LÚKAS 19 - KARÚK-PËRIM KAWALU Nouveau Testament

Yeesu ni Sakeu

¹ A Yeesu niaj Jeriko, a na par tsi përaasa.

² Aka nalon niints ni kanjakee Sakeu, aci nawiak tsi bayep bëluk-uraasa, na ciind narëmb.

³ A na ci tsi pëtsas pëwin nan ci Yeesu, maa yëlanats, undo kandënd bañaan, par nul arungët.

⁴ Na tukar bërun, a na paya bësikomoor pa pëwin Yeesu, par aka pëpar-na tsul.

⁵ A Yeesu kë band tsëko tsëmënts tsun, na teen duets, a na jaul: “Sakeu! Welee ucar, par mán ka pëciina katou ntsari.”

⁶ A Sakeu welee ucar, na welan Yeesu ni ulílan.

⁷ Ba win biki bëlieng ko wan kë ŋëmŋëm koo ja: “Atsëp ee tsooŋatsaan di niints najuban.”

⁸ Maa Sakeu natsa, na ja Ajug: “Ajug! Teenan-e! Mán wël baranj umetaari bëka nji; a uci n fal ñaan a yankënul ko, ka kakanul aa ngëyaas ngëbaakër.”

⁹ Din, Yeesu jaul: “Pëbuer abaandi ntsari tsi kato ki. Par namëntsi buts, aci abuk Abraam.

¹⁰ Par Abuk ñaan-najin, abi pëtsas ba niam biki, në bueran bukul.”

Yeesu tib përim anaamanaan baceenc uwëru

¹¹ Bi bu kë cikëndën bi ngëmënts ngan, a Yeesu tib përim, par aruka wokan Jerusalem, a u naam bukul ne pësien Nasien-batsi ka pibandar tsi uyëk umënts wun.

¹² Din, a na ja: “Aka nalon ñaan nan bëkee tsi pëbuka pëwar. Na pën atsëp ucaak ulawal, pa pii yank pësien, në witsee.

¹³ Na rui bañaan untaaja tsi baluekul; a na wël bukul untaaja Mina. Na ja bukul: ‘Mán tsëp; nda rukaan nda leempëna wul aa uwitsee nji.’

¹⁴ Maa bañaan ban bof biki ucaak ni nul, bu ñaasul; a ba yël bañaan tsi ufetsul, bee ba ja: ‘Wund ŋalats namëntsi pësien wund.’

¹⁵ Bi na yank bi pësien a uu ba, na witsee; a na mandaar përui baluekul, biki na ro biki wël uncaam, pa pëme ko wi kara ñaan gaañaar wi tsi ko wi na ro wi.

¹⁶ Nacak abaandi, a na ja: ‘Ajug! Pëminau abëkan këmina untaaja.’

¹⁷ A na ja naluek: ‘M do uwar, naluek nawar! Bi m mob bink tsi ngan tiesëts ngi mak, ciin ni ka mandaari tsi këraasa untaaja.’

¹⁸ A natëbantsan baandi, na ja: ‘Ajug! Pëminau abëkan këmina kañan.’

¹⁹ A na ja naluek namënts un: ‘Wi buts, ciin ni ka mandaari tsi këraasa kañan.’

²⁰ Nacints baandi, a na ja: ‘Ajug! Pëminau, pul pi. Man do m bëb pul di kaleenj, a n patsan pul tsëko;

²¹ Par ma lalu, undo bi m ci bi ñaan na liinci tsi ko unjaka wi; kë jej ko wi m júkaants wi, a kë cët ko wi m wayaants wi.’

²² A na ja naluek namënts un: ‘Irimu bërier yul i ndu n watënu yun pëleents, wi naluek na waraatsee! M do me n ci ñaan na liinci tsi ko un jaka wi, a ndu n jej ko wi n júkaants wi, a ndu n cët ko wi n wayaants wi,

²³ a m do um a m júkaants uncaam nji di bank? Koo n baandi, ka ro yank wul ni ko wi u bëkan wi.’

