LÚKAS 5 - KARÚK-PËRIM KAWALU Nouveau Testament

Babuets ban ci bi bawitsa. Yeesu kur përui bafetsul

¹ Ulon unu, Yeesu nats tsi kawok bërëk Genesaret, a kandënd bañaan kë miŋanul pa pëcikëndën përim Nasien-batsi.

² Na win inawa itëb tsi kambaŋ bërëk; bábëëts awelee di yul a ba ci tsi pëñaw itseenk bëkul.

³ A Yeesu gija kalon tsi yul, kan ci ki ki Simon. Na jaul na tsëpand kul na lawan kankay ko uties. Din, na tsoar tsi kanawa, nuu jukani bañaan.

⁴ Bi na ñakan bi a nuu ba, na ja Simon: “Tsëpandi kanawa tsëko tsëwandal, ndë guts itseenk, ndë bëëts.”

⁵ Simon yank, aja: “Nawiak, wund anoor mak tsi uleemp wi, bërëm bëpëban, te wund mobats ko. Maa undo përimu pan, mán guts itseenk.”

⁶ Bi ba ro bi ko wan, ba mob ngëtsëb ngëcumal, aa itseenk bëkul kë tawa.

⁷ Ba wiil bacints bëkul iñan, ban ci biki di kanawa kacints, pa ba bi pëtsënk bëkul. Ba bi, ba cuman inawa itëb imënts yun ngëtsëb, aa yu tsas pëmij.

⁸ Bi Simon Per win bi ko wi, na yër tsi itsiim Yeesu, na jaul: “Ajug! Lawanin, par man ci najuban.”

⁹ Aja ank, par apikra këpikra, nul ni ban ci biki bëlieng ni nul, undo pëmob pi ba mob pi ngëtsëb.

¹⁰ Babuk Sebede, Jakob ni Joŋ, bëkul ban bof biki uleemp ni Simon, bë pikra buts. Din, Yeesu ja Simon: “Cats lënk. Inkri, kë ruka ka ci narëkats bañaan.”

¹¹ Bi ba puular bi inawa kankay, ba wëtan ngëko bëlieng, bu kë fets Yeesu.

Yeesu ayësan nalon niints na maaki kantsewul-kajankal

¹² Bi Yeesu ci bi di pëlon përaasa, a u ka rul nalon niints ni kantsewul-kajankal jëki uliaf. Nu win Yeesu, na yër alëm urostu tsi utsia, na buaraul aja: “Ajug! M yëlan pëjëntsanin, uci m ŋal.”

¹³ Yeesu colan kañan akëraraul, na ja: “Man ŋal, jëntsan!” Uyëk umënts wun, kantsewul-kajankal pën tsi uliaful.

¹⁴ Din, Yeesu jaul nul tsë ja ñaan ko. A na jaandul përim pi: “Tsëpan band di najakan, kë wul bëtseend pa mjëntsandaru, bi ulua-Moises tsu bi, u piban bañaan m jëntsana.”

¹⁵ Maa, katim Yeesu ru pe këpe pëñakanaana; a u tsu indënd bañaan iwiak bu kë júk pa pëcikëndënul, ni pëyësana mmaak bëkul.

¹⁶ Maa nul Yeesu, na ja na roon në pën na kikara ngëlaay, nuu ñaan.

Yeesu ayësan nalab

¹⁷ Ulon unu tsi ngënu ngëmënts ngun, Yeesu ci tsi bëjukan, Bafariseu ni bajukan-ulua tsoar tsul; bu pëni di ngëntab bëlieng, ngan ciina ngi Galileeya ni Judeeya, ni përaasa Jerusalem bëts. Pëyëlan Ajug ci ni nul, pa pëyësan.

¹⁸ Din u ka bayënts ban baandi biki; bë tsiji nalab tsi pëyoongia. Ba ci tsi pëtsas pëniajanul bametsu, pa pëtsuul tsi bërun Yeesu.

¹⁹ Maa bë kaats tsi bu kë par-na tsi, undo kandënd bañaan; ba paya kancoŋ, ba piapës kul pa pëparanaanul; ba welanul ni pëyoongia tsi pëncuaf kandënd, tsi bërun Yeesu.

