LÚKAS 17 - KARÚK-PËRIM KAWALU Nouveau Testament

Ujuban

¹ A Yeesu ja bafetsul: “Ngëko ngi kan tsu ngi ñaan na yër, kaats bi nga rits bi ka ci. Maa, cay ñaan ni kan kaani ngëko ngan kë baandi!

² Amatul na roon në tana pëlaak pëwiak tsi katsuts, në gutsa di bërëk, ni pëjaa atsu nalon tsi baties biki na juban.

³ Nda rukan ibats tsi ind bërier ind. Uci nan tsaari ni wi juban, leentsariul. Uci na yaar ibats, jampësaanul.

⁴ Uci na juban tsi ulekau te ngëyaas paaj ni ulon tsi unu uloole, a na witsee tsi wi te ngëyaas paaj ni ulon ee jau: ‘Man yaar ibats;’ jampësaanul.”

Uwak

⁵ A bapostolu ja Ajug: “Watsës wund uwak.”

⁶ A Ajug ja: “Uci nda ka uwak, ŋal u tiesëts pi pëbëk bëmutaar, ndë ja bëko bi: ‘Dëtaan, kë tsëp kii nats di bërëk!’ Din bu ro ko wi nda ja wi bul.

Ko wi naleemp ka wi përo

⁷ Naom tsi ind ka ka un naluëk na mobi tsi kajaar oo tsi bëyafan ngëncaam, a naluëk namënts un pëni di bëreeŋ a nu baandi din në jaul: ‘Bili ucar kë tsoar bariala?’

⁸ Ane di ka jaul: ‘Juŋarin ufëri, feñan iŋi, kë këmandin koo riala, koo raan, a uu ba, kë riala kë raan?’

⁹ Ane aka na roon në baran naluek namënts un undo aro ko wi na tsua wi-a?

¹⁰ Unk buts ind, uwal wi nda ro wi ko wi nda tsua wi ba këtsua, ndë ja: Wund aci baluëk ban kaats biki bëkat, par ko wi wund ka wi përo, wul wi wund ro wun din.”

Yeesu yësan bayënts untaaja, ba maak biki kantsewul-kajankal

¹¹ A Yeesu kë tsëp Jerusalem, na par tsi bëkic Samaaria ni Galileeya.

¹² Nu niaj ulon untab, a bayënts untaaja ba maak biki kantsewul-kajankal bi pii jëk ni nul. Ba nats alawan,

¹³ a ba kat përim, aja: “Yeesu, Nawiak! Yëkari wund ipës!”

¹⁴ Bi na win bukul, na ja: “Nda tsëpan ndii pibandar tsi bajakan.” Bi ba ci bi tsi bëga pëtsëp, a ba jëntsana.

¹⁵ Nalon tsi bukul kë win na yësana, na witsee, a na kat përim arëmban Nasien-batsi.

¹⁶ A na yër tsi itsiim Yeesu alëm urostu tsi utsia, na ci tsi pëbaranul. Nul aci ñaan Samaaria.

¹⁷ Din, a Yeesu ja: “Ban jëntsana biki, bë cits iink bañaan untaaja-a? A këwas bukun ni nalon, bë ci tsum-i?

¹⁸ Ane kaats nalon tsi bukul pa pëwitsee përëmban Nasien-batsi, ucits ba natsooŋ ni-a?”

¹⁹ Din, a Yeesu jaul: “Natsaan tsëp; uwaku bueranu.”

Ubaandari pësien Nasien-batsi

²⁰ Bafariseu yepar Yeesu, ajaul: “Pësien Nasien-batsi ka baandi lum?” A na yank bukul, aja: “Pësien Nasien-batsi di koo baandi, pë wina iink;

²¹ ñaan di ka ja: ‘Pul pi tsi!’ Oo: ‘Pul pundun!’ Par, pësien Nasien-batsi aci tsi pëncuaf ind.”

²² A na ja bafetsul: “Ngënu ka bi ngank, ngi ndu rí ngi pëwin unu uloole tsi ngënu Abuk ñaan-najin, maa nda ri ka win.

²³ Bañaan koo ja ind: ‘Nul nundun!’ Oo: ‘Nul ni tsi!’ Ind tsë ya rul, te ind tsë fets bukul.

²⁴ Par bi kalikajan kë likës bunk di kajara batsi te di kacints, unk di Abuk ñaan-najin, kë ci run tsi unuul.

²⁵ Maa, aka pënoor bërun tsi ngëko ngëcumal, bañaan ntsari ka bërul.

²⁶ Bi u ci bunk tsi ngënu Noe, unk di uu ci run tsi ngënu Abuk ñaan-najin:

²⁷ Bañaan do ka riala, a bu kë raan, a bu kë nim, a bu kë niman, te unu wi Noe niaj wi bëntsian, a mlik-mfuër bi ee ba ni bukul bëlieng.

²⁸ Unk buts bi u ro bun ci tsi ngënu Lot: Bañaando ka riala, a bu kë raan, bu kë weel, bu kë waap, bu kë wayan, bu kë niew.

²⁹ Maa, unu wi Lot pën wi di Sodooma, a bërua subi di batsi ni ucof, ee ba ni bukul bëlieng.

³⁰ Unk di wii ci run tsi unu wi Abuk ñaan-najin, kë pibanaa wi.

³¹ Tsi unu umënts, nan ci di ruëts kato, a na ka ngëkoul di bametsu kato, nul tsë welara pëjej ngul. Unk buts, nan ci di bëreeŋ, nul tsë witsa ufets.

³² Nda lesan aar Lot.

³³ Ni kan tsasi pëwaay ubiiraul, ka niama wul. Maa na niamani ubiiraul, në wamand wul.

³⁴ Man ja ind: Bërëm bëmënts, batëb ka ci tsi bëkaab bëloole, naloole ka jeja, nacints ka ruka;

³⁵ bakaats batëb ka ci tsi pëson tsëloole, naloole ka jeja, nacints ka ruka.” [

³⁶ Bayënts batëb ka ci di bëreeŋ, naloole ka jeja, nacints ka ruka.]

³⁷ A bafetsul yeparul ajaul: “Tsum, Ajug?” Na yank bukul, aja: “Tsi uncats ci tsi, din ngëjúgëri ka júk tsul.”