LÚKAS 2 - KARÚK-PËRIM KAWALU Nouveau Testament

Ubukara Yeesu

¹ Tsi uwal umënts wun, Agustu, nasien nawiak tsu ulua pa bañaan bëlieng pëmarkaara.

² Bi bëmarkaar bëcak bëmënts kë roa bi, Kiriinius sienun ucaak Siiria.

³ Uja kara ñaan në witsa përaasaul pii markaara.

⁴ Unk, Juse pën di përaasa Nasaret, pul pan ciina pi Galileeya; na kata pëtsëp përaasa Dawid, pi kanjaka pi Betëleem, pan ciina pi Judeeya. Juse tsëp rul, undo apënëni kato Dawid, ni pëka Dawid.

⁵ Atsëp pii markaara ni nampëliul, Maaria, nul nan seempee.

⁶ Bi ba wama bi ci rul, unu Maaria wi kak band.

⁷ Na k napätsul nacak, niints. A na atsul ni iŋi, na piintsanul di bërialanaani ngëncaam, par bë kaats tsëko di bametsu kato-pëtsooŋ.

Bayafan ni ngëwaanju

⁸ A u ka bayafan ban ci biki di kajara ucak umënts wun, bu kë fër bëreeŋ, pëteen ngëncaam bëkul.

⁹ A ka uwaanju Ajug, un pibandar wi tsi bërun bëkul, a përëmb Ajug fiets bëkul afayësan, ba lënk mak.

¹⁰ Maa, uwaanju ja bëkul: “Ind tsë lënk, par man bi pëleents ind Upetsan-uwar, wi kan tsu wi bañaan-ucaak bëlieng tsi ulílan uwiak.

¹¹ Nabuëran, un ci wi Kristo, Ajug, abëkara ind ntsari di përaasa Dawid.

¹² Iink di ndu meena run u ciul: ndu tsënk napäts nandu bëka bëatsa ni iŋi, na piintsana di bërialanaani ngëncaam.”

¹³ Ucar umënts wun, ngëwaanju ngëcumal pëni di batsi ee tsënki ucak wun. Nga ci tsi pëbëndan Nasien-batsi, koo ja:

¹⁴ “Përëmb pa ciin pa Nasien-batsi di tsëko tsan pe tsi pëci di ruets, a pëfac pa ciin tsi bañaan biki na lílandër biki tsi umundu.”

¹⁵ Bi ngëwaanju ruk bi bayafan a nga tsëp batsi, ba jaalar përim pi: “Bi u ci bank, nda ju ngë kata pëtsëp Betëleem, nja kee win ko un jaka wank abaandi, ko wi Ajug tsu wi nja wank pëme.”

¹⁶ A Bayafan míint pëtsëp, ba tsënk Maaria ni Juse, ni napäts nandu bëka a na piintsana di bëntsian bërialanaani ngëncaam.

¹⁷ Bë winul, ba leents ko wi ba jaka wi tsi uleka napäts namëntsi.

¹⁸ Bañaan bëlieng, ban cikëndën biki bëkul, pikra, tsi uleka ko wi bayafan ci wi tsi pëleents bëkul. Maa, ngëko ngan jaka ngank bëlieng,

¹⁹ Maaria gaang ngul uwar tsi uwaasul, nuu wejats ngul.

²⁰ A Bayafan pën awitsa, bu kë rëmban Nasien-batsi, koo bëndanul, undo ngi ba te ngi bëlieng, te ba winand ngul, nga ci bi ba jaka bi.

Napats atsua katim

²¹ Bi u band bi unu uwasantsan, pa napäts pëwelana kambac, na tsua katim, Yeesu. Aci katim ki uwaanju tsuul ki, bi aninul netse bi seempaul.

Yeesu atsëpanda kato-kayëman tsi bërun Ajug

²² Uba ngënu mjëntsandar bëkul, bi ulua-Moises tsu bi, ba tsëpand Yeesu Jerusalem pii pibanul tsi bërun Ajug —

²³ Bëro ank, bi u picana bi tsi ulua Ajug aja: Kara napäts niints nacak nan bëkee, ka patsandara Ajug—

²⁴ Pëtsëp bëkul rul, aci bëts pa pii wël bëjakan, bi ko unjaka wi tsi ulua Ajug: Ngëtúuba ngëtëb, oo ngëtuuba bëreeŋ ngëtëb nga wam ngi ngëpats.

²⁵ A u ka nalon ñaan di Jerusalem, katimul Simeon; aci namabal, na lënk Nasien-batsi, nuu lip kajuabëtsana-uwaas Israel; Uwejats ujënts ci tsi nul.

