LÚKAS 7 - KARÚK-PËRIM KAWALU Nouveau Testament

Yeesu yësan naleemp kapëton basondaari

¹ Bi Yeesu ba bi pëleents irim yan bëlieng tsi bërun bañaan, na tsëp Kafarnaum.

² Aka kapëton basondaari nan ci rul, aka naleemp ni na tsui mak tsi uwaasul. Naleemp bi maak a nu tsas pëcäts.

³ Bi kapëton te bi uleka Yeesu, na yël balon bawiak Bajudeu, bee ba ñaanul na bi në yësan naleempul.

⁴ Uband bukul di Yeesu, ba ruka mob tsi pëbuaraul, bu kë ja: “Na yëlii wund ink, atsënkan pëjaa m doorul ko wan,

⁵ par aci na ŋali ucaak inja. Nul niewar nja un kato-kajúki.”

⁶ A Yeesu tsëp ni bukul. Bi na okan bi kato, kapëton yëli ifetsarul, pa ba jaarul Yeesu përim pi: “Ajug, tsë noorandar. Par, nji n tsënkaants pëjaa m niaji bametsu kato nji.

⁷ Wul ka wun n tsënkaants pëjaa man bi tsi wi bërierin. Maa, jaan përim, din naleemp nji ka yës.

⁸ Par nji, man ci ñaan nan kai bawiak nji, a n ka buts basondaari biki n wiak biki; ma nja n ja ni: ‘Tsëpan,’ në tsëp; ka ja nun: ‘Bili,’ në bi; ka ja naleemp nji: ‘Doan ko wi,’ në ro wul.”

⁹ Bi Yeesu te bi ko wan, a na pikra tsi uleka kapëton namënts un. Na witsësa kaŋ kandënd bañaan ban dunanul biki, na ja: “Man ja ind, yaas ka win uwak un dëmb wi pi wi, ŋal tsi bañaan Israel.”

¹⁰ Bi ban do bukunk yëlee witsa bi kato, ba tsënk naleemp yës.

Ŋaats nan catsëndani ayënul, abukul naloole niints a cäts, a Yeesu kakaniul nayësal

¹¹ Jonats, Yeesu tsëp përaasa pi ka n jaka pi Nain. A bafetsul, ni kandënd bañaan kawiak, tsëp ni nul.

¹² Bi na band bi tsi kawok tsëniajëni përaasa, din upaas un cäts wi kë pënanda pii mooya. A kandënd bañaan përaasa ci ni aninul; aninul abukul koorul, a na cätsëndan ayënul.

¹³ Bi Ajug win bi anin upaas, na yëkarul ipës, na jaul: “Cats rug.”

¹⁴ Na tsëp ee mobara bëkaab puum, balap nats, na ja: “Upaas, ma njau, natsee!”

¹⁵ Kancats natsa atsoar, na jot uñakan. Yeesu kakanul aninul.

¹⁶ Din, bañaan lënk bëlieng, bu kë bëndan Nasien-batsi, bu kë ja: “Nayëlia nawiak apëni tsi pëncuaf inja.” Ba jaand: “Nasien-batsi abi pëwula bañaanul.”

¹⁷ A përim pa n jaka pank tsi uleka Yeesu tea tsi Judeeya bëlieng, ni tsi ngëcaak ngan fay ngi dul.

Joŋ-namijan ayël bafetsul batëb, di Yeesu

¹⁸ Bafets Joŋ leentsul ngëko ngëmënts ngan bëlieng. Joŋ rui batëb tsi bafetsul,

¹⁹ na yël bukul di Ajug, bee ba yeparul, ba jaul: “Wi ci-un nan kai pëbi a, oo wund aka pëlip nalon-a?”

²⁰ Bi bayënts bamënts bukun band bi di Yeesu, ba jaul: “Joŋ-namijan ayëli wund di wi, pa pëyeparu, ne wi ci-un ank nan kai pëbi, ane wund ka lip nalon-a?”

²¹ Tsi uler umënts wun, Yeesu yësan bañaan bacumal mmaak bukul, ni mlupi bukul, na ruakand ngëcaay ngëjuatsal tsi bukul, na tsu bakuel bacumal a bu kë win.

²² Na yankës biki Joŋ yëli biki, aja: “Nda tsëpan, ndii leents Joŋ ko wi nda win wi a nda teand: Bakuel akak koo win, a balab kë yandaar, a ba maak biki kantsewul-kajankal jëntsana, a barika-te kë te, a bacäts natsee di pëcäts, a Upetsan-uwar leentsa baranj.

²³ Anaak, ñaan nan bitsee niaman uwak tsi nji!”

Yeesu añakanaan uleka Joŋ-namijan

²⁴ Bi ban tsiji biki kayëlia Joŋ-namijan pën bi atsëp, Yeesu jot pëñakanaan indënd bañaan tsi uleka Joŋ, aja: “Wee nda ya wun pëteen di ulaalats? Pëjaam pi ufuts ci pi tsi pësiints-a?

