LÚKAS 9 - KARÚK-PËRIM KAWALU Nouveau Testament

Yeesu yël bapostolu, untaaja ni batëb

¹ Yeesu rui bapostolu, bë ci-untaaja ni batëb, na wël bukul uyëlan ni pëyëlan përuak ngëcaay tsi bañaan, ni pëyësan bañaan mmaak.

² Na yël bukul pëleents bañaan ngëko pësien Nasien-batsi, ni pëyësan bamoj.

³ Aja bukul: “Upënar ind bëyaas, ind tsë tsëpand ko; ind tsë tsëpand nin pëndog, nin kamaañ, nin bariala, nin uncaam. Te, ñaan tsë tsëpand imíisa itëb.

⁴ Uja kato ki nda niaj ki, ndë tsoar rul aa ndë pëndul.

⁵ Tsi ba welanats ind tsi, upën ind tsi përaasa pëmënts nda raafan kandëpe ka pën tsi itsiim ind, pa pëpibanaan ba lac.”

⁶ A ba pën atsëp, bu kë yaana ngëntab, koo leents Upetsan-uwar; a uja tsi ba ya tsi, bu ka yësan bañaan.

Eroodis katse me bi nu ro bi

⁷ Eroodis, nasien kajara Galileeya, ate ngëko ngan par ngi bëlieng, a katse me ko wi nu ro wi, par aka ba nja biki: “Joŋ-namijan natsee un tsi bacäts;”

⁸ balo n ja: “Eliyas, nayëlia, pibandari un;” a balon kak ja: “Nalon tsi bayëlia bajon natsee un di pëcäts.”

⁹ Maa, Eroodis ja: “Man tsu Joŋ a na falaa been; a naom ci-un namëntsan, ni n te ank nu ro ngëko ngan?” A nuu tsas pëwinul.

Yeesu ro bawitsa upom

¹⁰ Bi bapostolu witsee bi, a ba leents Yeesu ngëko ngi ba ro ngi, ngul bëlieng. Na pënand bukul alaayatsaand, kajara përaasa pi ka n jaka pi Betësaida.

¹¹ Indënd bañaan kë me ko wan, ba fetsanul, a nee welan bukul, na ci tsi pëñakanaan bukul tsi uleka pësien Nasien-batsi; na yësan ban fier biki pëyësana.

¹² Unu kë wokan pëyër, bapostolu untaaja bukun ni batëb tsëp awokul, a ba jaul: “Wëtani kandënd bañaan ki ba tsëp ngëntab nga fay ngink tsi, ni ngëntab ireeŋ, bu kee ka tsi bu kë fër-na tsi, ni ko wi bu kë re wi. Par, tsëko tsi ngë ci tsink alaayatsa.”

¹³ Maa Yeesu ja bukul: “Nda wëlan bukul bariala, ind bërier ind.” Ba yankul, aja: “Ko wi wund ka wi, peets këpom kañan, ni ngëtsëb ngëtëb; uroko ne wund pëya pii weeli bariala, pa bañaan biki bëlieng.”

¹⁴ Par bë ci tsul bayënts ban duakan biki gëmíil kañan. Din, Yeesu ja bafetsul: “Nda tsuun bukul ba tsoar, ba ro ijúk; kara bëjúk bë ruakan bañaan ngëntaaja kañan.”

¹⁵ Ba ro unk, ba tsoaran bañaan bëlieng.

¹⁶ A Yeesu jej këpom kañan kun, ni ngëtsëb ngëtëb ngun, na kat këkës akaŋan batsi, na beenir ngul, a na cëtës upom ni ngëtsëb, a na colan bafets ba wël kandënd bañaan.

¹⁷ Ba riala aa ba suëts bëlieng. A ko wi ba rukësan wi ci këcaa untaaja ni këtëb ki itawësar.

Per ayëkëran Yeesu ci-un Këristu

¹⁸ Aka bëlon bëyaas, Yeesu laayatsa bañaan a na ci tsi bëñaan; bafets aci ni nul. A na yepar bukul, aja: “Yën ni indënd bañaa n ja un man ci?”

