LÚKAS 24 - KARÚK-PËRIM KAWALU Nouveau Testament

Yeesu natsee di pëcäts

¹ Tsi unu ucak kanëm, bakaats natsa kafa-unu búŋ, ba tsëp di pëbuk, a ba tsëpand ucuraay di ba yecis di.

² Ba tsënk pëlaak këla pënana tsi pëbuk.

³ Bi ba niaj bi, bë tsënkats uliaf Yeesu, Ajug.

⁴ Bi ba katse me bi bu kë ro bi tsi uleka ko umënts wan, din a bayënts batëb, ban tiema biki iŋi a yu lik-lik, pibandar tsi bukul.

⁵ Bi ba lënk bi mak, a ba júŋ këkës tsi utsia, bayënts ja bukul: “We ka wun ndu tsas nayësal, tsi bacäts?

⁶ Nul cits tsi, anatsee di pëcäts. Nda lesan bi na ja ind bi, bi na wama bi ci di Galileeya;

⁷ aja ind: ‘Abuk ñaan-najin, aka pëgutsa tsi iñan bajuban, në rieŋa di kruus, në natsee di pëcäts tsi unu uwaajantsan.’”

⁸ Din, a ba les irimul.

⁹ A ba pën di pëbëk awitsa, a bee leents ngëko ngan bëlieng untaaja bukun ni naloole, ni bacints bukun bëlieng.

¹⁰ Aci Maaria Magëdala, ni Juaana, ni Maaria anin Jakob, ni balon bakaats ban ci biki ni bukul, leents bukun bapostolu ngëmënts ngan.

¹¹ Maa, bapostolu wakats tsi bukul, par irim bukul anaam bukul bëfuur.

¹² Maa Per natsa, na túk aband di pëbuk. Uŋëpul na win ileenj rin; a na pikra uleka ko un par wi, na pën atsíis.

Yeesu pibandar tsi bafetsul batëb, ban pënar biki Emaus

¹³ Tsi unu umënts wun, batëb tsi bukul ci tsi bëga pëtsëp untab wi ka n jaka wi Emaus, alawan Jerusalem, ko un duakan wi ngënkilometar untaaja ni uloole.

¹⁴ A ba ci tsi pëñakanaan ngëko ngan par ngi bëlieng.

¹⁵ Bi bu kë ñakanaan bank ngul, bu kë ci, Yeesu bërierul bi ee wok bukul, na tsok bëga ni bukul.

¹⁶ Maa këkës bukul laaŋa pëyëkëranul.

¹⁷ Na ja bukul: “Wee nda ci-un koo ñakanaan tsi bëga?” Ba nats, bë lílaants.

¹⁸ Din a nalon tsi bukul, ni ka n jakee Kleopas, jaul: “Tsi ban ci biki di Jerusalem, aci wi kooru meets un ngëko ngan par ngi ngënu ngi!”

¹⁹ Na yepar bukul aja: “Ngëko ngëom?” A ba jaul: “Ngëko ngan par ngi tsi uleka Yeesu, Kanpënë-ni-nasaret; nul aro ci niints nayëlia nan kai pëyëlan tsi karo ngëko, ni tsi irim, tsi bërun Nasien-batsi ni tsi bërun bañaan bëlieng.

²⁰ Bawiak-bajakan ni bawiak nja bë gutsul pa na lacandara pëfiŋa, a ba rieŋul di kruus.

²¹ A wund ro watsar u ciul ka weelësi un Israel. Maa tsi ngëmënts ngan bëlieng, ntsari ci rink unu uwaajantsan, ki ngëko ngan bëlieng par ki.

²² Aci buts ucär, balon bakaats tsi ban do biki ci ni wund, bë pikrani wund mak, bi ba tsëp bi mfa-unu di pëbuk,

²³ bë bitse tsënk puum Yeesu, a ba witsee ee ja, bë win ngëwaanju tsi bëwinal, a nga leents bukul na ci nayësal.

²⁴ A balon tsi wund tsëp di pëbuk, ba tsënk u ci bi bakaats ro bi ja; maa bë winatsul.”

²⁵ Din, Yeesu ja bukul: “Nda ranj ibats, a ngëwaas ind jon pëwak tsi ngi bayëlia ja ngi bëlieng.

²⁶ Ane Këristu roots ka pënoor a uu ba në niaj tsi përëmbul-a?”