²⁵ Wee nda ya wun pëwin kalon? Ñaan nan tiemee iŋi iwar-a? Nda Teenan-e! Batiema iŋi iñatsal a bu kë ciind tsi ko uwar, bë ciina ito basien.

²⁶ Wee nda ya wun pëwin kalon? Nayëlia-a? Man ja ind, eey-e, maa apar pëjaa nayëlia.

²⁷ Nul ci-un nan picana unk ulekaul, ajaka: Nji ka n wëtani ink Nayëlia nji na yëru bërun, ni kan yecis bëgau tsi bërunu.

²⁸ Man ja ind: Tsi kabëk ki bakaats buk ki, nape Joŋ cits. Maa di pësien Nasien-batsi, nan pei pëci naties apeul.”

²⁹ Bañaan bëlieng ban cikëndënul biki, ŋal bayep bëluk-uraasa, bë niiran Nasien-batsi ci namabal, undo bi ba mijana bi bëmijan Joŋ.

³⁰ Maa Bafariseu ni bajukan-ulua, bë bër ko wi Nasien-batsi ŋalar wi bukul, undo bë mijanaatsa bëmijan Joŋ.

³¹ Yeesu lak përim, aja: “Wee ndu n naamanaan wun bañaan ntsari? Bë naam ni we kalon-i?

³² Bë naam upäts ban tsoar biki tsi kënjëkënts, a uja bandoon biki bu kë liar bacints bukul, koo ja: ‘Wund afúts ind pëncand, a nda kayats; a wund ya uya puum, a nda rugats.’

³³ Par, Joŋ-namijan abi, nu bër-mlik, di ka raan pëwat, a nda ja: ‘Atsij ucaay.’

³⁴ Abuk ñaan-najin bi, nuu riala, nuu raan; a nda ja: ‘Nda teenan-e! Ñaan ni, aci nawaamal, na ci nakuj, na fetsar ni bayep bëluk-uraasa, ni bajuban!’

³⁵ Maa upäts kameko, bukul bëlieng bë niiran ka ci kamabal.”

Ŋaats najuban atular Yeesu ulicar tsi itsiim

³⁶ Nalon tsi Bafariseu, aru Yeesu bee ba riala. Bi Yeesu niaj bi kato namënts un, na tsoar bariala.

³⁷ Nalon ŋaats tsi përaasa pëmënts pun, aci naro-ngëjuban. Bi na te bi u jaka Yeesu tsoar bariala di kato Nafariseu, na tsiji pëjaam ulicar alabastëru.

³⁸ Na bi ee nats tsi ufets Yeesu, tsi kawok itsiimul, nuu rug, a mŋandul tula añuawan itsiim Yeesu. A ni uweelul, na faaul itsiim, na wúnkëra yul, na kër yul ulicar.

³⁹ Bi Nafariseu nanduuri unk Yeesu bariala win bi ko wan, na ja tsi ibatsul: “Uci ñaan ni ro ci nayëlia, në ro me ñaan ni ŋaatsi ci, ni kan këraraul ink, ni ko wi na ci wi: aci naro-ngëjuban.”

⁴⁰ A Yeesu yankul, aja: “Simon! Man ka ko wi n du n leentsu wi.” Simo n jaul: “Najukan! Leentsin.”

⁴¹ A Yeesu jaul: “Aka bañaan batëb, ban tsiats biki nalon uncaam. Nacak atsiatsul ngëseent kañan Dinaariu. Natëbantsan tsiatsul ngëntaaja kañan.

⁴² Bi ba kaats bi ulukëni, na wëtar bukul uncaam wi ba tsiatsul wi, bukul batëb. Bi u ci bank, naom tsi bukul, ka pe un pëŋalul?”

⁴³ Simon ja: “Man jakar, aci na wëtara unk un pe wunk përëmb.” A Yeesu jaul: “M wejats uwar.”

⁴⁴ Na witsësa amab ŋaats, na ja Simon: “M win ŋaatsi? Man niaji katou, a m wëlatsin mlik mñawuni itsiim. Maa nul, añawin itsiim ni mŋandul, na faa yul ni uweelul.

⁴⁵ Wi m wúnkëraatsain, maa nul, ki na niaji ki wëtaants pëwúnkëra itsiim nji.

⁴⁶ M këratsin mkër tsi been, maa nul, akërin ulicar tsi itsiim.

⁴⁷ Undo ko umënts wun ka wun n du n jau, ngëjubanul nga cum ngank, ajampësaa, par apiban bëŋal mak. Maa na n jampësaai ko uties, ka piban bëŋal ko uties.”

⁴⁸ Din, Yeesu ja ŋaats: “Ngëjubanu ajampësaa.”

⁴⁹ Ban tsoar biki bariala ja tsi ibats bukul: “Yën ci-un namëntsi, ni ka n jampësaank ŋal ngëjuban?”

⁵⁰ Yeesu ja ŋaats: “Uwaku abueranu; tsëpan ni pëfac.”