¹⁹ Ba yankul aja: “Aka biki ka nja biki, m ci Joŋ-namijan; balon kë ja, m ci Eliyas; a balon kak kë ja, m ci nalon tsi bayëlia bajon, na natsee di pëcäts.”

²⁰ Na yepar bukul, aja: “Maa ind, yën ni nda ja un man ci?” Per yank aja: “Wi ci-un Krëstu Nasien-batsi.”

²¹ Din Yeesu tsu bukul përits les koon këles ñaan ko wan.

Yeesu ñakan tsi uleka unoor wi nu noor wi, ni pëcäts pi nu cäts pi

²² Na ja bukul kak: “Abuk ñaan-najin aka pëtsua tsi unoor uwiak. Bawiak Bajudeu, ni bawiak-bajakan, ni bapican-ulua, bu ka fatsul ufets, në fiŋa, a uu ba, në natsee di pëcäts tsi unu uwaajantsan.”

²³ Din, na ja bukul bëlieng: “Ñaan na ŋali pëfetsin aka pëbër ngiicul, në lap kruusul kara unu, nuu fetsin.

²⁴ Par, na ŋali pëbueran ubiiraul, ka niam wul. Maa, na niamani ubiiraul undo nji, në bueran wul.

²⁵ We kat wun koon ñaan pëgaañaar umundu upëban, maa në niaman beenul, oo në cok beenul?

²⁶ Par, ñaan nan kawee tsi undo nji ni irim nji, Abuk ñaan-najin kee kawa tsi undoul, ubiul ni përëmbul, ni pi Asin, ni pi ngëwaanju ngëyëman.

²⁷ Maa mán leents ind ucär: Aka balon tsi ba nats biki tsi, kaats bi bu kë teenaman bi pëcäts, aa bu ka tsënkëna ka win pësien Nasien-batsi.”

Bënaam Yeesu witsësar

²⁸ Bi u par bi ko u wokan wi ngënu këwas bi Yeesu ja bi irim yan, na tsëpand Per, ni Joŋ, ni Jakob, a nee paya untunda pa bëñaan.

²⁹ Bi na ci bi tsi bëñaan, bënaam urostuul witsësar, iŋiul witsa ifaacal faŋ, a yu lik-lik.

³⁰ Din, bayënts batëb kë ñakan ni nul; aci Moises ni Eliyas,

³¹ pibandar bukun di përëmb, a bu kë ñakanaan tsi uleka upënar Yeesu, bi u ka bi pëci Jerusalem di nu pënëna run.

³² Per ni bacintsul pea ni bëŋooy mak. Bi ba teeni bi, ba win përëmb Yeesu, ni bayënts batëb ban ci biki ni nul.

³³ Bi bu kë ruk bi Yeesu, a Per jaul: “Nawiak! Awara nja pëci tsi; nda ju ngë leemp ngënkundan ngëwaants: ulon pa wi, ulon pa Moises, ulon pa Eliyas.” Per añakan ank, maa meets ko wi na ci wi tsi pëja.

³⁴ Bi na ci bi tsi pëja ngëmënts ngan, kasa bi ee kund bukul; bi kasa kë kund bi bukul, ba lënk.

³⁵ Përim pëni di kasa, pa ja: “Ni ci-un Abuk nji, nan datee; nda cikëndëniul!”

³⁶ Ujaka përim pan, Yeesu ruka koorul. Tsi ngënu ngëmënts ngun, bë yëŋandar, bë leentsats ñaan ko wi ba win wi.

Yeesu yësan napäts niints ni ucaay niaji

³⁷ Tsi unu uneki wi, bi Yeesu ni bafetsul welee bi di untunda, a kandënd bañaan kawiak jëk ni nul.

³⁸ Din, nalon niints lie tsi pëncuaf kandënd, aja: “Najukan! Man buarau teen abuk nji ni, niints, par aci ni n buki koorul.

³⁹ Aka ucaay un ja wi u mobul, din në lie ucar umënts wun, në yër bëcats, mtum kë pën pëlëts, uu lupanul, te di ka car pëwëtanul.

⁴⁰ Man ñaan bafetsu ba ruak wul, maa bë yëlaants.”

