LÚKAS 22 - KARÚK-PËRIM KAWALU Nouveau Testament

Judas aniiran pëya Yeesu ufets

¹ A ufesta kare-upom un tsijats wi bëko-bëlëntsantsaani kë wokani, wi ka n jaka wi Ufesta-pëbuër.

² A bawiak-bajakan, ni bapican-ulua kë tsas bi bu kë ro bi pa Yeesu pëfiŋaa, par bë lal bañaan.

³ Din a Useetaani niaj Judas, ni ka n jakee Iskarioti, nul nan ci nalon tsi bapostolu untaaja bukun ni batëb;

⁴ na ya ee ñakan ni bawiak-bajakan, ni bawiak bawaay kato-kayëman, tsi bi nu ro bi a në guts Yeesu tsi iñan bukul.

⁵ A ba lílan mak, ba baar pëloole pa pëwëlul uncaam;

⁶ Judas niiran, a nuu tsas uwal u wara wi pëguts Yeesu tsi iñan bukul, te kandënd bañaan di ka maatir.

Ufëri Yeesu utuami

⁷ Unu baandi, un ci wi unu kare-upom un tsijats wi bëko-bëlëntsantsaani, wi pëjakan Ufesta-pëbuër.

⁸ A Yeesu yël Per ni Joŋ, aja bukul: “Nda tsëpan ndii yecis Ufesta-pëbuer, pa nja ka re wul.”

⁹ A ba yeparul ajaul: “Tsum tsi m ŋal tsun wund yecis wul?”

¹⁰ Na yank bukul, aja: “Uniaj ind përaasa, din u ka ñaan ni kan jëki ni ind, a tsij pëliiki mlik; nda fetsanul te di kato ki nu niaj ki,

¹¹ ndë ja ajug kato: Najukan aja: ‘Pëfër pëtsooŋatsaani aci tsum, tsi ndu n deena tsi Ufesta-pëbuer ni bafetsin?’

¹² Din, në piban ind pëfër pëwiak di ruets kato, pan yecisa pi ngëko; nda yecis ufesta rul.”

¹³ A ba tsëp, bee tsënk u ci bi Yeesu ja bi bukul; ba yecis Ufesta-pëbuer.

¹⁴ Uwal kë band, a Yeesu tsoar bariala, bapostolu ci ni nul;

¹⁵ a na ja bukul: “Man dí përe Ufesta-pëbuer wi ni ind, tsini nduka ka ci tsi unoor.

¹⁶ Par ma n ja ind, in katse ka n de wul yaas, te uwal wi u baar wi pëci di pësien Nasien-batsi.”

¹⁷ Din Yeesu jej karaani, na baran, na ja: “Nda jejan ko wi, ndë faar tsi nda ci tsi.

¹⁸ Par má n ja ind, pëpën tsi inkri pëya bërun, in katse ka n daan pëwat mbuk bëbiiñu, te ubaandi pësien Nasien-batsi.”

¹⁹ Din, a na jej pëpom, na baran, na cëtës pul, na wël bukul, na ja: “Ko wi, aci uliaf nji, u wëla wi pa ind. Nda ru kuu ro ko umënts wi, pa pëlesënin.”

²⁰ Tsi uleka karaani, bi ba ba bi kare ufëri, na ro unk buts, aja: “Karaani ki, aci Karo-pëloole kawalu tsi pëñaak nji pan tulaa pi pa ind.

²¹ Maa nda teenan-e! Kañan ni ka yaini ufets ci kink ni kamiñ tsi bariala.

²² Par, Abuk ñaan-najin, ka tsëp, bi u ka bi pëci. Maa cay ñaan ni ka yaul ank ufets!”

²³ Din a bapostolu kur pëyepëlar tsi ba ci tsi, naom tsi bukul ka un pii ro ko wan.

Naom pe un pëci ñaan nawiak

²⁴ Ba bi mob mantotëlër, pa pëme naom tsi bukul wina un na pe pëci ñaan nawiak.

