tsë ja ñaan ko, maa tsëpan band di najakan, kë bëtseend pa mjëntsandaru, bi Moises tsu bi; u ci upibanaani pa bañaan.”

⁴⁵ Maa, upën niints pëtsëp, a na kur pëleents ngëcumal, a na jëkan përim tsëko. A u tsu Yeesu a katse yëlan pëniaj përaasa pan ci pi, na winaa. Maa a na ruka ka ci di utsand, di ngëleka ngan laayatsa ngi; bañaan kë pëni di ngëleka bëlieng, pëbi tsi nul.