LÚKAS 6 - KARÚK-PËRIM KAWALU Nouveau Testament

Tsi uleka Unu-pënaakësa

¹ Tsi Unu-pënaakësa, Yeesu kë par tsi kamaaj, bafetsul kë cët mmaaj koo muac, bu kë re.

² Balon tsi Bafariseu ja: “We ka wun nda ci tsi përo ko un pokaa wi përola tsi Unu-pënaakësa?”

³ A Yeesu yank bukul aja: “Nda layirëts ko wi Dawid ro wi bi na bonats bi-a? Nul ni ban ci biki ni nul?

⁴ Bi na niaj bunk kato-kayëman, na jej upom uyëman, na re, na wël wul ban ci biki ni nul, a u ci aatsum upom wi ñaan kaats wi përe; aci koon bajakan ka bukun përe wul, bukul rin.”

⁵ A Yeesu lak bukul përim, aja: “Abuk ñaan-najin, ci-un Ajug Unu-pënaakësa.”

Yeesu yësan nalon ñaan, nan cätsi kañan

⁶ Tsi ulon Unu-pënaakësa, Yeesu niaj kato-kajúki, na ci tsi bëjukan. A u ka tsul nalon ñaan, nan cätsi kañan kariir;

⁷ bapican-ulua, ni Bafariseu tsuuna Yeesu këkës, ne ka yësan ank ñaan tsi Unu-pënaakësa, din bu ka kaana tsul bëga pëtumtsarul.

⁸ Maa, Yeesu me ko wi ba ci wi tsi pëwejats, na ja niints nan cäts unk kañan: “Natsaan kë nats tsi pëncuaf.” Na natsa nats.

⁹ Din, Yeesu ja bukul: “Mán yepar ind ko un niirana wi përolaa tsi unu-pënaakësa: Përo uwar, oo përo uwutsëtsuel? Pëbueran ñaan, oo pëniamanul?”

¹⁰ Na teen bëkul ajëkëlan, na ja kancats kañan: “Colani kañanu.” Na colan, a kañanul kak kayësal.

¹¹ Bapican-ulua, ni Bafariseu, riabats mak, ba ci tsi pëñakanaan ko wi bu kë yëlan wi përo Yeesu.

Yeesu rat bapostolu, untaaja ni batëb

¹² Tsi ngënu ngëmënts ngun, Yeesu bi paya untunda, pa bëñaan. Na ñaan Nasien-batsi, bërëm bëpëban.

¹³ Ujënts unu, na rui bafetsul, na rat untaaja ni batëb tsi bukul, na tsu bukul pëci bapostolu:

¹⁴ aci Simon, ni na tsui katim, Per; ni ni ba tsaari, Andëre; ni Jakob, ni Joŋ, ni Filip, ni Bartolomeu,

¹⁵ ni Mateu, ni Tomaas, ni Jakob abuk Alfeu, ni Simon, ni ka n jakee Nakamandar-ucaakul,

¹⁶ ni Judas abuk Jakob, ni Judas Iskarioti, nan bii ya Yeesu ufets.

Yeesu ka jukan, a nuu yësan

¹⁷ Yeesu welee ni bukul, a nee nats tsi tsëko tsan liing tsi këliing. Kandënd bafetsul kawiak ci ba rul. Kandënd bañaan kawiak ci rul, ban pëni biki Judeeya bëlieng, ni Jerusalem, ni ban pëni biki kambaŋ bërëk Tiiru ni ki Sidon.

¹⁸ Bë bi, pa pëcikëndënul ni pëyësana mmaak bukul. Bañaan biki ngëcaay nooran biki mak yësana buts.

¹⁹ Bañaan bëlieng kë tsas pëkëraraul. Par, uyëlan ka pëni tsi nul, a uu yësan bukul bëlieng.

Pëlílan, ni pëjuatsan

²⁰ A Yeesu kat këkës akaŋan bafetsul, na ja: “Nda naak, ind baranj! Par pësien Nasien-batsi aci piic ind.

²¹ Nda naak, ind ban bonats bikink inkri! Par, ndii suetsana. Nda naak, ind biki kan dúg bikink inkri! Par ndii jí.

²² Nda naak, uwal wi bañaan ñaas ind wi, uwal wi ba pënan ind wi tsi ngiic bukul, a bu kë kar ind, a bu kë cok ind itim, undo Abuk ñaan-najin.

²³ Nda lílani tsi unu umënts, ndë juc ni ulílan, par bëluk ind arëmb di batsi. Par unk di basin bukul ro run bayëlia.

²⁴ Maa cay ind barëmb! Par nda yank ba bëtsënk ind.

²⁵ Cay ind ban suets bikink inkri! Par, ndii bonats. Cay ind biki kan jí bikink inkri! Par, ndii juatsan, ndë rug.

²⁶ Cay ind biki bañaan bëlieng kë bëndan biki. Par, unk di basin bukul ro run bayëlia batsup.

