LÚKAS 8 - KARÚK-PËRIM KAWALU Nouveau Testament

Bakaats bando biki ka tsënk Yeesu, ni bëka bukul

¹ A u ba, Yeesu ja kara përaasa, në yaana pul, ni kara untab; nu leents Upetsan-uwar, nu ñakanaand tsi uleka pësien Nasien-batsi. Bafetsul, untaaja bukun ni batëb, ci ni nul.

² A Balon bakaats ci buts ni nul, ban pënana biki ngëcaay ngëjuatsal, ba yësana biki mmaak. Aci Maaria, ni ka n jakee Magëdala, ni ngëcaay paaj ni ulon pën ngi tsi nul;

³ a u ci Juaana, áar Kusa. Nul Kusa aci nagaang bëka Eroodis, nasien. A u ci buts Susaana, ni balon bacumal; bë ja ba roon bu kë jej bëka bukul koo tsënkëna Yeesu ni bafetsul.

Yeesu tib përim anaamanaan nagur

⁴ Bi kandënd bañaan kawiak júk bi, balon kë pëni di kara përaasa pëbi tsi Yeesu, na tib përim, aja:

⁵ “Nagur apën atsëp pëgur utulul. Bi nu gur bi wul, a u ka u yër wi tsi kambaŋ bëga; a u poosa, ngëko-ngëyits re wul.

⁶ Ulon yër tsi tsëko ilaak, a u mayi, u kay, par tsëko teets mlik.

⁷ Ucínts yër tsi umetaari myu, myu natsa ni wul, a ma nëts wul.

⁸ Ulon kak yër tsi tsëko mgiji, a u mayi. A uja pëbuk pëloole, pë buk këbuk useent.” Bi Yeesu ja bi ko wan a nuu ba, na kat përim, aja: “Nan kai ibats iteeni, na teen.”

⁹ A bafetsul yeparul ko wi katib-irim përim pi pac wi.

¹⁰ Na ja: “Ind, nda wëla pëme ngan doots ngunk mea, ngi pësien Nasien-batsi. Maa ban duka bukunk, bu koo tiba këtiba irim, pa uteen bukul, bu ri ka win; ute bukul, bu ri ka me ko wi i pac wi.”

¹¹ “Përim pan tiba pank, ko wi pa pac wi ci wun wi: Utul, aci përim Nasien-batsi.

¹² Utul u yër wunk tsi kambaŋ bëga, aci ba nja biki ba te përim Nasien-batsi, a uu ba, Ujabël ka bi kee pënan pul tsi ngëwaas bukul, pa ba rits wak tsi pul bu ka buër.

¹³ Utul u yër wunk tsi tsëko ilaak, aci ba nja biki ba te përim Nasien-batsi, bu ka niiran pul ni ulílan, maa bu liincats. Uwak bukul di ka jon; u band uwal mteen-teenana, din bu ka fats ufets.

¹⁴ Utul u yër wunk tsi myu, aci ba nja biki ba te përim Nasien-batsi a uu ba, pëya tsi bërun, kawejats ngëko umundu, ni kaka bëka, ni ulílar ngëko umundu ka nëts bukul, u tsu bukul përits jëŋ.

¹⁵ Utul u yër wunk tsi tsëko mgiji, aci ba nja biki ba te përim Nasien-batsi, bu ka gaang pul di ngëwaas nga wara ngi a nga maband, ba tambandar, a bu kë buk mbuk.”

Yeesu tib përim anaamanaan ulamp

¹⁶ “Ñaan di ka taban ulamp, në jej ko na kúndëna wul, nin di ka tsu wul di utsia bëkaab. Maa ka tsu wul di tsëpafëni ulamp, pa uja biki kan niaji biki, bu ka win ufacar tsëko.

¹⁷ Par, kaats ko un kunda wi, un dits wi kee pibandar; te kaats un beka wi, un dits wi kee pibanaa, u meaa.