⁴¹ A Yeesu yankul, aja: “Ind bañaan ntsari! Nda ranj uwak, a nda colandats! Mán ci ni ind, koo n miira ind te lum-i? Biindi abuku tsi.”

⁴² Bi nu wokani bi Yeesu, ucaay watul tsi utsia, u tsuul a na yër bëcats. Din Yeesu leentsar ucaay ujuatsal umënts, na yësan napäts, a na kakanul asinul.

⁴³ A Bañaan bëlieng pikra, undo përëmb Nasien-batsi. Bi ba wama bi pikra bëlieng tsi uleka ko wi Yeesu ro wi bëlieng, na ja bafetsul:

⁴⁴ “Nda rukan ibats tsi irim yi: Abuk ñaan-najin ka gutsa tsi iñan bañaan-bajin.”

⁴⁵ Maa bë meets ko wi përim pan pac wi. Akunda bukul pa ba rits me ko wi pa pac wi; te bë yeentsats pëyeparul ko tsi pul.

Naom pe un pëci ñaan nawiak?

⁴⁶ Bëlon bëyaas, bafets Yeesu mob mantotëlër, pa pëme nan pei pëci ñaan nawiak tsi bukul.

⁴⁷ A Yeesu me ibats bukul, na jej napäts naties awokaraand,

⁴⁸ na ja bukul: “Na welani napäts naties ni, tsi katim nji, awelanin. A na welanini, awelan na yëliini. Par, nan pei pëci ñaan naties tsi ind bëlieng, ci-un ñaan nawiak.”

Ñaan na natsaraatsee pëkamanu, aci ni wi

⁴⁹ Din, Joŋ ja: “Nawiak, wund awin ñaan a nuu ruak ngëcaay tsi katimu, pa nga pëni di bañaan; a wund pokul përo ank, par cits ni wund tsi pëfetsu.”

⁵⁰ Yeesu jaul: “Ind tsë pokul. Par, ñaan na natsaraatsee pëkaman ind, aci ni ind.”

Bañaan ulon untab Samaaria, bë welaants Yeesu

⁵¹ Bi ngënu pëpaya Yeesu batsi woki bi, a na baaraan pëtsëp Jerusalem.

⁵² Na wëtan bañaan ni kayëlia, ba yërul bërun. Ba tsëp, bee niaj untab bañaan Samaaria, pëyecisul.

⁵³ Maa, bañaan untab welaantsul, par Jerusalem di na pënar run.

⁵⁴ A bafetsul, Jakob ni Joŋ, kë win ko wan, a ba ja: “Ajug! M ŋal wund ja bërua ba pëni di batsi, bii jasan bukul-a?”

⁵⁵ Maa, Yeesu witsësa, na leentsar bukul [aja: “Nda meets uwejats wi nda ci wi.

⁵⁶ Par, Abuk ñaan-najin biits pa pëniaman bañaan, maa pëbuëran bukul.”] Din, a ba repa bëga pëtsëp ulon untab.

Unoor ñaan nan ci tsi pëfets Yeesu

⁵⁷ Bi ba repa bi bëga pëtsëp, a u ka na njai A Yeesu: “Mán fetsu, tsi kë tsëp tsi ba këtsëp.”

⁵⁸ Yeesu jaul: “Ngëcuts aka iyar, a ngëko-ngëyits ka icang. Maa Abuk ñaan-najin kaats tsi nuu naakësaan tsi been.”

⁵⁹ A Yeesu ja nalon: “Fetsin.” Namëntsa n jaul: “Ajug! Wëtin n tsëp bërun kee n mooy asin nji.”

⁶⁰ Maa, Yeesu jaul: “Wëtan bacäts, ba mooy bacäts bukul. Maa wi, tsëpan kuu leents uleka pësien Nasien-batsi.”

⁶¹ A nalon kaka ja Yeesu: “Ajug! Mán fetsu, maa wëtin n tíil bërun bañaan kato nji.”

⁶² Maa, Yeesu ja: “Ñaan nan ci tsi kajaar, a nuu witsand ufets, katats tsi pësien Nasien-batsi.”