²⁰ Bi Yeesu win bi uwak bëkul, na ja: “Namíñ! M jampësaa ngëjubanu.”

²¹ Din bapican-ulua ni Bafariseu jot pëja tsi ibats bëkul: “Yën ci-un namëntsi, ni kan kar ink Nasien-batsi? Yën yëlan un pëjampësa ngëjuban, un cits wi Nasien-batsi koorul?”

²² Maa, Yeesu me ko wi ba ci wi tsi pëwejats, na yank bëkul, aja: “We ka wun nda ci tsi pëwejats ngëko ngëmënts ngan tsi ibats ind?

²³ We pe wun përaf, tsi pëja: M jampësaa ngëjubanu, oo pëja: Natsaan nats kë yandaar; we pe wun përaf?

²⁴ Mán piban ind, ndë me, Abuk ñaan-najin, aka pëyëlan tsi umundu pa pëjampësa ngëjuban.” Na ja nalab: “Ma n jau, natsaan nats, jejan pëyoongiau kë tsëp katou.”

²⁵ Tsi uyëk umënts wun, nalab natsa tsi bërun bëkul, na jej pëyoongia pi na ro pi piintsëna, na tsëp katoul, nuu bëndan Nasien-batsi.

²⁶ Bañaan bëlieng pikra mak, ba ci tsi pëbëndan Nasien-batsi; ba lënk mak a bu kë ja: “Ngë win ntsari ngëko ngan pikran ngi!”

Yeesu rui Lewi, un ci wi Mateu

²⁷ Bi ngëmënts ngan par bi, Yeesu pëni, na win nayep bëluk-uraasa, ni ka n jakee Lewi; atsoar tsi tsëko kaluk-uraasa. Yeesu jaul: “Fetsin.”

²⁸ Lewi wëtan ngëko bëlieng, na natsa, nuu fets Yeesu.

²⁹ Na ro ufesta uwiak di katoul, pa Yeesu. Bayep bëluk-uraasa, bacumal mak, ni balon bañaan tsoar bariala ni bëkul.

³⁰ Din, Bafariseu, ni bapican-ulua ba ya biki kajara Bafariseu ci tsi pëŋëmŋëm, a ba ja bafets Yeesu: “We ka wun nduu riala, a nduu raan ni bayep bëluk-uraasa, ni bajuban?”

³¹ A Yeesu yank bëkul, aja: “Bañaan bayësal fierats nacuunkan, ba yësats biki fierul bëkun.

³² Cits bañaan bamabal, biki n bi bëkun përu, maa bajuban, pa ba yaar ibats.”

Uleka kabër-mlik

³³ Ba ja Yeesu: “Bafets Joŋ, bë ja ucar bu ka bër-mlik, bu kë ñaanand; bafets Bafariseu kë ro unk bëts. Maa bafetsu, bë ja ba roon bu kë riala, bu kë raan.”

³⁴ Yeesu ja bëkul: “Bañaan ban duee biki a ba bi bënim, ane nda yëlan pëtsu bëkul bu ka bër-mlik a, te nayank-bënim ka ci aatsum ni bëkul?

³⁵ Maa uwal ka baandi, wi nayank-bënim kë pënana wi tsi bëkul, din bu ka bër-mlik, tsi uwal umënts wun.”

³⁶ A Yeesu tiband bëkul përim, aja: “Ñaan di ka mob kaŋí kawalu na taw, në jej bëtawësar kul na babëna kaŋí ka cätsar. Na ro ank ba, në taw kaŋí kawalu, maa bëtawësar kul di ka yandaar ni kaŋí ka cätsar.

³⁷ Te ñaan di ka tsu pëwat pëwalu di itël in tsaf yi. Na ro ank ba, pë mayan itël, din pë baar utsia, itël ka coka.

³⁸ Maa pëwat pëwalu, aka pa roon pëtsua di itël iwalu.

³⁹ Aja ñaan daan pëwat pëjon, din di ka ŋal përaan pëwalu; par ka ja: pëwat pëjon ape pëwara.”