Nda ŋalan babër ind

²⁷ Maa, ma n ja ind, ind biki kan cikëndënin bikink: Nda ŋalan babër ind; ba ñaas ind biki, nda roon bukul uwar;

²⁸ biki ka n jaar ind biki ngëjuatsal, nda beeniri bukul; biki kan do ind biki ngëjuatsal, nda ñaandëri bukul.

²⁹ Uci ñaan waŋu tsi kambakats, kaŋaniul kacints buts. A uci ñaan canu kapantuu, tsë laaŋul kamíisa.

³⁰ Ñaan na ñaanui ko, tseendanul. Nan jeji kou, tsë yepul wul.

³¹ Nda roon bañaan, bi nda ŋal bi bukul përo ind.

³² Uci ndu ŋal rin bañaan ba ŋal ind biki, wee u kaar ind wun bëkat? Par ŋal bajuban, bë ja ba roon bu kë ŋal ba ŋal biki bukul.

³³ A uci ndu ro uwar pa bañaan bando ind biki uwar, wee u kaar ind wun bëkat? Ŋal bajuban, bë ja ba roon bu kë ro buts ko wan.

³⁴ Uci ndu tsiatsan bañaan biki nda fiaar biki bu kë luk ind, wee u kaar ind wun bëkat? Ŋal bajuban, bë ja ba roon bu kë tsiatsan bacints bukul, pa bu kee kakana batsiats bukul.

³⁵ Maa, nda ŋalan babër ind; nda roon ko u wara wi. Nda tsiatsani, te ind tsë watsar pëluka, din bëluk ind kee rëmb. Unk di nduu ci run babëk Kanpe pëci di ruëts. Par nul, ajuab uwaas tsi uleka barika-baran, ni tsi uleka bajuats-ngëwaas.

³⁶ Nda ciin bayëk-ipës, pi Asin ind ci pi nayëk-ipës.

Përits wat ñaan pëleents

³⁷ Ind tsë wat ñaan pëleents, nda ritsii wata pëleents. Ind tsë lacan ñaan, nda ritsii lacana. Nda jampësaan, ndii jampësaa.

³⁸ Nda wëlan, ndii wëla; aci kaniibi kawar, ka ñoja ki, ka siintsa, a kuu tula, ki ndu koŋara kun di unkuañ ind. Par, kaniibi ki ndu niibëna ki, kee niibëna ind kun buts.”

³⁹ Din, Yeesu tib bukul përim kak, aja: “Ane nakuel, ayëlan pëtsëpand acintsul nakuël-a? Bë ri kee yër bëlieng baar-a?

⁴⁰ Najuk, peets najukanul; maa najuk nan bai uwar pëjukana, ka ci pi najukanul.

⁴¹ We ka wun kë teen katsats kan ci ki di pëkës ni nda tsaari, te m winats pëmul pan ci pi di pëkësu?

⁴² Um bi m yëlan bun pëja ni nda tsaari: ‘Namíñ, lipan-e mán pënani katsats di pëkësu,’ te wi bërieru m winats pëmul pan ci pi di pëkësu? M ci nanguungu! Pënani bërun pëmul di pëkësu, din kë teen uwar, pa pëpënani katsats kan ci ki di pëkës ni nda tsaari.

Bëko, ni mbuk bul

⁴³ Bëko ba wara bi a buu buk mbuk ma waraatsa mi, cits; a bëko ba waraatsa bi a buu buk mbuk mwar, cits buts.

⁴⁴ Par bëko, ka yëkëraana mbuk bul. Mbuk bëfíigu di ka mara tsi bëwuul iyu, a mbuk bëbiiñu di ka mara tsi bëtsoonk.

⁴⁵ Ñaan na waree, ka pënani ko u wara wi tsi bëka uwaasul bëwar; a na waraatsee kë pënani ko u waraatsa wi tsi bëka uwaasul ba waraatsa bi. Par, un cum wi uwaas apar-paran, wul wi mtum kë ja wun.

Baniew batëb ban pats biki bëniew

⁴⁶ We ka wun nduu ruin, koo ja: ‘Ajug, Ajug,’ te nda ja nda roon, nda ri ka ro ko wi n ja wi?

⁴⁷ Nan bii tsi nji, a nuu cikëndën irim nji, a nuu fetsand yul, mán piban ind ni na naami:

⁴⁸ Anaam ni ñaan nan ci tsi pëniew kato, na jëp tsëko awandan, na tsu ujuundi tsi bëlaak. A mlik mcum natsee, a uwëk-wëk bi ee kobar tsi kato kamënts kun, maa yëlaants pëlëg-lëgan kul, par aci kato ka niewa ki uwar.

⁴⁹ Maa, nan cikëndëni irim nji a fetsats yul, anaam ni ñaan na niewi kato tsi mboos, te tsuuts ujuundi. A uwëk-wëk bi ee kob kato kamënts ki, din ka yër abaar utsia, ka coka aba bëlieng.”