²⁷ Na piban bukul ko wi Bëpica n ja wi bëlieng tsi ulekaul, akur-ni tsi ngëlíbëru Moises aa na bandan bukul tsi bayëlia bëlieng.

²⁸ Bi ba wokan bi untab wi ba pënar wi, a Yeesu naam unk ka par.

²⁹ Maa ba tambandar tsi pëpokul ajaul: “Dúkaan ni wund, par bërëm aruka jëki, a unu ruka yíimpa.” Na niaj bametsu, pa përuka ni bukul.

³⁰ Bi na tsoar bi bariala ni bukul, na jej pëpom, na beenir, na tawës pul, na wël bukul.

³¹ Din a këkës bukul waantsar, ba yëkëranul. Maa, a na niam tsi këkës bukul.

³² A ba jaalar tsi ba ci tsi: “Ngëwaas nja roots yëkan iink bi na ro bi ka ñakanaan nja tsi bëga, a nu piban nja Bëpican-a?”

³³ A ba natsa uwoora umënts wun, ba witsa Jerusalem, a ba tsënk rul untaaja bukun ni naloole, tsi ba júk tsi ni bacints bukul,

³⁴ bu kë ja: “Aci ucär, Ajug anatsee di pëcäts; apibandar tsi Simon.”

³⁵ A batëb bukun leents ko un par-na wi bukul tsi bëga, ni bi ba yëkëranul bi tsi katawës upom.

Yeesu pibandar tsi bafetsul

³⁶ Bi ba wama bi ka ñakanaan ngëmënts ngan, din Yeesu bërierul pibandar tsi pëncuaf bukul, na leena bukul aja: “Pëfac pa ciin ni ind.”

³⁷ Ngëbël bukul pën, ba lënk mak. A ba ja ne, aci napën-upën ni ba win un.

³⁸ Maa, Yeesu ja bukul: “We ka wun a ngëwaas ind tsoarats, a ngëwejats pe ind ibats?

³⁹ Nda teenan-e iñan nji, ni itsiim nji; aci nji bërierin. Nda mepërin, ndë yëkëran ne, napën-upën kaats uyamats ni imua; maa ind win bikink n ka uyamats ni imua.”

⁴⁰ Bi nuu ja bi ko wan, na piban bukul iñanul ni itsiimul.

⁴¹ Bi ba netse bi wak ko wan undo bi ba ci bi tsi ulílan, ni bi ba ci bi tsi mpikra, a na ja bukul: “Nda ka tsi ko ure-a?”

⁴² A ba wëlul bëfalar utsëb ucaw ni kasa pëwaaj.

⁴³ Na yank are tsi bërun bukul.

⁴⁴ Na ja bukul: “Yi ci yun irim nji, i n do yi ka leents ind, bi n wama bi n ci ni ind: Ngan picana ngi bëlieng tsi uleka nji tsi ulua-Moises, ni tsi bayëlia, ni tsi uya-ubëndan, aka përolaa.”

⁴⁵ Din na waants bukul uwejats, pa bukul pëme ko wi Bëpican pac wi.

⁴⁶ Na ja bukul: “Iink di u picana run aja: ‘Këristu aka pëci tsi unoor, në natsee tsi bacäts tsi unu uwaajantsan,’

⁴⁷ din kayaar-ibats, pa pëjampësaa ngëjuban, ka leentsaa tsi katimul pa bañaan ban cits biki Bajudeu bëlieng, pëkurëna tsi Jerusalem.

⁴⁸ Nda ci ba maatir biki ngëmënts ngi.

⁴⁹ Nda teenan-e, mán wëtani ind ko wi Asin nji watsan wi. Maa ind, nda rukaan tsi përaasa tsi, te ndë tsënkëna ka tiemana pëyëlan pi kan pëni pi ruets.”

Yeesu tsëpanda batsi

⁵⁰ Din, Yeesu pënand bukul utsand, atsëpand bukul uleka Betaania. Na katar iñan duets, na beenir bukul.

⁵¹ Bi na ci bi tsi pëbeenir bukul, na patsësa bukul, a na tsëpanda batsi.

⁵² Bukul, bi ba ba bi pëjintëlaul, a ba witsa Jerusalem, bu kë juc ni ulílan uwiak.

⁵³ Ba ja ba roon bu kë ci di kato-kayëman, bu kë bëndan Nasien-batsi.