²⁴ Din, a na ja ba maatir biki: ‘Nda caaniul pëmina pun, ndë wël pul nan ka unk këmina untaaja.’

²⁵ A ba jaul: ‘Ajug! Nul aka ba këmina untaaja.’

²⁶ Na ja bukul: ‘Man ja ind: Nan kai, nii wëlaa. Maa nan kaatsi, nii caanaa ŋal ko wi na ka wi.

²⁷ Maa ba ñaasin bukunk, ba ŋalats bukunk ndoon ka sien bukul, nda tsiji bukul tsi, ndë fiŋ bukul tsi bërun nji.’”

Yeesu aka kape, uniajul Jerusalem

²⁸ A Yeesu ja ko wan a nuu ba, na yër bërun pëkata pëtsëp Jerusalem.

²⁹ Nu wokan Betfage, ni Betaania, tsi kajara untunda wi kanjaka wunk untunda Mëoliwa, a na yël batëb tsi bafets,

³⁰ na ja bukul: “Nda tsëpan untab wi tsi bërun. Uniaj ind rul, ndë tsënk ubuk-ubúuru tana, wi ñaan netse wi rija; nda pacan wul, ndë tsiji wul.

³¹ Uci ñaan yepar ind: ‘We ka wun ndu pac wul?’ Ndë jaul: ‘Ajug afier wul.’”

³² Biki Yeesu yël biki tsëp a bee tsënk u ci bi na ja bi bukul.

³³ Bi ba ci bi tsi pëpac wul, bajug wul ja bukul: “We ka wun ndu pac ubuk-ubúuru?”

³⁴ A ba yank bukul aja: “Ajug afier wul.”

³⁵ Ba tsëpand wul di Yeesu. A ba liap iŋi bukul yi bëtiem tsi ruets wul, ba rijan Yeesu.

³⁶ Bi na ci bi tsi pëtsëp, bañaan kë liap iŋi bukul yi bëtiem tsi bëga.

³⁷ Bi na ruka bi wokan kajara ki untunda Mëoliwa welara kunk, kandënd bafets bëlieng ci tsi ulílan, bu kë lië, bu kë bëndan Nasien-batsi, undo ngëko bawitsa bëlieng, ngi ba win ngi. Bu kë ja:

³⁸ “Nasien ni kan bi ink tsi katim Ajug, a jara ngëwar! Pëfac, pa ciin di batsi; përëmb, pa ciin di tsëko tsan pe tsi pëci di ruets.”

³⁹ Tsi kandënd bañaan, aka Bafariseu ban ja biki Yeesu: “Najukan! Leentsari bafetsu!”

⁴⁰ A na yank bukul, aja: “Man ja ind, uci ba yëŋandar, u ci ilaak ka lië yun.”

Yeesu arugar Jerusalem

⁴¹ Uwokanul përaasa a nu win pul, na rugar pul;

⁴² aja: “Uci pëjaa tsi unu wi, wi buts m me ko wi ka wëlu wi pëfac! Maa inkri, ko umënts abekau a m winats wul;

⁴³ par ngënu ka biiniu, ngi babëru kë jëp ngi tsëbekënee ba fayësanu, bu ka fayu, bu ka miepu ngëjara bëlieng;

⁴⁴ bu ka fam-famanu, ni upätsu ban ci biki di bametsuu. Bë ri ka ruk tsi wi pëlaak tsi ruets pëcints pul, par m yëkëranats uwal wi m wúlaa wi.”

Yeesu tsëp kato-kayëman

⁴⁵ A Yeesu niaj kato-kayëman, din na kur përuaki bawaap;

⁴⁶ na ja bukul: “Ko wi picana wun: ‘Kato nji ka ci kato buñaan;’ maa ind, nda ro kul tsëko kambeku ngëwayu.”

⁴⁷ A nuu jukan di kato-kayëman, kara unu. Bawiak-bajakan ni bapican-ulua ni bawiak bañaan-ucaak kë tsas pëfiŋul.

⁴⁸ Maa bë meets ko wi ba yëlan wi përo, par bañaan bëlieng bë baar ibats tsi pëcikëndënul.