LÚKAS 18 - KARÚK-PËRIM KAWALU Nouveau Testament

Yeesu tib përim anaamanaan nawat-pëleents na mabatsi

¹ A Yeesu tib bafetsul përim, pëpiban bukul ba ka ba roon bu kë ñaan ngënu bëlieng, te ba rits wëtan;

² aja bukul: “Aka nalon nawat-pëleents tsi pëlon përaasa; lënkats Nasien-batsi, a rispiitaarats ñaan.

³ Tsi përaasa pëmënts pun, aka rul nalon ŋaats nan catsëndani ayënul; na ja na ya di nawat-pëleents në jaul: ‘Faŋanin tsi ko wi n kaar wi ni bëñaasar nji.’

⁴ Nawat-pëleents ja na roon di ka cikëndënul, te ko jon. Maa tsi bërun, na ja tsi ibatsul: ‘Ŋal bi n lënkats bi Nasien-batsi, a nji n rispiitaarats ñaan,

⁵ maa bi ŋaats nan cätsëndan ink ayënul ja bink na roon në bi pëmin-minanin, mán faŋanul; ucits ank, nuu bi koo nooranin.’”

⁶ Din, Ajug ja: “Nda te ko wi nawat-pëleents na mabatsi ja wi.

⁷ Ande Nasien-batsi di ka faŋan biki na rat biki-a? Bukul ba nja biki ba roon bu kë kat përim koo ruul pënak ni bërëm; kee na jon pëyankar bukul-a?

⁸ Man ja ind: Ka faŋan bukul, ucar. Maa ubaandi Abuk ñaan-najin, kee tsënki uwak tsi umundu-a?”

Yeesu tib përim anaamanaan Nafariseu, ni nayep bëluk-uraasa

⁹ A Yeesu tib kak përim, tsi uleka balon ba nja biki ba roon bu kë wak tsi iyeen bukul, ba tsuar pëci bamabal, bu kë be bacints bukul;

¹⁰ aja: “Aka bañaan batëb, ban kata biki tsëp kato-kayëman, pii ñaan; nalon aci Nafariseu, a nacints ci nayep bëluk-uraasa.

¹¹ Nafariseu natsa anats, a na ñaan tsi ibatsul aja: ‘Oo Nasien-batsi! Man baranu par nji n naamats ni bañaan ban duka bukunk; bë ci bakiej, bamabats, baro-mjubi, te nin in naamats ni nayep bëluk-uraasa ni;

¹² kanëm, ka bër-mlik ngëyaas ngëtëb, a n ja tsi ko wi n ka wi, ka pënan kafa kaloole tsi ifa untaaja, ka wël kul di kato-kayëman.’

¹³ Maa, nayep bëluk-uraasa nats alawan, nin ŋalats pëkatar këkës batsi; maa nuu kob bëjíncul, a nuu ja: ‘Ina Nasien-batsi! Jampësain nji najuban.’

¹⁴ Man ja ind: Namëntsi ajuŋa tsëp katoul atsua namabal, maa nacints nun dolaatsa ank. Par, nan diangi beenul, në welanaa, a na welani beenul, në riangaa.”

Yeesu a ja ngëwar pa upäts uties

¹⁵ A ba tsijiul buts upäts ban du bëka, nee na kërara bukul. Bafets kë win, a ba leentsar bukul.

¹⁶ Maa Yeesu rui bukul, a na ja: “Nda wëtan upäts uties ba bi tsi nji, ind tsë laaŋ bukul, par pësien Nasien-batsi aci pa bañaan pi bukul.

¹⁷ Mán leents ind ucär: Na niiranatsi pësien Nasien-batsi pi napäts naties, di ka niaj tsi pul yaas.”

Nalon niints narëmb nan ci tsi pëtsas ubiira un dits wi ka ba

¹⁸ Aka nalon ñaan nawiak na yepari Yeesu, aja: “Najukan nawar! We wi n ka wun përo, pa pëka ubiira un dits wi ka ba?”