²⁵ A Yeesu ja bukul: “Basien bañaan ban cits biki Bajudeu, bë ja ba roon bu kë sienëna bañaan bukul uyëlan; a biki ka mandaar biki tsi bukul kë jakaa Baro-ngëwar.

²⁶ Maa ind, nda kaats pëci ank; nan pei pëci nawiak tsi ind, na ciin pi nan pei pëci naties; a na wiaki ko, na ciin pi nasirbir.

²⁷ Par, nan tsoari bariala, ni nan ci tsi pësirbir, naom pe un pëci nawiak? Cits nan tsoar unk bariala-a? Maa tsi pëncuaf ind, nji n ci ink pi nasirbir.

²⁸ Ind, nda ci ban tambandar biki tsi pëci ni nji tsi mteen-teenana mi n par-na mi.

²⁹ Mán kaar ind pësien, bi Asin nji kaarin bi pul;

³⁰ pa ndë riala, ndë raan ni nji, di pësien nji; ndë tsoar tsi itsoari-pësien, pa ndë wat këbuka Israel untaaja kun ni këtëb pëleents.”

Yeesu car aleents Per kë fatsul ufets

³¹ “Simon, Simon, teenan-e! Useetaani ayep ind, pa u roon u way ind pi mmaaj.

³² Maa nji, man ñaandaru, pa uwaku tsë niaman. A wi, uwal wi m kaki wi, kë liinc-liincan ban tsaar biki ni wi.”

³³ Per yankul, aja: “Ajug! Man yecis pëtsëp ni wi, ŋal ank ukalabus, ŋal ank u ci pëcäts.”

³⁴ Maa Yeesu ja: “Per! Ma n jau, uguk ka ruka ka aan ntsari, kë bërin aa ngëyaas ngëwaants.”

Ngëlaac ngëtëb

³⁵ Din, a Yeesu yepar bukul, aja: “Bi n yël ind bunk, a n ja ind, ind tsë tsëpand nin pëkalëpa, nin kamaañ, nin iraala, nda bi ranj iink ko-a?” Ba yankul, aja: “Nin ko.”

³⁶ A na ja bukul: “Maa inkri, nan kai pëkalëpa, na tsëpandi pul. Nan kai kamaañ, na tsëpandi kul buts. A nan kaatsi ulaac, na waapan kapantuul, në weelëna wul.

³⁷ Par ma n ja ind, përim pan picana pink, aka përolaa tsi nji; iink di pa ja run: ‘Abofana tsi baro-ngëko-kawaraatsa.’ Par, ko un jaka wi tsi uleka nji, band wink pëci.”

³⁸ A bafetsul ja: “Ajug! Teenan-e! Ngëlaac ngëtëb nguu ngi.” Na ja bukul: “Akës!”

Yeesu ci tsi bëñaan di Getsësemani

³⁹ A Yeesu pën atsëp untunda Mëoliwa, bi na wakëtsa bi përo; bafetsul fetsul.

⁴⁰ Nu band tsëko tsëmënts, a na ja bukul: “Nda ñaanan ind përits yër tsi kafal.”

⁴¹ Nul, na kikësa bukul, tsi ko wi ñaan yëlan wi pëtap pëlaak. A ba jintëla, na ñaan

⁴² aja: “Paapa! Uci m ŋal, lawanin karaani unoor ki. Uŋal nji tsë rola, maa wiicu.”

⁴³ [Uwaanju batsi pibandar tsi nul, a u watsësul uyëlan.

⁴⁴ Bi na juatsan bi, na ru pe këpe pëmob tsi bëñaan; mcíbiul witsësa ci pi ngëjopat pëñaak ka tolar ngun utsia.]

⁴⁵ Bi na natsa bi tsi bëñaan na band tsi bafetsul, na tsënk ba yër bëŋooy, par bë juatsan.

⁴⁶ A na ja bukul: “We! Nda ŋooy-a? Nda natsaan, nda ñaanan, pa nda rits yër tsi kafal.”

Pëmoba Yeesu

⁴⁷ Bi Yeesu wama bi ka ñakan, din kandënd bañaan baandi, nalon tsi untaaja bukun ni batëb, ni ka n jaka unk Judas, yëri un bukul bërun; akika awok Yeesu pa pëwúnkëraul.