¹⁸ Bi u ci bank, nda rukan ibats tsi bi nda ja bi nda roon ndu cikëndën. Par, nan kai, nii wëlaa; maa nan kaatsi, nii caanaa ŋal wi na ja wi tsi ibatsul aka.”

Anin Yeesu, ni ban tsaar biki ni nul Yeesu

¹⁹ Anin Yeesu, ni ban tsaar biki ni nul Yeesu, bë bi tsi nul, maa bë yëlanats pëwokanul, undo kandënd bañaan.

²⁰ Na jaka: “Aninu, ni ban tsaar biki ni wi, bukul nats bukunk di utsand, bë ŋal pëwinu.”

²¹ Yeesu yank bukul, aja: “Anin nji, ni ban tsaar biki ni nji, aci biki kan cikëndën biki përim Nasien-batsi, a bu kë ro ko wi pa ja wi.”

Yeesu natsan ukëk

²² Ulon unu tsi ngënu ngëmënts ngun, Yeesu gija kanawa ni bafetsul, na ja bukul: “Nda ju ngë lutar kajara bërëk kun.” Din ba pën pëtsëp.

²³ Bi ba ci bi tsi pëpaat kanawa, Yeesu yër bëŋooy. A ufuts natsee ni ukëk di bërëk, a mlik kë cumi kanawa; a bëjuats baandë-ni bukul.

²⁴ Ba ya ee wamb Yeesu, ba jaul: “Nawiak, nawiak, pëcäts abaandë-ni inja!” Yeesu natsa aleentsar ufuts ni ngëmaroŋ, a nga tsëk; a tsëko juabëts jok.

²⁵ Na ja bukul: “Uwak ind aci tsum?” Ba lënk, ba pikra; a uja nan dooni në ja bacintsul: “Yën ci-un namëntsi kalon? Ŋal ufuts ni mlik, në ja ngul përim, din ngë ro ko wi na ja wi.”

Yeesu yësan nalon niints ni ngëcaay niaji

²⁶ Ba kata pëboos pi ka n jaka pi Geraasa, pa mabëlar pi ni Galileeya.

²⁷ Bi Yeesu katee bi kankay, nalon niints na niajee ngëcaay bi pii jëk ni nul, apënë-ni përaasa. Ajon mak ki na tiemaatsa ki iŋi, ni ki na ciinats ki kato, maa di ibuk di na ciina run.

²⁸ Nu win Yeesu, na lië, na yër tsi bërunul, na kat përim mak, aja: “Yeesu, Abuk Nasien-batsi Kanpe pëci di ruëts! Wee n kaar wun ni wi? Man ñaanu, cats pikaarin.”

²⁹ Añakan ank, par Yeesu ja ucaay ujuatsal u pëni di ñaan namënts un. Par wul, amobul ngëyaas ngëcumal, na ja na tana mkorente, në janka, maa në mar-maran mkorente, në cok ngëjank, ucaay ka tsëpandul ngëlaay.

³⁰ Yeesu yeparul, ajaul: “Katimu ka jaka um?” A na yankul, aja: “Kandënd.” Aja ank, par ngëcaay ngëcumal aniajul.

³¹ A nga ci tsi pëbuara Yeesu, pa na rits tsu ngul nga tsëp baar-tsëko-unoor.

³² Pëtan pëwiak pi ngënkëmbe ro ci tsul tsi kafeer tsi untunda. A ngëcaay buara Yeesu, pa na wët ngul nga niaj ngënkëmbe ngëmënts ngun. Na wët ngul.

³³ Ngëcaay pën tsi ñaan namënts un, din nga niaj ngënkëmbe. Pëtan ngënkëmbe këra-këree di ruëts, ee yër di bërëk, tsi utsia untunda, a pa ba rul.

³⁴ Bi bayafan ngul win bi ko un par wi, ba túk ee leents bañaan di përaasa, ni di ngëntab ireeŋ.

