LÚKAS 3 - KARÚK-PËRIM KAWALU Nouveau Testament

Joŋ-namijan aleents përim

¹ Aci tsi uwaanu untaaja ni uñanatsan, ki Tibeeriu, nasien nawiak sien ki, a Ponsiu Pilaatus ci na tsijëna-pëboos Judeeya; a Eroodis sien Galileeya; a Filip nan tsaari ni nul sien Itureeya ni Trakoniitis; a Lisaanias sien Abileene;

² a Anas ni Kayafas pe kun pëci bawiak-bajakan. Tsi uwal umënts, Nasien-batsi wëtani përimul tsi Joŋ, abuk Sakaria, di ulaalats.

³ Joŋ yaana kajara bërëk Jordan bëlieng, nuu leents bañaan uleka bëmijan, undo kayaar-ibats, pa ka jampësaa ngëjan kul,

⁴ bi u picana bi ja tsi ulibëru un tsij wi irim Isaaya, nayëlia; iink di u picana run: “Ñaan lië ank di ulaalats, aja: ‘Nda yecis bëga pa Ajug, nda colani ilël pa nul;

⁵ bëyoond ban ci bi-ba këci, ka cumanaa; untunda un ci wi-ba këci, uwiak ni uties, ka welanaa; ngëmbeera ngan cika ngi, ka cikësaa; iga ilaak, ka liingëlanaa;

⁶ din bañaan ka win bëlieng pëër Nasien-batsi.’”

⁷ Joŋ kë ja indënd bañaan ban bi biki nee na mijan kul: “Kajër ngëko-pëtsats! Yë n ja ind un ind pëtuk nda lawan uriab wi kan bi wi?

⁸ Nda pibani nda yaar ibats, ndë wët pëfal iyeen ind koo ja tsi ibats ind: ‘Abraam ci-un asin wund.’ Par ma n ja ind: Ni ilaak yi, Nasien-batsi ayëlan pëkaar Abraam upäts.

⁹ Pëtibi pëwús yecisa pink ba tsi iul mko; bëko ban kats bi mk mwar, bë kënta, bë gutsara bërua.”

¹⁰ Kandënd bañaan yeparul, aja: “Bi u ci bank, we wi wund ka wun përo-i?”

¹¹ Joŋ yank kul, aja: “Nan kai imíisa itëb, na faari ni nan kaatsi. Nan kai bariala, na roon ank buts.”

¹² A u ka bayep bëluk-uraasa ban bi biki buts, pa pëmijana. Ba ja Joŋ: “Najukan! We wi wund ka wun përo?”

¹³ Na ja kul: “Ind tsë tsu ñaan bëluk nda paran ko wi nda tsua wi pëtsu.”

¹⁴ A u ka basondaari ba yeparul biki buts, ajaul: “We wi wund ka wun përo, wund buts?” Na ja bukul: “Ind tsë caana ñaan bëkaul, te ind tsë tsupar ñaan; nda liingan tsi bëluk ind.”

¹⁵ Bi bañaan-ucaak watsar bi, kë ja bëlieng tsi ibats kul ne Joŋ ci-un ank Këristu

¹⁶ Joŋ ja kul bëlieng: “Nji, mán mijanaan ind mlik. Maa nan peini ka bi, në mijan ind di Uwejats-ujënts ni bërua. Nji n tsënkaants pëjaa mán pacul katanëni iraalaul.

¹⁷ Atsij kacaranaani di kañanul, pëjëntsanaan koul, u jënts cës; nu ba, në baar bëmaaj di kalëpatsul, maa në tër pëtëtar di bërua ban dits bi ka ba.”

¹⁸ Unk, ni irim icumal, yi kaliinc-liincan ngëwaas, Joŋ kë leents bañaan Upetsan-uwar.

¹⁹ Maa Eroodis nasien, nul ni Joŋ leentsari undo Eroodia aar ni ba tsaari, ni undo ngëko ngi Eroodis ro ngi bëlieng, nga waraatsa ngi,

²⁰ na ru watsës ko wi tsi ngul bëlieng: Aríc Joŋ di ukalas.

Yeesu amijana

²¹ Bi bañaan bëlieng kë mijana bi, Yeesu mijana buts; bi na ci bi tsi bëñaan, batsi waantsar,

²² Uwejats-ujënts welee tsi nul, anaami unk utuuba. Përim pëni di batsi, pa ja: “Wi ci-un Abuk nji na ŋalee; man lílandëru mak.”

Pëka Yeesu

²³ Yeesu ka kur uleempul, na wokan pëka ngëwaanu ngëntaaja ngëwaants. Nul Yeesu, ajaka aci abuk Juse, nan ci abuk Eli.

²⁴ Eli aci abuk Matati, nan cii abuk Lewi; Lewi aci abuk Melki, nan cii abuk Janai; Janai aci abuk nalon Juse;

²⁵ Juse namëntsi aci abuk Matatias, nan cii abuk Amos; Amos aci abuk Naun, nan cii abuk Esëli; Esëli aci abuk Nagai;

²⁶ Nagai aci abuk Maati, nan cii abuk nalon Matatias; Matatias namëntsi aci abuk Semei, nan cii abuk Juseki; Juseki aci abuk Joda.

²⁷ Joda aci abuk Joanan, nan cii abuk Resa; Resa aci abuk Sorobabel, nan cii abuk Salatiel; Salatiel aci abuk Neri;

²⁸ Neri aci abuk nalon Melki, nan cii abuk Adi; Adi aci abuk Kosan, nan cii abuk Elëmodan; Elëmodan aci abuk Er;

²⁹ Er aci abuk Josue, nan cii abuk Elieser; Elieser aci abuk Jorin, nan cii abuk nalon Matati; Matati namëntsi aci abuk nalon Lewi.

³⁰ Lewi namëntsi aci abuk Simeon, nan cii abuk nalon Juda; Juda namëntsi aci abuk nalon Juse, nan cii abuk Jonan; Jonan aci abuk Eliakim;

³¹ Eliakim aci abuk Melea, nan cii abuk Mena; Mena aci abuk Matata, nan cii abuk Natan; Natan aci abuk Dawid;

³² Dawid aci abuk Jese, nan cii abuk Obed; Obed aci abuk Boas, nan cii abuk Salëmon; Salëmon aci abuk Naason,

³³ Naason aci abuk Aminadabi, nan cii abuk Adëmin; Adëmin aci abuk Arni, nan cii abuk Esrom; Esrom aci abuk Peres, nan cii abuk nalon Juda;

³⁴ Juda namëntsi aci abuk Jakob, nan cii abuk Isaak; Isaak aci abuk Abraam, nan cii abuk Tara; Tara aci abuk Naor.

³⁵ Naor aci abuk Serugi, nan cii abuk Ragau; Ragau aci abuk Faleki, nan cii abuk Eber; Eber aci abuk nalon Sala;

³⁶ Sala aci abuk Kainan, nan cii abuk Arfasadi; Arfasadi aci abuk Sem, nan cii abuk Noe; Noe aci abuk Lamek;

³⁷ Lamek aci abuk Metusela, nan cii abuk Enoki; Enoki aci abuk Jaredi, nan cii abuk Maleleel; Maleleel aci abuk nalon Kainan;

³⁸ Kainan namëntsi aci abuk Enos, nan cii abuk Seti; Seti aci abuk Adam, nan cii abuk Nasien-batsi.