⁴⁸ Maa Yeesu jaul: “Judas! Kë ya Abuk ñaan-najin, ufets ni mawunkëlër-a?”

⁴⁹ Ban ci biki ni Yeesu, bi ba win bi ko un yecis wi pëci, a ba ja: “Ajug! Wund ka tib ni mawunkëlër-a?”

⁵⁰ A nalon bukul tib naleempar nan pei pëci nawiak-bajakan, afalul kabats kariir.

⁵¹ Maa Yeesu yank bukul, aja: “Nda wëtan, aliing!” A na këraraul kabats, na yësanul.

⁵² Din, a Yeesu ja bawiak-bajakan, ni bawiak bawaay kato-kayëman, ni bawiak Bajudeu, bukul ban bi biki pa pii mobul: “Nda pëni bi ni ngëlaac, ni ngëndog, pi pëmob nakiej-a?

⁵³ Man do nja ka ra unu, ka ci ni ind di kato-kayëman, te nda lakatsin kañan, maa uwal ind band wink, ni uyëlan karëm.”

Per apok meets Yeesu

⁵⁴ Din a ba mob Yeesu, ba tsëpandul ee niajan di kato nan pei pëci nawiak-bajakan. A Per rukaul tsi ufets alawan.

⁵⁵ Bërua tabana tsi umetaari bëlay, bañaan tsoar tsëloole; A Per tsoar tsi pëncuaf bukul.

⁵⁶ A nampëli naleemp winul tsi na tsoar tsank tsi ufacar bërua, na teenul uwar, na ja: “Ni buts, aro ci ni nul.”

⁵⁷ Maa Per pok, aja: “Ŋaatsi, in meets namëntsan a!”

⁵⁸ Jonats, nalon niints kë winul, a na ja: “Wi buts, m ci nalon tsi bukul.” Maa Per ja: “Niintsi, in citsul.”

⁵⁹ Upar ko pi uwoora, a u ka niints nalon kak na mobi tsi pëja: “Aci ucär, ni buts aro ci ni nul, par aci buts nagalileeya.”

⁶⁰ Maa Per ja: “Niintsi, in meets ko wi kë ja wank!” Bi Per wama bi ka ñakan, uyëk umënts wun a uguk aan.

⁶¹ Ajug witsësa, na kaŋan Per këkës, din Per les përim Ajug pi na jaul pi: “Uguk ka ruka ka aan ntsari, kë pok m meetsin aa ngëyaas ngëwaants.”

⁶² A na pën acil utsand, na rug, ajuatsan mak.

Basondaari ci tsi përiat Yeesu, a bu kë tucanul

⁶³ Bayënts ba mob biki Yeesu tsij, bë ci tsi përiatul, bu kë tucanul.

⁶⁴ A ba ja ba tanul këkës, bu kë yeparul koo ja: “Leentsan-e! Yën kobu un?”

⁶⁵ Bu kë jaul ilon irim icumal, yi ikar.

Yeesu atsëpanda kato kawat-pëleents kawiak

⁶⁶ Unu kë fa, a bawiak bañaan-ucaak, ni bawiak-bajakan, ni bapican-ulua, júk. Yeesu tsëpanda rul, di kato kawat-pëleents kawiak;

⁶⁷ a ba jaul: “Uci wi ci-un Këristu, leents wund.” A Yeesu yank bukul, aja: “Uci n leents ind, nda ri ka fiaar;

⁶⁸ a uci n yepar ind përim, nda ri ka yankin.

⁶⁹ Pëkur tsi inkri, Abuk ñaan-najin ka tsoar di kariir pëyëlan Nasien-batsi.”

⁷⁰ A ba yeparul bëlieng aja: “A wi ci-un Abuk Nasien-batsi-a?” Yeesu yank bukul, aja: “Ind bërier ind, nda ja man ciul.”

⁷¹ A ba ja: “We wi ngë fierar wun kak, wi ka leentsa wi? Ngë te bërier nja ko wi na ja wi ni mtumul.”