³⁵ Din, bañaan pëni, pa pii win ko un par wi. Ba baandi tsi Yeesu, ba tsënki ñaan namënts un tsoar tsi bërun Yeesu; ngëcaay apën tsi nul, na tiema iŋi, a been tsëkënul. Bukul, ba lënk.

³⁶ Ba win biki ko un par wank leents buts bukul bi niints ni ngëcaay niaji yësana bi.

³⁷ Din, bañaan bëlieng, ban ciina biki ngëjara ngan fay ngunk tsul buara Yeesu na pën na lawan bukul, par bë lënk mak. Yeesu gija kak kanawa awitsa.

³⁸ Niints ni ngëcaay pën unk tsi nul ro ka buara Yeesu na wëtul na ci ni nul. Maa, Yeesu wëtanul na tsëp, na jaul:

³⁹ “Witsaan katou, kii leents ngëko ngi Nasien-batsi rooru ngi bëlieng.” Niints pën ayaana përaasa bëlieng, nuu leents ngëko ngi Yeesu roorul ngi.

Yeesu ayësan ŋaats ni kan tulee pëñaak

⁴⁰ Bi Yeesu witsa bi kajara kun, kandënd bañaan welanul, par bë ro ka lipul bëlieng.

⁴¹ Niints nalon baandi, katimul Jairus, aci nawiak kato-kajúki. Ayër tsi bërun Yeesu, na rugarul, pa na niaj katoul,

⁴² par abukul naloole ŋaats, na wokani ngëwaanu untaaja ni ngëtëb, ka tsas pëcäts. Bi Yeesu kë tsëp bi rul, a indënd bañaan kë miŋanul.

⁴³ Tsi bukul, aka ŋaats ni kan tulee pëñaak, ko un do wi ngëwaanu untaaja ni ngëtëb. [Acok bëkaul bëlieng tsi bacuunkan] maa nayësanul cits.

⁴⁴ Na ya bi ufets Yeesu, na këraraul kambiantëmb kaŋí ki na tiema ki. Ucar umënts wun pëñaak katse tula.

⁴⁵ Yeesu ja: “Yën kërarain un?” Bi ba pok bi bëlieng, Per ja: “Nawiak! Indënd bañaan afayu a bu kë miŋanu!”

⁴⁶ Maa, Yeesu ja: “Aka nan kërareeni, par man te uyëlan pën tsi nji.”

⁴⁷ Bi ŋaats win bi na kaats bi nu beka bi, a na bi ee yër tsi bërun Yeesu, a uliaful kë lënk. A tsi bërun bañaan bëlieng, na leents ko un ka wi na kërara Yeesu, ni bi na yës bi ucar umënts wun.

⁴⁸ Yeesu jaul: “Abuk nji! Uwaku abueranu; tsëpan ni pëfac.”

Abuk Jairus ŋaats a cäts, a Yeesu kakaniul nayësal

⁴⁹ Na wama ka ñakan, u ka nan pënii di use nawiak kato-kajúki, na ja: “Abuku cäts; cäts kaka nooran najukan.”

⁵⁰ Maa Yeesu te ko wan, na ja Jairus: “Cats lënk; moban tsi uwak, din në buer.”

⁵¹ Yeesu kë band kato, niiraants ñaan pëniaj bametsu ni nul; aci koon Per, ni Joŋ, ni Jakob, ni asin napäts ni aninul, niaj bukun ni nul.

⁵² Bañaan bëlieng kë rug, bu kë kob ijinc bukul, undo napäts. Yeesu ja bukul: “Ind tsë rug; napäts cätsats, aŋooy këŋooy.”

⁵³ Maa ba ci tsi përiatul, par bë me na cäts.

⁵⁴ Yeesu mobul tsi kañan, na kat përim mak, na ja: “Napats, natsee!”

⁵⁵ Din uyafënts napäts kaki. Ucar umënts wun, na natsa. Yeesu tsu bukul ba wël napäts bariala.

⁵⁶ A bábukul pikra. Yeesu ja bukul, ba rits les koon këles ñaan ko un par wi.