²⁶ Uwejats-ujënts apibanul na ri ka cäts, te winats Këristu Ajug, bërun.

²⁷ Uwejats tsëpandul kato-kayëman. Juse ni Maaria kë baandandi napäts, un ci wi Yeesu, pa përoul ko wi ulua tsu wi,

²⁸ a Simeon yankul aret tsi iñan, na ja ngëwar pa Nasien-batsi, aja:

²⁹ “Nawiak! Kë wëtan nalueku inkri ni pëfac, bi m do bi ja.

³⁰ Par, këkës nji win pëbuër,

³¹ pi m yecis pi tsi bërun bañaan bëlieng:

³² ufac pa upiban bañaan ban cits biki Bajudeu, ni përëmb Israel, bañaanu.”

³³ Asin napäts, ni aninul pikra, tsi undo irim injaka yi tsi ulekaul.

³⁴ Simeon ja ngëwar, na ja Maaria, anin napäts: “Teenan-e! Napatsi atsua pëci ni kan kai bañaan Israel bacumal kë yër, bacumal kë natsa; na tsuunda pëci upibanaani wi kan pokaa wi,

³⁵ —a wi bërieru, ulaac ka lúŋanu uwaas, unk ngëwejats bañaan bacumal ka pibanaa.”

³⁶ A u ka bëts nayëlia, ŋaats, katimul, Aana. Aci abuk Fanuel, tsi pëka Aseer. Nul Aana, aruka tsaf mak. Anima bi na ci bi nampëli, na ci ni ayënul, ngëwaanu paaj ni ulon,

³⁷ ayënul cäts. Na ruka unk, aa na ka ngëwaanu ngëntaaja këwas ni ngëbaakër. Nul, di ka pën di kato-kayëman; aja na roon, bërëm ni pënak, nuu bëndan Nasien-batsi, nuu ci tsi kabër-mlik, ni bëñaan.

³⁸ Na baandi tsi uyëk umënts wun, na baran Nasien-batsi, na ci tsi pëleents uleka napäts, pa bañaan ban ci biki bëlieng tsi pëlip Jerusalem da pënana tsi pëluëk.

Pëwitsa Nasaret

³⁹ Bi Juse ni Maaria ba bi përo ko wi ulua Ajug tsu wi bëlieng, ba witsa Galileeya, di përaasa kul, un ci wi Nasaret.

⁴⁰ Napats kë wiaka, nu jëŋand, nu pe këpe pëme ko, Nasien-batsi tsuunkarul. Bi Yeesu ka bi ngëwaanu untaaja ni ngëtëb, na niaj kato-kayëman.

Yeesu di kato-kayëman, bi na ka bi ngëwaanu untaaja ni ngëtëb

⁴¹ Aja kara uwaanu, ubaandi Ufesta-pëër, bák Yeesu ka tsëp Jerusalem.

⁴² Bi na ka bi ngëwaanu untaaja ni ngëtëb, ba kata pëtsëp rul, bi u ja bi u roon u rolaa tsi ufesta.

⁴³ Ngënu ufesta kë ba, ba pën pëtsíis; a Yeesu, ndëpaas, rukee di Jerusalem te bákul meets.

⁴⁴ Bë ci tsi pëja ne, akurëlar ni bacints kul. Ba yandaar aro unu tsi bëga, a ba ru ci tsi pëtsasul tsi bayëts kul, ni tsi bañaan biki ba meelar biki.

⁴⁵ Maa winatsul, ba pën pëwitsa Jerusalem, kë tsasul.

⁴⁶ A uu ro ngënu ngëwaants, ba ru winul, bi na tsoar bi di kato-kayëman tsi pëncuaf bajukan-bëga, a nu cikëndën kul, na ci tsi pëyepar kul irim.

⁴⁷ Biki kan cikëndënul biki pikra bëlieng, uleka bëlipalul, ni irim i na yank yi kul.

⁴⁸ Bi anin Yeesu ni asinul winul bi, ba pikra mak. Aninul jaul: “Napats, we ka wun m do wund iink? Nji ni asinu, wund a cäts pëtsasu.”

⁴⁹ Yeesu ja kul: “We ka wun nda ro ka tsasin? Nda roots me n ka pëci tsi ngëko Asin nji-a?”

⁵⁰ Maa përim pi na ja pank kul, meets ko wi pa pac wi.

⁵¹ Na juŋa ni kul pëtsëp Nasaret; na mob tsi përim kul; aninul gaang irim yan bëlieng di uwaasul.

⁵² Yeesu kë pe këpe pëme ko, ni pëwiaka; a Nasien-batsi, ni bañaan, tsuunkarul.