¹⁹ A Yeesu yankul, aja: “We ka wun kë jain, nawar? Nawar cits, ucits ba Nasien-batsi baë.

²⁰ Me ngëtsua: ‘M di kë ro mjubi; m di kë fiŋ ñaan; m di kë kiej; m di kë jaar ñaan ko un cits wi ucär; kë rispitaar asinu ni aninu.’”

²¹ Din, a na ja: “Man mob tsi përo ngëmënts ngan bëlieng, ki n ci ki ndëpaas.”

²² Bi Yeesu te bi ko wan, a na jaul: “Awama rukau ko uloole: waapan ko wi m ka wi bëlieng, faan wul baranj, kii ka bëka di batsi; a uu ba kë pëni, kë fetsin.”

²³ Maa, a nu te ko wan, na juatsan mak, par aci narëmb mak.

²⁴ Bi Yeesu win bi na juatsan mak, na ja: “Añats ban ka biki bëka pëniaj pësien Nasien-batsi!

²⁵ Par, ape përaf ungilëm pëpar di baar kagúja, ni pëjaa narëmb aniaj Pësien Nasien-batsi.”

²⁶ A ban te biki ko wa n ja: “Bi u ci bank, yën ka yëlan un pëbuer?”

²⁷ A Yeesu yank bukul, aja: “Ko wi bañaan-bajin yëlaants wi përo, Nasien-batsi ayëlan përo wul.”

²⁸ Din, Per ja: “Wund wëtan bikink ngiic wund, a wund kë fetsu!”

²⁹ Yeesu ja bukul: “Mán leents ind ucär: Kaats ñaan na wëtani katoul, oo aarul, oo ban tsaar biki ni nul, oo bábukul, oo upätsul, undo pësien Nasien-batsi,

³⁰ a na rits yank un pe wi tsi uwal wi, nii yankand ubiira un dits wi ka ba tsi uwal wi kan bi wi.”

Uyaas uwaajantsan, wi Yeesu ñakanaan wi uleka pëcätsul

³¹ Yeesu laayatsaanda bafetsul, untaaja bukun ni batëb, a na ja bukul: “Nja ka kata bikink pëtsëp Jerusalem; ngëko bëlieng ngi bayëlia pican ngi tsi uleka Abuk ñaan-najin, ka rolaa;

³² par, ka gutsara bañaan ban cits biki Bajudeu, në jiaa, në karaa, në tújaraa;

³³ bu ka lumbajul a uu ba, bu ka fiŋul, a tsi unu uwaajantsan në natsee di pëcäts.”

³⁴ Maa, kaats ko wi bafets me wi tsi uleka ngëko ngëmënts ngan; ko wi përim pan pac wi akunda bukul, a bë meets ko wi na ja wi.

Yeesu ayësan nakuel Jeriko

³⁵ Bi Yeesu kë wokan bi Jeriko, a u ka nakuel nan tsoari tsi kambaŋ bëga, a nuu ñaan.

³⁶ A nu te kandënd bañaan kë par, na yepar ko un ci wi.

³⁷ Na jaka aci Yeesu, Kanpënë-ni-nasaret, ka par un.

³⁸ A na lië, aja: “Yeesu, Abuk Dawid, yëkarin ipës!”

³⁹ A ba yër biki bërun kë leentsarul, pa na yëŋandar. Maa, na ru pe këpe pëlië, koo ja: “Abuk Dawid, yëkarin ipës!”

⁴⁰ A Yeesu nats, na tsu niints përëŋaneeul. Bi na baandi bi ee wokul, Yeesu yeparul aja:

⁴¹ “Wee m ŋal wun ndoon ka rooru?” A na yankul, aja: “Ajug, ma ŋal pëkak n win.”

⁴² Din a Yeesu jaul: “Kakan win; uwaku abueranu.”

⁴³ Tsi uyëk umënts wun, na kak awin, na ci tsi pëfets Yeesu, a nuu bëndan Nasien-batsi. A bañaan bëlieng kë win ko wan, ba bëndan buts Nasien-batsi.